АНУ Японы мөнгөн тэмдэгт болох иенийг дэмжих зорилгоор зах зээлээс иен худалдан авч, хоёр улсын хамтарсан валютын интервенц хийснээ албан ёсоор баталгаажууллаа. Энэ нь Вашингтон 2011 оноос хойш анх удаа Японтой хамтран валютын зах зээлд оролцож буй тохиолдол бөгөөд иенийн ханш сүүлийн 40 жилийн хамгийн доод түвшинд хүрсэнтэй холбоотойгоор хийгдсэн түүхэн алхам болж байна.

АНУ-ын Ерөнхийлөгч Дональд Трамп энэхүү арга хэмжээг "Японы төлөөх найрсаг дохио" хэмээн тодорхойлсон бөгөөд хоёр улсын санхүүгийн тогтвортой байдлыг хамгаалах нь дэлхийн эдийн засагт чухал ач холбогдолтой гэж мэдэгджээ. Харин Японы Сангийн яам валютын зах зээлд гарсан хэт савлагааг зогсоохын тулд АНУ-ын Сангийн яамтай хамтран ажилласнаа баталсан байна.

Сүүлийн саруудад иен ам.долларын эсрэг 40 жилийн хамгийн сул ханшид хүрээд байсан юм. Үүнд Япон, АНУ-ын бодлогын хүүгийн зөрүү, Японы импортын эрчим хүчний өртөг огцом өссөн, хөрөнгө оруулагчдын ам.доллар руу шилжсэн урсгал зэрэг хүчин зүйлс нөлөөлжээ. Зах зээлийн шинжээчдийн үзэж буйгаар иенийн сулрал нь Японд импортын бараа, хүнс, шатахууны үнийг өсгөж, инфляцыг улам нэмэгдүүлж байна.

Хамтарсан интервенцийн дараа валютын зах зээлд иен огцом чангарч, ам.долларын ханш богино хугацаанд мэдэгдэхүйц буурсан байна. Энэ нь 1998 оноос хойших хамгийн онцгой хамтарсан валютын ажиллагаануудын нэг гэж эдийн засагчид үнэлж байгаа юм.

Гэсэн ч олон шинжээч урт хугацаанд зөвхөн зах зээлийн интервенц хангалтгүй гэж үзэж байна. Японы Төв банк бодлогын хүүгээ бага түвшинд хадгалсаар байгаа бөгөөд АНУ өндөр хүүгийн бодлогоо үргэлжлүүлбэл иен дахин сулрах эрсдэл хэвээр үлдэнэ гэж тэд анхааруулжээ. Тиймээс Токио цаашид бодлогын хүүгээ өсгөх эсэх нь валютын ханшийн ирээдүйд хамгийн их нөлөөлөх хүчин зүйл гэж үзэж байна.

Японы Сангийн сайд Сацүки Катаяма шаардлагатай гэж үзвэл АНУ-тай дахин хамтран валютын зах зээлд интервенц хийхэд бэлэн гэдгээ мэдэгдсэн бөгөөд зах зээлийн эмх замбараагүй хөдөлгөөнийг хүлээн зөвшөөрөхгүй гэсэн хатуу байр сууриа илэрхийлжээ.

Л.Баяр