Европын өмнөд болон баруун хэсэгт үргэлжилж буй хэт халалт, ган гачиг ой хээрийн түймрийн нөхцөл байдлыг улам хүндрүүлж, Франц, Испани, Италийн олон бүс нутагт онцгой байдал зарлаап байна. Хэдэн арван мянган хүн орон гэр, аялал жуулчлалын баазуудаас нүүлгэн шилжүүлэгдэж, олон зуун мянган га газар түймэрт өртөөд байна.

Францын баруун өмнөд хэсгийн Жиронд мужид гарсан түймэр хэдхэн хоногийн дотор асар хурдтай тархжээ. Гал түймэр Сомос орчмын ойд дэгдэж, 24 цаг хүрэхгүй хугацаанд 2,400 га талбайг хамарсан байна. Орон нутгийн эрх баригчид 18,000 гаруй хүнийг аюултай бүсээс нүүлгэн шилжүүлж, 800 орчим гал сөнөөгч, ус цацагч онгоцнууд галыг тогтоон барихаар ажиллажээ.

Францын түймрийн улирал энэ жил ердийнхөөс эрт эхэлсэн бөгөөд долдугаар сарын дунд үе гэхэд 42,000 гаруй га газар шатсан нь өмнөх дээд үзүүлэлтүүдийг давсан байна. Мөн түймэртэй тэмцэж байсан хоёр гал сөнөөгч амиа алдсан талаар мэдээлжээ.

Испанид ч нөхцөл байдал хүнд байна. Тус улс 2026 онд аль хэдийн 100,000 гаруй га, зарим мэдээллээр 125,000 га орчим газар түймэрт өртсөн бөгөөд олон бүс нутагт онцгой байдлын арга хэмжээ авчээ. Мадрид, Авила зэрэг газарт олон мянган хүнийг нүүлгэн шилжүүлж, цэргийн хүчийг гал унтраах ажиллагаанд дайчилсан байна.

Италид мөн түймэртэй тэмцэж байсан гал сөнөөгч амиа алдсан бол Газар дундын тэнгисийн бүс нутгийн усны температур хэвийн хэмжээнээс хэдэн хэмээр өндөр байгаа нь нөхцөл байдлыг улам хүндрүүлж байна. Мэргэжилтнүүдийн үзэж буйгаар олон долоо хоног үргэлжилсэн хэт халалт, хур тунадас багатай нөхцөл, хөрс ургамлын хэт хуурайшилт, хүчтэй салхи зэрэг нь түймэр хурдан тархах “төгс нөхцөл”-ийг бүрдүүлж байна. Европ дэлхийн дунджаас хурдан дулаарч байгаа нь ийм төрлийн хэт халалт, ган, түймрийн эрсдэлийг нэмэгдүүлж байгааг эрдэмтэд анхааруулжээ.

    Ийнхүү 2026 оны зун Европын хувьд зөвхөн халуун цаг агаарын асуудал биш, хүний амь нас, аялал жуулчлал, хөдөө аж ахуй, байгаль орчинд шууд нөлөөлж буй томоохон гамшгийн сорилт болж байна.

Л.Баяр