Арабын Нэгдсэн Эмират Улс олон улсын зохион байгуулалттай гэмт хэргийн бүлэглэлийн толгойлогч хэмээн сэжиглэгддэг Ирландын иргэн Даниел Кинаханыг Ирландын эрх баригчдад шилжүүлэн өгчээ. 49 настай Кинахан өнгөрсөн дөрөвдүгээр сард Дубай хотод Ирландын баривчлах захирамжийн дагуу баривчлагдсан бөгөөд түүнийг гэмт хэргийн байгууллагыг удирдсан хэрэгт буруутгаж байгаа юм. Кинаханыг Ирландын Засгийн газрын онгоцоор Дубайгаас авч явж, Дублин хотод хүргэснийх нь дараа өндөр хамгаалалттайгаар тусгай эрүүгийн шүүхэд шилжүүлжээ. Тэрбээр тангарагтны шүүхгүйгээр зохион байгуулалттай гэмт хэрэгтэй холбоотой хэргийг хэлэлцдэг Ирландын "Special Criminal Court"-ийн өмнө очсон байна.

АНУ-ын эрх баригчид 2022 онд Даниел Кинаханыг Kinahan Organized Crime Group хэмээн нэрлэгддэг зохион байгуулалттай гэмт хэргийн бүлэглэлийн гол удирдагчдын нэг гэж тодорхойлж байжээ. Тус бүлэглэлийг хар тамхи, зэвсгийн хууль бус наймаа, мөнгө угаах зэрэг олон улсын гэмт хэрэгтэй холбон үздэг бөгөөд АНУ түүнийг баривчлахад хүргэх мэдээлэлд 5 сая ам.долларын шагнал хүртэл амласан юм.

Кинахан сүүлийн арав орчим жил Дубайд амьдарч байсан бөгөөд энэ хугацаанд боксын ертөнцөд ч нэр хүндтэй болжээ. Тэрээр боксын менежмент, сурталчилгааны чиглэлээр ажиллаж байсан ч түүнийг гэмт хэргийн бүлэглэлийн удирдагч гэх мэдээлэл олон жилийн турш дагалдсан байна. Шүүхийн үеэр Кинахан түүнд тавьсан гэмт хэргийн байгууллагыг удирдсан гэх ялыг ойлгосноо мэдэгдсэн байна. Түүнийг цагдан хорьж, Ирландын өндөр хамгаалалттай "Portlaoise Prison" шоронд шилжүүлжээ. Түүний дараагийн шүүх хурлыг аравдугаар сарын 5-нд хийхээр товлосон байна.

Ирландын эрх баригчид Кинаханыг эх оронд нь шилжүүлэн өгсөн явдлыг олон улсын зохион байгуулалттай гэмт хэрэгтэй тэмцэхэд гарсан чухал ахиц гэж үзэж байна. Тус ажиллагаа нь Ирланд болон АНЭУ-ын хууль сахиулах байгууллагуудын хамтын ажиллагааны үр дүнд хэрэгжсэн бөгөөд Кинаханыг олон жил эрэн сурвалжилж байсан ажиллагааны нэг чухал үе шат болжээ.

Гэхдээ Даниел Кинахан өөрт нь тавьсан гэмт хэргийн бүх буруутгалыг няцаасаар ирсэн. Түүний өмгөөлөгчид өмнө нь Кинахан ямар нэгэн гэмт хэрэгт ял шийтгүүлж байгаагүй бөгөөд түүнд тавьж буй буруутгалуудыг үгүйсгэж байсан юм.

Л.Баяр