Унгарын шинэ Засгийн газар төрийн өмчит хэвлэл мэдээллийн байгууллагуудад өргөн хүрээтэй шинэчлэл хийхээ зарлаж, өмнөх Ерөнхий сайд Виктор Орбаны үед бий болсон нэг талыг барьсан мэдээллийн тогтолцоог өөрчлөх ажлыг эхлүүлжээ.

Шинэчлэлийн хүрээнд төрийн телевиз, радиогийн мэдээний нэвтрүүлгийг түр хугацаанд зогсоож, редакцын бүтэц, үйл ажиллагааг бүхэлд нь шинэчлэхээр болсон байна. Засгийн газар энэхүү алхмыг төрийн хэвлэл мэдээллийн байгууллагуудын хараат бус, тэнцвэртэй үйл ажиллагааг сэргээх зорилготой гэж тайлбарлажээ.

Ерөнхий сайд Петер Мажар энэ талаар мэдэгдэхдээ, "Орбаны үеийн суртал ухуулгын он жилүүдийг дуусгавар болгож, иргэдэд бодит, хараат бус мэдээлэл хүргэдэг тогтолцоог бий болгоно" хэмээн онцолсон байна.

Харин өмнөх Ерөнхий сайд Виктор Орбан болон түүний намын зүгээс уг шийдвэрийг улс төрийн зорилготой гэж шүүмжилжээ.

Олон улсын хэвлэлүүдийн мэдээлснээр шинэчлэлийн явцад төрийн хэвлэл мэдээллийн байгууллагын бүтэц, санхүүжилт, редакцын бодлогыг бүрэн шинэчлэхээр төлөвлөж байгаа бөгөөд энэ нь Унгарын хэвлэл мэдээллийн салбарын сүүлийн жилүүдийн хамгийн том өөрчлөлтүүдийн нэгт тооцогдож байна.