Пакистаны баруун хойд нутгийн Хайбер-Пахтунхва мужид болсон амиа золиослогч халдлагын улмаас 14 хүн амиа алдаж, 20 гаруй хүн шархаджээ. Халдлага нь зэвсэгт бүлэглэлийн эсрэг жагсаалын үеэр болсон байна. Орон нутгийн албаныхны мэдээлснээр, наймдугаар сарын 2-нд Свотын хөндийн Кабал хотод болсон тайван жагсаалын үеэр амиа золиослогч этгээд олон хүний дунд тэсрэх төхөөрөмж дэлбэлжээ. Тус жагсаалд оролцогчид бүс нутагт идэвхжиж буй зэвсэгт бүлэглэлүүдийн эсрэг байр сууриа илэрхийлж, энх тайван тогтоохыг шаардаж байсан аж.

Дэлбэрэлтийн улмаас энгийн иргэд болон цагдаагийн алба хаагчид голлон өртсөн бөгөөд амь үрэгдэгсдийн дунд цагдаа нар байсан гэж мэдээлжээ. Шархадсан хүмүүсийг ойролцоох эмнэлгүүдэд хүргэн яаралтай тусламж үзүүлж байгаа бөгөөд заримынх нь биеийн байдал хүнд байгаа талаар эх сурвалжууд мэдээлсэн байна.

Халдлагын хариуцлагыг одоогоор ямар нэгэн бүлэглэл албан ёсоор хүлээгээгүй байна. Гэхдээ Пакистаны эрх баригчид сүүлийн жилүүдэд тус бүс нутагт идэвхжсэн Пакистаны Талибан хөдөлгөөн (Tehrik-e-Taliban Pakistan, TTP)-ийг сэжиглэж байгаа аж. Тус бүлэглэл болон Афганистаны Талибан засгийн газар энэ төрлийн халдлагад холбоотой гэх мэдэгдлүүдийг өмнө нь няцааж байсан юм.

Хайбер-Пахтунхва муж нь Афганистантай хил залгаа, олон жилийн турш зэвсэгт мөргөлдөөн, терроризмын голомт байсаар ирсэн бүс нутаг юм. Свотын хөндийд 2000-аад оны сүүлээр зэвсэгт бүлэглэлүүд хүчээ авч байсан ч Пакистаны армийн томоохон ажиллагааны дараа хяналтаа алдсан. Гэсэн ч сүүлийн жилүүдэд дахин халдлага нэмэгдэж, орон нутгийн иргэд аюулгүй байдлын асуудлаар удаа дараа жагсаал зохион байгуулах болсон байна.

Пакистаны Ерөнхийлөгч Асиф Али Зардари болон Ерөнхий сайд Шехбаз Шариф халдлагыг буруушааж, терроризмын эсрэг тэмцлээ үргэлжлүүлэхээ мэдэгдсэн байна. Энэ халдлага нь Пакистан улсад сүүлийн үед нэмэгдэж буй зэвсэгт хүчирхийллийн шинэ жишээ болж байна. Хил орчмын бүс нутгуудад аюулгүй байдлын нөхцөл байдал хурцадсаар байгаа нь Исламабад болон Кабулын харилцаанд ч шинэ зөрчил үүсгэж байна.

Л.Баяр