Япон улс шинэ батлан хамгаалахын цагаан номоо танилцуулж, Зүүн Азийн аюулгүй байдлын орчин сүүлийн жилүүдэд эрс өөрчлөгдөж, Хятад, Орос, Хойд Солонгосын цэргийн чадавх нэмэгдэж байгаа нь улсынхаа аюулгүй байдалд томоохон сорилт болж байна гэж дүгнэжээ. Японы Батлан хамгаалах яамны боловсруулсан тайланд бүс нутагт хүчний тэнцвэр өөрчлөгдөж, урьд өмнө байгаагүй тодорхой бус байдал бий болсон гэж тэмдэглэсэн байна. Тэр дундаа Хятадын цэргийн шинэчлэл, тэнгисийн болон агаарын хүчний өргөжилт, Тайванийн асуудлаарх Бээжингийн байр суурь Токиогийн хамгийн их анхаарал хандуулж буй асуудлын нэг болжээ.

Тайланд Хятад улс сүүлийн жилүүдэд батлан хамгаалах салбарын хөрөнгө оруулалтаа эрчимтэй нэмэгдүүлж, алсын тусгалтай пуужин, нисэх онгоц тээгч хөлөг, орчин үеийн тэнгисийн цэргийн техник хэрэгслээ хөгжүүлж байгааг онцолсон байна. Япон улс ялангуяа Зүүн Хятадын тэнгис дэх маргаантай бүс нутаг болон Японы баруун өмнөд арлуудын ойролцоох Хятадын цэргийн идэвхийг анхааралтай ажиглаж байгаа аж.

Мөн Оросын Украинд хийж буй дайн болон Москвагийн Ази, Номхон далайн бүс дэх цэргийн үйл ажиллагаа Японы аюулгүй байдлын бодлогод нөлөөлж байна гэжээ. Орос, Хятад хоёрын хамтарсан цэргийн сургуулилалт, стратегийн хамтын ажиллагаа нэмэгдэж байгаа нь бүс нутгийн хүчний харьцаанд өөрчлөлт авчирч болзошгүй гэж Токио үзэж байна.

Үүнээс гадна Хойд Солонгосын цөмийн зэвсэг, баллистик пуужингийн хөтөлбөрийг Япон улс ноцтой аюул гэж тодорхойлжээ. Пхеньян сүүлийн жилүүдэд пуужингийн туршилтаа нэмэгдүүлж, Оростой харилцаагаа өргөжүүлж байгаа нь бүс нутгийн тогтвортой байдалд эрсдэл учруулж байна гэж тайланд дурдсан байна.

Япон улс ирээдүйн аюул заналхийлэлд бэлэн байхын тулд батлан хамгаалах чадавхаа эрчимтэй шинэчилж эхэлжээ. Үүнд алсын тусгалтай пуужин, нисгэгчгүй төхөөрөмж, хиймэл оюун ухаанд суурилсан цэргийн технологи, кибер хамгаалалтын системийг хөгжүүлэх асуудал багтаж байна.

Дэлхийн хоёрдугаар дайны дараа цэргийн хүч хэрэглэхийг хязгаарласан бодлого баримталж ирсэн Япон сүүлийн жилүүдэд батлан хамгаалах салбарын төсвөө нэмэгдүүлж, АНУ болон бүс нутгийн түншүүдтэй хамтын ажиллагаагаа өргөжүүлж байна. Токиогийн шинэ байр суурь нь Зүүн Азид геополитикийн өрсөлдөөн улам ширүүсч байгааг харуулж байна. Япон улс өөрийн нутаг дэвсгэрийн аюулгүй байдлыг хангахын зэрэгцээ бүс нутгийн тогтвортой байдлыг хадгалах зорилгоор цэргийн болон дипломат бодлогоо шинэ шатанд гаргаж байна.

Л.Баяр