Африкийн эргээс Европ руу чиглэсэн цагаачдын урсгал дахин эрчимжиж, Испанийн Сеута автономит хотод томоохон хилийн хямрал үүсээд байна. Мароккогоос мянга мянган хүн Испанийн нутаг дэвсгэрт нэвтэрч байна. Тэдний зарим нь далайгаар сэлж, зарим нь хилийн хамгаалалтын байгууламжийг даван орсон байна.

Африкийн хойд эрэгт орших боловч Испанийн харьяанд байдаг Сеута хот нь Европын холбооны нутаг дэвсгэрт хүрэхийг хүссэн цагаачдын гол гарцуудын нэг юм. Мароккогийн эргээс хэдхэн километрийн зайд оршдог энэ бүс нутаг нь олон жилийн турш Африк, Европыг холбосон хамгийн эмзэг хилийн бүсүүдийн нэг байсаар ирсэн.

Испанийн хэвлэлүүдийн мэдээлснээр, энэ удаагийн үйл явдлын үеэр 2000-3000 орчим хүн Сеута руу нэвтэрсэн байж болзошгүй байна. Олон хүн далайн эргийн хамгаалалтыг ашиглан усан замаар хил давсан бол зарим нь хуурай газрын хилийн хаалт руу олноороо дайрчээ. Испанийн хилийн алба нөхцөл байдлыг хяналтад авахын тулд нэмэлт хүч дайчилсан байна. Испанийн Засгийн газар Сеутад цагдаа, аюулгүй байдлын хүч нэмэгдүүлж, орон нутгийн удирдлагуудтай хамтран цагаачдыг бүртгэх, түр байрлуулах ажиллагааг эхлүүлжээ. Гэвч цагаачдын тоо богино хугацаанд огцом нэмэгдсэн нь орон нутгийн хүлээн авах төвүүдийн хүчин чадалд дарамт учруулсан байна.

Энэ үйл явдал хүний амь насны хохирол дагуулсан байна. Мароккогоос Сеута хүрэхийг оролдсон үеэр хэд хэдэн хүн далайд амиа алдсан бөгөөд аврагчид уснаас цогцос олсон талаар Испанийн тал мэдээлжээ. Олон цагаач аюултай нөхцөлд, завьгүйгээр эсвэл энгийн хөвөгч хэрэгслээр далай гатлахыг оролддог нь ийм эрсдэлийг нэмэгдүүлдэг байна.

Сеута болон Мелилья хотууд нь Африк тивд байрладаг ч Европын холбооны газар нутаг учраас цагаачдын хувьд Европ руу нэвтрэх “хаалга” гэж тооцогддог. Африкийн олон орны иргэд ядуурал, ажилгүйдэл, улс төрийн тогтворгүй байдал, мөргөлдөөнөөс зугтан эдгээр бүсээр дамжин Европт хүрэхийг зорьдог.

Испани болон Марокко сүүлийн жилүүдэд хууль бус цагаачлалтай тэмцэх чиглэлээр хамтран ажиллаж байгаа ч хоёр улсын харилцаанд үүссэн улс төрийн асуудлуудын үеэр хилийн хяналт сулрах тохиолдол гарч байжээ. 2021 онд мөн Сеута руу 8000 гаруй хүн богино хугацаанд нэвтэрсэн томоохон хямрал болж байсан юм.

Л.Баяр