Франц, Испанид дэгдээд буй ой, хээрийн түймэр Европын өмнөд хэсгийг хамарсан хамгийн том байгалийн гамшгийн нэг болж, хоёр улсын эрх баригчид онцгой байдлын хүчин чадлаа бүрэн дайчлан ажиллаж байна. Францын Ерөнхийлөгч Эммануэль Макрон энэ нөхцөл байдлыг "Дэлхийн II дайнаас хойших хамгийн хүнд сорилт" хэмээн тодорхойлжээ. Францын баруун өмнөд хэсэг, ялангуяа Бордо хот орчмын Жиронд мужид түймэр хамгийн хүчтэй тархаж, олон арван мянган га ой шатсан байна. Харин Испанид Мадридын ойролцоох бүсүүд болон Авила, Толедо мужуудад түймэр хурдацтай тархаж, олон арван мянган хүнийг яаралтай нүүлгэн шилжүүлэхэд хүрчээ.

Албаныхны мэдээлснээр Франц, Испани даяар нийт 300 мянга гаруй хүн гэр орноо орхин дүрвэхээс өөр аргагүй болсон бөгөөд энэ нь Францын энхийн цаг үеийн түүхэн дэх хамгийн том нүүлгэн шилжүүлэлтүүдийн нэгт тооцогдож байна. Испанид түр хугацаанд зарим бүсийн иргэдийг буцаан оруулсан ч түймрийн аюул бүрэн арилаагүй байна.

Гал унтраах албаныхан цаг агаар богино хугацаанд тогтуун болсон үеийг ашиглан түймрийг хязгаарлах ажилд ахиц гаргасан ч энэ долоо хоногт дахин хүчтэй халалтын давалгаа эхлэх төлөвтэй байгаа нь нөхцөл байдлыг улам хүндрүүлэх эрсдэлтэй гэж анхааруулжээ. Францад 3,000 гаруй гал сөнөөгч, олон арван нисэх онгоц ажиллаж байгаа бол Европын Холбооны хэд хэдэн улс болон Турк улсаас нэмэлт техник, хүч илгээсэн байна.

Мэргэжилтнүүдийн үзэж буйгаар хэт халалт, удаан үргэлжилсэн ган гачиг, хуурайшилт нь түймрийг урьд өмнөхөөс илүү хурдан тархаах нөхцөл бүрдүүлжээ. Зарим түймэр өөрийн гэсэн бичил уур амьсгал үүсгэж, "галан үүл" (pyrocumulonimbus) бий болгосноор салхи, оч үүсгэн түймрийг улам хүчтэй тарааж байгаа аж.

Францын эрх баригчид түймрийн шалтгааныг мөн шалгаж байгаа бөгөөд энэ зуны хугацаанд санаатай гал тавьсан байж болзошгүй хэд хэдэн тохиолдлоор хүмүүсийг баривчилсан талаар мэдээлжээ. Харин Испанийн Ерөнхий сайд Педро Санчес энэхүү гамшиг нь уур амьсгалын өөрчлөлтийн бодит үр дагаврын тод жишээ болж байгааг онцолсон байна.

Л.Баяр