Дэлхийн цаг уурын нөхцөл байдал эрс тэс хэвээр үргэлжилж байна. Өнөөдрийн байдлаар АНУ-д аюултай халалтын давалгаа үргэлжилж байгаа бол Баруун Номхон далайд үүссэн Супер хар салхи Bavi хүчээ авч, бүс нутгийн улс орнуудад онцгой байдлын сэрэмжлүүлэг зарлаад байна.

АНУ-ын Үндэсний цаг уурын албаны мэдээлснээр тус улсын зүүн болон төвийн бүсийн олон мужид агаарын температур 35–40 хэм хүрч, дулааны индекс зарим газарт 46 хэмийг давжээ. Үүнтэй холбоотойгоор олон сая иргэнд "Extreme Heat Warning" буюу онц аюултай халалтын сэрэмжлүүлэг өгч, өндөр настан, хүүхэд болон архаг өвчтэй иргэдийг нарны шууд тусгалаас зайлсхийж, хангалттай шингэн хэрэглэхийг зөвлөсөн байна.

Үүний зэрэгцээ Баруун Номхон далайд үүссэн Супер хар салхи Bavi тавдугаар зэрэглэлийн хүчтэй хар салхины ангилалд хүрч, салхины хурд цагт 290 километр хүрээд байна. Хар салхи ойрын өдрүүдэд АНУ-ын харьяа Гуам арал болон Хойд Марианы арлуудад ойртон, хүчтэй салхи, аадар бороо, далайн түрлэг, үер усны аюул дагуулах өндөр эрсдэлтэй байгааг цаг уурын байгууллагууд анхааруулжээ.

Цаг уурын мэргэжилтнүүдийн үзэж буйгаар далайн гадаргын ус хэвийн хэмжээнээс хальж, мөн Эль-Ниньо үзэгдлийн нөлөө нь хар салхи богино хугацаанд эрчимжих нөхцөлийг бүрдүүлж, дэлхийн олон бүсэд хэт халалт болон эрс тэс цаг агаарын үзэгдлийн эрсдэл нэмэгдэж байна.

Олон улсын цаг уурын байгууллагууд иргэдийг албан ёсны сэрэмжлүүлгийг тогтмол дагаж, болзошгүй гамшгийн эрсдэлээс урьдчилан сэргийлэхийг зөвлөж байна.