АНУ-ын Вашингтон мужийн Сиэтл хотод зохион байгуулагдаж байсан хүнсний фестивалийн үеэр буудалцаан гарч, хоёр хүн амиа алдан, хэд хэдэн хүн шархаджээ. Буудалцаан долдугаар сарын 26-ны ням гарагийн орой, орон нутгийн цагаар 18:00 цагийн орчимд Сиэтл хотын төвийн “Seattle Center” цогцолборт болсон байна. Тус газар нь хотын алдарт “Space Needle” цамхагаас ердөө нэг гудамжны зайд оршдог бөгөөд тухайн үед жил бүр зохион байгуулдаг “Bite of Seattle” хүнсний фестиваль үргэлжилж байжээ.

Сиэтлийн Гал түймэртэй тэмцэх албаны мэдээлснээр хоёр хүн хэргийн газарт амиа алдсан бол дөрвөн хүн, түүний дотор хоёр настай хүүхэд эмнэлэгт хүргэгдсэн байна. Эмнэлэгт хүргэгдсэн хүмүүсийн нэг нь биеийн байдал хүнд байгаа аж. Мөн нэг хүн хөнгөн гэмтэл авсан ч эмнэлэгт хүргүүлэхээс татгалзжээ.

Гэрчүүдийн мэдээлснээр буун дуу гарахад фестивалийн талбайд байсан хүмүүс сандарч, хаа сайгүй гүйлдэн зугтсан байна. Хоёр гэрч CNN-ийн харьяа KOMO телевизэд долоо, найман удаа буун дуу сонссон гэж ярьжээ. Олон нийтийн сүлжээнд нийтлэгдсэн бичлэгүүдэд хүмүүс хоолны лангуу, худалдааны хэсгүүдийн дундуур зугтаж буй дүр зураг харагдсан байна. Цагдаа болон онцгой байдлын алба хаагчид хэргийн газарт шуурхай ажиллаж, ойр орчмын хүмүүсийг нүүлгэн шилжүүлжээ.

Одоогоор цагдаа нар сэжигтэн этгээдийг баривчилсан эсэх, буудалцааны шалтгаан болон сэжигтний талаар мэдээлээгүй байна. Холбооны мөрдөх товчоо зэрэг хэд хэдэн хууль сахиулах байгууллага мөрдөн шалгах ажиллагаанд оролцож байгаа аж. Цагдаа нар иргэдийг хэргийн газраас хол байхыг анхааруулсан байна.

Тус фестиваль нь жил бүр олон зуун мянган хүнийг цуглуулдаг бөгөөд энэ жилийн арга хэмжээнд орон нутгийн олон зуун худалдаачин, хоол үйлдвэрлэгч, уран бүтээлчид оролцож байжээ. Буудалцааны дараа Seattle Center-ийн монорельс үйлчилгээг тухайн өдрийн үлдсэн хугацаанд түр зогсоосон байна.

Л.Баяр