АНУ Ираны эсрэг агаарын цохилтоо үргэлжлүүлж, Ерөнхийлөгч Доналд Трамп мөргөлдөөн цаашид даамжирвал Ираны дэд бүтцийн байгууламжуудыг онилно гэж мэдэгдсэн байна. Харин Тегеран Вашингтоны аливаа халдлагад “нүдийг нүдээр” хариу барина гэдгээ анхааруулжээ.

АНУ-ын арми Ираны эсрэг агаарын цохилтоо дараалан 12 дахь шөнөө үргэлжлүүлсэн бөгөөд пуужин, нисгэгчгүй онгоц болон тандалтын системтэй холбоотой цэргийн байгууламжуудыг онилсон байна. Мөргөлдөөн эхэлснээс хойш АНУ-ын 18 цэрэг амиа алдаж, олон зуун хүн шархаджээ. Ерөнхийлөгч Трамп лхагва гарагт Делавэр мужийн Доверын агаарын цэргийн баазад Ойрхи Дорнодод амь үрэгдсэн дөрвөн цэргийн шарилыг эх оронд нь авчрах ёслолд оролцсон байна.

Гэвч дайн зөвхөн АНУ, Ираны хооронд хязгаарлагдахаа больж, бүс нутгийн хэмжээнд тэлэх эрсдэл нэмэгдэж байна. Ираны дэмжлэгтэй Йемений Хуситууд Улаан тэнгист Саудын Арабын нефтийн хоёр хөлөг онгоц руу халдсан гэж мэдэгдсэн бөгөөд нэг хөлөгт гал гарчээ. Үүний зэрэгцээ Ираны Хувьсгалт гвард ойролцоох гурван нефтийн танкерийг зогсоосон тухай мэдээлсэн байна.

Энэ нөхцөл байдал дэлхийн эрчим хүчний зах зээлд шууд нөлөөлж, нефтийн үнэ огцом өсөв. Брент маркийн нефтийн үнэ баррель нь 95 ам.доллар давсан байна. АНУ-ын арми Ираны цэргийн объектууд руу цохилт өгсөөр байгаа ч дипломат сувгаар яриа хэлэлцээ хийх оролдлогууд одоогоор дорвитой үр дүнд хүрээгүй байна.

Вашингтон, Тегераны хоорондын хурцадмал байдал улам нэмэгдэж буй энэ үед Трамп Ираны стратегийн дэд бүтцэд цохилт өгөхийг анхааруулсан бол Иран үүнийг бүс нутгийн дайн улам өргөжих шалтгаан болно гэж мэдэгдэж байна. Ингэснээр Ойрхи Дорнод төдийгүй дэлхийн эрчим хүчний аюулгүй байдал, нефтийн нийлүүлэлт, олон улсын эдийн засагт үзүүлэх нөлөө улам нэмэгдэх төлөвтэй байна.

Л.Баяр