Зүүн Азийг дайрсан түүхэн халуун агаарын давалгаа хүн төдийгүй амьтдад ч ноцтой нөлөөлж байна. Японд Токиогийн Тама амьтны хүрээлэнгийн гурван эм арслан хэт халалтын улмаас амиа алдсан бол Өмнөд Солонгост агаарын температур 40 хэмийг давж, эрх баригчид иргэдийг гадаа ямар ч үйл ажиллагаа явуулахгүй байхыг анхааруулжээ.

Токиогийн Тама амьтны хүрээлэнгийн мэдээлснээр 3, 11, 15 настай гурван эм арслан долдугаар сарын сүүлээс наймдугаар сарын эхний өдрүүдэд дараалан үхсэн байна. Задлан шинжилгээгээр тэд бүгд хүчтэй шингэн алдалт, олон эрхтний дутагдалд орсон нь илэрсэн бөгөөд үхлийн шалтгааныг хэт халалттай холбоотой гэж үзэж байгаа аж. Энэ нь 1964 онд арслан үржүүлж эхэлснээс хойших анхны ийм тохиолдол болсон байна.

Долдугаар сарын дунд үеэс Токио орчимд агаарын температур 39 хэмд хүрсний дараа тус хүрээлэнгийн 16 арслангийн 10 нь хоолондоо дургүй болох, хөдөлгөөн нь эрс багасах зэрэг шинж тэмдэг илэрч эмчилгээ хийлгэж эхэлжээ. Зарим нь эдгэрсэн ч гурван арслангийн биеийн байдал хүндэрч, улмаар амь насаа алдсан байна. Үлдсэн өвчтэй арслангуудад судсаар шингэн хийх, ус цацаж хөргөх зэрэг эмчилгээг үргэлжлүүлж байгаа бөгөөд арслангийн үзвэрийг түр хугацаанд хаажээ.

Мэргэжилтнүүдийн үзэж буйгаар, арслангууд Африкийн хуурай, халуун уур амьсгалд дасан зохицсон байдаг ч Японы өндөр чийгшилтэй халуун нь биеийн дулаанаа зохицуулахад илүү хүндрэл учруулдаг байна.

Үүний зэрэгцээ Өмнөд Солонгос ч урьд өмнө байгаагүй халуунтай нүүр тулжээ. Тус улсын өмнөд хэсгийн зарим хотод температур 40 хэмээс давж, цаг уурын алба "гадаах бүх үйл ажиллагааг нэн даруй зогсоох"-ыг иргэдэд зөвлөсөн байна. Эрх баригчид өндөр настан, хүүхэд зэрэг эмзэг бүлгийн иргэдийн аюулгүй байдлыг хангахын тулд хяналтаа чангатгаж, цахилгаан, усны хангамжийг хэвийн байлгах арга хэмжээ авч эхэлжээ.

Эрдэмтдийн үзэж байгаагаар Зүүн Азид энэ зуны хэт халалт цаг уурын өөрчлөлтийн нөлөөг улам тод харуулж байгаа бөгөөд хүнээс гадна зэрлэг амьтан, амьтны хүрээлэнгийн амьтдад ч урьд өмнө тохиолдож байгаагүй эрсдэл учруулж эхэлжээ.

Л.Баяр