Европын өмнөд хэсэгт зуны халуун улам эрчимжих төлөвтэй байгаа энэ үед Франц, Испани улс ой хээрийн асар том түймэртэй тэмцэж байна. Хуурайшилт, өндөр температур, салхины чиглэлийн өөрчлөлт галын тархалтыг хурдасгаж, хоёр улсын хувьд ойрын хэдэн өдөр түймрийг тогтоон барих хамгийн чухал үе болжээ. Францын баруун өмнөд хэсэгт гал Бордо хотын зах руу ойртож, тус улсын алдарт дарсны бүс нутагт ноцтой аюул учруулаад байна. Атлантын далайн эрэг дэх аялал жуулчлалын алдарт Кап-Ферре хойг мөн түймэрт өртөж, олон мянган хүн гэр орон, амралтын газраа орхин явахаас өөр аргагүй болжээ.

Францын эрх баригчдын мэдээлснээр, түймрийн улмаас ойролцоогоор 220 мянган хүнийг нүүлгэн шилжүүлсэн байна. Гал сөнөөгчид дөл Бордо хотын захад хүрэхээс сэргийлэн ажиллаж байгаа ч салхины чиглэл өөрчлөгдөж, халуун агаар үргэлжилж байгаа нь ажиллагааг улам хүндрүүлж байна. Галын цар хүрээ ч асар их байна. Баруун өмнөд Францад хэдэн арван мянган га газар шатсан бөгөөд зарим түймэр өөрөө гал үүсгэх хэмжээний хүчтэй болж, шинэ голомт бий болох эрсдэлтэй нөхцөл үүсжээ. Гал сөнөөгчдийн зарим нь шархадсан бол өмнөх өдрүүдэд Францад хоёр гал сөнөөгч амиа алдсан байна.

Харин Испанид нөхцөл байдал бүр ч өргөн хүрээнд хүндэрчээ. Тус улсын Мадридын баруун хэсэг, Авила болон Валенсиа орчимд хэд хэдэн томоохон түймэр дэгдэж, зарим голомт хоорондоо нийлэн асар том галын фронт үүссэн байна. 75 мянга гаруй хүн гэр орноо орхин нүүлгэн шилжсэн бол 30 мянга орчим хүнд гэрээсээ гарахгүй байх тушаал өгчээ.

Испанийн Ерөнхий сайд Педро Санчесийн мэдээлснээр, энэ он гарснаас хойш тус улсад 150 мянга гаруй га газар түймэрт өртсөн нь өнгөрсөн оны мөн үеийнхээс зургаа дахин их үзүүлэлт юм. Тэрээр түймрийн хэмжээ, эрч хүч улам нэмэгдэж байгаа нь цаг уурын эрс тэс үзэгдэлтэй холбоотойг онцолжээ.

Ийнхүү Франц, Испанийн гал сөнөөгчид нэг талаас одоо байгаа түймрийг хяналтад авахын төлөө тэмцэж байгаа бол нөгөө талаас шинэ голомт үүсэхээс сэргийлэх уралдаантай нүүр тулж байна. Хоёр улсад сүүлийн өдрүүдэд агаарын температур дунджаас хэд хэдэн хэмээр өндөр байсан бөгөөд халуун, хуурай нөхцөл галын тархалтыг улам эрчимжүүлжээ.

Ойрын өдрүүдэд цаг агаар дахин халж болзошгүй байгаа нь түймэртэй тэмцэх ажиллагааг улам хүндрүүлэх төлөвтэй. Иймээс эрх баригчид иргэдийг түймрийн бүс рүү зорчихгүй байх, гал гаргаж болзошгүй үйлдлээс зайлсхийхийг анхааруулж байна.

Европын өмнөд хэсэгт зуны улирал бүр ой хээрийн түймэр гардаг ч энэ жилийн нөхцөл байдал цар хүрээ, тархалтын хурд, нүүлгэн шилжүүлсэн хүний тоогоороо онцгой хүнд байна. Түймэртэй тэмцэх дараагийн хэдэн өдөр Франц, Испанийн хувьд зөвхөн галын эсрэг бус, дахин эрчимжих халуун цаг агаартай хийх тэмцлийн хамгийн шийдвэрлэх үе болох төлөвтэй байна.

Л.Баяр