Их Британийн шүүх Ирантай холбоотой гэх олон улсын гэмт бүлэглэлийн захиалгаар хүний амь нас хөнөөх төлөвлөгөөнд оролцсон Норвегийн 19 настай залууг хүн амины хэрэгт хуйвалдсан гэм буруутай гэж тогтоолоо. Лондоны Төв эрүүгийн шүүхэд болсон шүүх хурлаар Йоханнес Конгснес Натландыг Шведэд төвтэй Foxtrot Network нэртэй зохион байгуулалттай гэмт бүлэглэлийн захиалгаар Их Британид хүн алахаар очсон гэж үзжээ. Прокуроруудын мэдээлснээр тэрээр 2025 оны гуравдугаар сард тодорхойгүй нэг хүнийг буудан хөнөөхийн тулд 25 мянган еврогийн хөлс авахаар тохиролцсон байна.
Натланд Норвегиос Их Британид очсоныхоо хоёр хоногийн дараа Английн Хаддерсфилд хотын зочид буудалд цагдаа нарт баригджээ. Түүнийг баривчлах үед хоёр галт зэвсэг, сум хэрэгсэл илэрсэн байна. Түүний бай болох хүн хэн байсан нь мөрдөн шалгалтын явцад тогтоогдоогүй бөгөөд төлөвлөгөө хэрэгжихээс өмнө таслан зогсоосон гэж Британийн цагдаа мэдээлжээ.
Прокуроруудын үзэж буйгаар Натланд уг ажиллагааны зорилгыг мэдэж байсан бөгөөд зүгээр нэг хууртагдсан бус, санаатайгаар аллагын төлөвлөгөөнд оролцсон гэж нотолсон байна. Харин залуу анх мөнгөний төлөө саналыг хүлээж авсан ч үүнийг бодит хэрэг болно гэж ойлгоогүй, дараа нь татгалзахыг оролдсон гэж мэдүүлжээ. Гэвч тангарагтны шүүх түүний тайлбарыг хүлээн зөвшөөрөөгүй байна.
Мөрдөн байцаалтын мэдээллээр Натландыг Шведийн зохион байгуулалттай гэмт бүлэглэл болох Foxtrot Network-ийн гишүүд өсвөр насны зуучлагчаар дамжуулан элсүүлсэн байна. Тус бүлэглэл нь Европт хүчирхийллийн ажиллагаанд оролцдог бөгөөд Ираны эрх баригчидтай холбоотой байж болзошгүй гэж Их Британи, АНУ-ын талууд өмнө нь мэдэгдэж, хориг арга хэмжээ авч байжээ. Британийн терроризмын эсрэг албаныхан энэ хэргийг зөвхөн энгийн гэмт хэрэг бус, улс төрийн зорилготой олон улсын гэмт сүлжээтэй холбоотой байж болзошгүй гэж үзэж байна. Тэдний мэдээлснээр Foxtrot Network нь Европ дахь еврей болон Израильтай холбоотой байнуудын эсрэг халдлагатай холбогдож байсан гэх мэдээлэл бий.
Хэргийг зохион байгуулсан гэх гол этгээдийг "Generalen" гэх хочтой 17 настай этгээд гэж мөрдөн шалгах байгууллагууд тогтоосон байна. Тэрээр Норвегид өмнө нь хүн амины хэрэгт туслахыг завдсан хэргээр ял сонсож, 14 жилийн хорих ял авсан аж. Мөн өөр нэг 16 настай этгээд уг хэрэгт холбоотойгоор Норвегид шүүхийг хүлээж байна.
Натландын ял шийтгэлийг ирэх аравдугаар сард сонсох бөгөөд энэ хэрэг нь Европт өсвөр насныхныг ашиглан олон улсын гэмт ажиллагаа зохион байгуулж буй сүлжээнүүдийн талаар шинэ анхааруулга болж байна. Аюулгүй байдлын байгууллагууд гэмт бүлэглэлүүд цахим орчин, нийгмийн эмзэг байдлыг ашиглан залуусыг хүчирхийллийн ажиллагаанд татан оролцуулж байгааг онцолжээ.
Л.Баяр
