Англид энэ зун урьд өмнө байгаагүй хуурайшилт, олон давтамжтай халалтын давалгаа нүүрлэж, усны нөөц багасахын зэрэгцээ ой хээрийн түймрийн эрсдэл эрс нэмэгдээд байна. Хуурай, халуун нөхцөл нь газар тариалан, байгаль орчин болон олон сая иргэний өдөр тутмын амьдралд дарамт учруулж эхэлжээ. Англи улс энэ зун дөрөв дэх удаагийн халалтын давалгаатай нүүр тулж байна. Зарим бүс нутагт агаарын температур 35 хэмээс давж, хур тунадас маш бага орсны улмаас хөрсний чийгийн хэмжээ түүхэн доод түвшинд хүрчээ. Цаг уурын нөхцөлөөс шалтгаалан ой, хээрийн түймэр гарах эрсдэл нэмэгдэж, гал сөнөөгчид олон бүс нутагт зэрэг ажиллаж байна.

Хамгийн ноцтой тохиолдлын нэг нь Английн зүүн хэсгийн Суффолк мужид гарсан томоохон түймэр байв. Далайн эргийн Дунвич Хит орчимд гарсан түймрийн улмаас олон зуун хүн нүүлгэн шилжүүлэгдэж, байгалийн хамгаалалттай бүс нутгууд шатжээ. Түймэр ойролцоох Sizewell B атомын цахилгаан станцын орчимд хүрсэн ч албаныхан станцын үйл ажиллагаанд аюул учраагүй гэж мэдэгдсэн байна.

Английн усны нөөцийн байдал мөн санаа зовоох хэмжээнд хүрчээ. Хур тунадас багассанаар гол мөрний усны түвшин буурч, усан сангуудын нөөц өмнөх жилүүдийн дунджаас доогуур болсон байна. Долоо хоногийн дотор Англид орсон хур тунадас урт хугацааны дунджаас ердөө хэдхэн хувьд хүрч, зарим бүсэд ус ашиглалтад хязгаарлалт тогтоожээ.

Одоогоор олон сая хүн усны хэрэглээгээ хязгаарлах зөвлөмж, хоригт хамрагдаад байна. Усны компаниуд цэцэрлэг услах, автомашин угаах зэрэг хэрэглээнд түр хугацааны хязгаарлалт тавьж, ган гачгийн нөхцөл удаан үргэлжилбэл илүү хатуу арга хэмжээ авахыг анхааруулжээ.

Мэргэжилтнүүдийн үзэж буйгаар, энэ жилийн нөхцөл байдал нь зөвхөн түр зуурын халалт бус, уур амьсгалын өөрчлөлтөөс үүдэлтэй цаг агаарын эрс тэс үзэгдлүүд нэмэгдэж байгаагийн нэг илрэл болж байна. Европ даяар Франц, Испани, Грек зэрэг орнууд мөн адил хүчтэй түймэртэй тэмцэж байгаа нь бүс нутгийн хэмжээнд хуурайшилт, халалтын асуудал хурцдаж байгааг харуулж байна.

Л.Баяр