Тайландын нийслэл Бангкок хотын ойролцоох Нонтхабури мужид 14 настай сурагч буудлага үйлдэж, найман хүн амиа алдсан хэрэг гарчээ. Хохирогчдын дунд сургуулийн таван ажилтан, сурагчийн өвөө, эмээ хоёр болон нэг сурагч багтаж байна. Халдлага үйлдсэн өсвөр насны хүү мөн амиа алджээ. Цагдаагийн мэдээлснээр, хэрэг наймдугаар сарын 7-ны өглөө эхэлжээ. Сэжигтэн эхлээд гэртээ байсан өвөө, эмээгээ буудан хөнөөсний дараа "Debsirin Nonthaburi School" руу очиж, сургуулийн орчинд гал нээсэн байна. Тэрээр эцэст нь өөрийгөө буудан хүнд шархдуулж, эмнэлэгт хүргэгдсэн боловч нас баржээ.

Халдлагын үеэр 20 гаруй хүн шархадсан бөгөөд хэд хэдэн хүүхдийн биеийн байдал хүнд байгаа талаар мэдээлсэн байна. Наймдугаар сарын 8-нд 12 настай охин шархаа даалгүй нас барснаар нас барагсдын тоо нэмэгджээ.

Мөрдөн шалгах ажиллагааны үеэр өсвөр насны хүүгийн хэрэглэж байсан буу нь түүний өвөөгийн нэр дээр бүртгэлтэй байсан нь тогтоогджээ. Мөн цагдаа нар түүний гэрээс галт зэвсэг, ашигласан сумны хонгио болон компьютер олсон байна. Хүү өмнө нь сургуульдаа BB буу авчирч байсан бөгөөд цахим орчинд хүчирхийлэл, буудлагатай холбоотой контент үздэг байсныг мөрдөгчид мэдээлжээ.

Хүүгийн ар гэрийнхэн түүнийг гаднаасаа хөгжилтэй, эелдэг хүүхэд байсан бөгөөд дээрэлхүүлж байсан гэх тодорхой шинж тэмдэг анзаараагүй гэж ярьсан байна. Харин Тайландын эрх баригчид сургуулийн дарамт, сэтгэл санааны байдал зэрэг хүчин зүйл халдлагад нөлөөлсөн эсэхийг шалгаж байгаа аж.

Энэ хэрэг Тайландад сүүлийн жилүүдэд гарсан хамгийн ноцтой сургуулийн буудлагын нэг болж байна. Тус улс иргэдийн эзэмшилд байгаа галт зэвсгийн тоо харьцангуй өндөртэй бөгөөд хууль бус бууны эргэлт ч асуудал хэвээр байгаа юм. Хэрэг гарсны дараа Тайландын Боловсролын яам сургуулиудын аюулгүй байдлыг нэмэгдүүлэх, сэтгэлзүйн үзлэг хийх, дээрэлхэлтийн эсрэг хөтөлбөр хэрэгжүүлэх, онцгой нөхцөл байдлын сургуулилтыг сайжруулах арга хэмжээ авахаар төлөвлөжээ.

Л.Баяр