Куб улсын үндэсний цахилгаан эрчим хүчний сүлжээ бүрэн доголдсоны улмаас улс орон даяар цахилгаан тасарч, 10 сая орчим хүн гэрэл цахилгаангүй болсон талаар тус улсын Эрчим хүч, уул уурхайн яам мэдээллээ. Эрчим хүчний салбарынхан гэмтлийн шалтгааныг тогтоохоор ажиллаж байгаа бөгөөд цахилгааныг үе шаттайгаар сэргээж эхэлжээ.

Энэ нь Куб улсад сүүлийн хоёр жилийн хугацаанд тохиосон найм дахь, 2026 онд гарсан гурав дахь улсын хэмжээний цахилгаан тасалдал болж байна. Эрчим хүчний үйлдвэрлэл олон жилийн турш хөрөнгө оруулалт дутмаг, хуучирсан дулааны цахилгаан станцуудын эвдрэл, түлшний хомсдолоос шалтгаалан хүнд байдалд оржээ.

Кубын эрх баригчид эрчим хүчний хямралыг АНУ-ын хориг арга хэмжээ болон газрын тосны нийлүүлэлтэд тавьсан хязгаарлалтуудтай холбон тайлбарлаж байна. Харин АНУ эдгээр арга хэмжээг Кубын засгийн газарт улс төрийн дарамт үзүүлэх бодлогын хүрээнд хэрэгжүүлж буйгаа мэдэгддэг.

Харин олон улсын шинжээчид өнөөгийн хямралд АНУ-ын хоригийн зэрэгцээ Кубын эрчим хүчний салбарын олон жилийн буруу менежмент, дэд бүтцийн шинэчлэл хийгдээгүй явдал мөн нөлөөлсөн гэж дүгнэж байна.

Цахилгаан тасарсны улмаас эмнэлэг, ус түгээх систем, нийтийн тээвэр болон хүнсний үйлдвэрлэлийн үйл ажиллагаанд доголдол үүсэж, зарим бүс нутагт иргэд хэдэн өдрийн турш цахилгаангүй байх эрсдэлтэй байгаа юм.

Л.Баяр