Дэлхийн аялал жуулчлалын бэлгэ тэмдэг болсон Дубай хот сүүлийн жилүүдэд түүхэн дээд амжилт тогтоож, сая сая жуулчдыг татаж байсан ч Ойрх Дорнодын хурцадмал байдал түүний аялал жуулчлалын салбарт хүчтэй нөлөөлжээ. Ираны эсрэг чиглэсэн цэргийн ажиллагаа, бүс нутаг дахь мөргөлдөөний дараа олон улсын аялагчдын зарим нь Дубайг зорих төлөвлөгөөгөө цуцалж, нислэг болон зочид буудлын захиалга буурсан байна. Хэдийгээр Дубай өөрөө мөргөлдөөний гол талбар биш ч Ойрх Дорнодын бүс нутгийн эрсдэлтэй холбоотойгоор жуулчдын болгоомжлол нэмэгджээ.
Ийм нөхцөлд Дубайн эрх баригчид жуулчдыг буцаан татах шинэ арга хэмжээ авч эхэлсэн байна. Тэд “A Dubai Invite” нэртэй урамшууллын хөтөлбөрийг хэрэгжүүлж, гадаадад амьдардаг найз нөхөд, гэр бүлийн хүмүүсээ Дубайд урьсан оршин суугчдад 3000 дирхам буюу ойролцоогоор 800 ам.долларын үнэ бүхий багц урамшуулал олгохоор болжээ.
Энэхүү урамшуулалд зочид буудлын байр, ресторан, аялал жуулчлалын үзвэр үйлчилгээний хөнгөлөлт болон хотын алдартай газруудаар аялах боломжууд багтаж байна. Хөтөлбөрийн гол зорилго нь Дубайг дахин “аюулгүй, найдвартай аяллын төв” гэдгийг дэлхий нийтэд харуулах явдал юм. Учир нь тус хот өнгөрсөн жилүүдэд тансаг аялал, худалдаа, бизнесийн төв гэдгээрээ дэлхийд танигдаж, жил бүр олон арван сая жуулчин хүлээн авдаг болсон билээ.
Дубай 2025 онд 19.5 сая орчим олон улсын жуулчин хүлээн авч, аялал жуулчлалын түүхэн дээд үзүүлэлтээ шинэчилсэн юм. Гэвч бүс нутгийн улс төр, аюулгүй байдлын нөхцөл байдал өөрчлөгдөхөд энэ салбар хэр эмзэг болохыг сүүлийн үйл явдлууд харууллаа.
Зочид буудал, нислэгийн салбарынхан жуулчдын эрэлт буурсныг мэдэрч эхэлсэн бөгөөд зарим хугацаанд зочид буудлын дүүргэлт эрс багассан талаар мэдээлжээ. Тиймээс Дубай зөвхөн хямдрал санал болгохоос гадна олон улсын аялагчдад “энд амьдрал хэвийн үргэлжилж байна” гэсэн дохио өгөхийг зорьж байна.
Ойрх Дорнодын геополитикийн нөхцөл байдал аялал жуулчлалд шууд нөлөөлж байгаа энэ үед Дубайн энэхүү алхам нь эдийн засгаа хамгаалах, дэлхийн аяллын газрын зураг дээрх байр сууриа хадгалах стратегийн нэг хэсэг болж байна.
Өндөр барилга, тансаг зочид буудал, худалдааны төвүүдээрээ алдартай Дубай өнгөрсөн хугацаанд хямралаас хурдан сэргэж чаддаг гэдгээ олон удаа харуулсан. Харин энэ удаад хотын хамгийн том сорилт нь аюулгүй байдлын талаарх аялагчдын итгэлийг дахин сэргээх явдал болж байна.
