Тупак Шакурын амийг хөнөөсөн хэрэгт буруутгагдаж буй гэмт хэргийн бүлэглэлийн хуучин удирдагч Дуэйн “Кифф Д” Дэвисийн шүүх хурал АНУ-ын Невада мужийн Лас-Вегас хотод эхэлж байна. 1996 онд болсон энэхүү аллага 30 жилийн турш бүрэн шийдэгдээгүй хэвээр байгаа бөгөөд Дэвис уг хэрэгтэй холбоотой ял сонссон буй цорын ганц хүн юм. 63 настай Дэвисийг 1996 оны есдүгээр сарын 7-нд Лас-Вегаст буудуулсан Тупак Шакурын амь насыг хөнөөсөн халдлагыг зохион байгуулсан гэж прокурорууд үздэг. Тэрбээр өөрийгөө гэм буруугүй хэмээн мэдэгдэж байгаа бөгөөд хүн амины хэрэгт, мөн гэмт хэргийн бүлэглэлийн үйл ажиллагааг дэмжсэн зорилготойгоор үхлийн аюултай зэвсэг ашигласан гэх зүйл ангиар яллагдаж байгаа юм.

Тупак тухайн үед "Death Row Record"s-ын үүсгэн байгуулагч Марион “Сүж” Найттай хамт хар өнгийн BMW автомашинаар явж байжээ. Тэд "MGM Grand" казино дахь Майк Тайсоны боксын тоглолтоос гарч явах үед нь цагаан өнгийн "Cadillac" автомашин хажууд нь ирж, гал нээсэн байна. Тупак хэд хэдэн суманд оногдож, зургаан хоногийн дараа буюу есдүгээр сарын 13-нд 25 насандаа шархаа даалгүй нас барсан юм.

Прокуроруудын үзэж буйгаар энэ халдлага нь Тупак болон Дэвисийн төрсөн дүүгийн хүү Орландо “Baby Lane” Андерсоны хооронд "MGM Grand"-д болсон зодооны дараах өшөө авалт байсан аж. Тэр орой Тупак болон түүний хамтрагчид Андерсонтой зодолдсон бөгөөд үүний дараа буудалцаан болсон гэж мөрдөн шалгах байгууллагууд үздэг. Андерсон өөрөө 1998 онд амиа алдсан тул Тупакийн алуурчин гэж албан ёсоор яллагдаж байгаагүй юм. Дэвисийг прокурорууд буу барьж Тупакийг буудсан хүн гэж буруутгаагүй. Харин түүнийг халдлагыг зохион байгуулж, бууг буудсан хүмүүст өгсөн гэж үзэж байна. Невадагийн хуулиар хүн өөрөө гох дарсан байх албагүй бөгөөд хүн амины хэргийг зохион байгуулах, хэрэгжүүлэхэд тусалсан нь тогтоогдвол хариуцлага хүлээх боломжтой аж.

Энэ хэргийг дахин сөхөхөд Дэвисийн өөрийнх нь олон жилийн өмнө хийсэн мэдэгдлүүд гол үүрэг гүйцэтгэсэн. Тэрбээр 2018 оноос эхлэн ярилцлагуудаар хэргийн талаар ярьж, 2019 онд “Compton Street Legend” нэртэй дурсамжийн ном хамтран бичсэн байна. Тус номд Дэвис тухайн шөнө машинд байсан бөгөөд Тупакийн амийг хөнөөсөн бууг олж авч, машины арын хэсэгт буудсан этгээдэд өгсөн тухай өгүүлдэг. Гэхдээ тэр өөрөө гох дарсан гэж хэзээ ч хэлээгүй.

Харин Дэвисийн өмгөөлөгчид түүний өмнөх ярилцлага болон номыг шүүхийн нотлох баримтаар ашиглахыг эсэргүүцэж байгаа. Тэд Дэвисийн хэлсэн зүйлсийг хэтрүүлсэн, номыг борлуулахын тулд зохиомол байдлаар бичсэн гэж маргаж байна. Гэсэн ч шүүгч түүний 2008 оны мэдүүлэг болон дурсамжийн номыг шүүх хуралд ашиглах боломжтой гэж шийдвэрлэсэн юм.

Тупакийн хэрэг дэлхийн хөгжмийн түүхэн дэх хамгийн алдартай шийдэгдээгүй аллагуудын нэг болсон. Түүний үхэл хип-хоп хөгжмийн ертөнцөд асар том цохилт болсон төдийгүй Тупак, The Notorious B.I.G. нарын хоорондын өрсөлдөөн, тухайн үеийн East Coast–West Coast хип-хопын зөрчилтэй холбогдох олон таамаг бий болгосон юм.

Шүүх хурлын явцад 35-45 орчим гэрч дуудагдаж болзошгүй бөгөөд хэрэг дөрвөөс зургаан долоо хоног үргэлжлэх төлөвтэй байна. Тупактай хамт явж байсан бөгөөд буудалцааны үеэр өөрөө шархадсан Сүж Найт энэ хэргийн хамгийн чухал амьд гэрчүүдийн нэг байж болох ч одоогоор түүнийг шүүхэд мэдүүлэг өгөх эсэх нь тодорхойгүй байна. 

Ингэснээр Тупак Шакурын амийг хөнөөсөн хэргийг бараг 30 жилийн дараа шүүхээр эцэслэн шийдэх боломж нээгдэж байна. Гэхдээ энэ шүүх хурал яг хэн Тупак руу галт зэвсгээр буудсаныг тогтоохоос илүүтэй, Дэвис тухайн аллагыг зохион байгуулсан эсэхэд төвлөрөх төлөвтэй байна. 

Л.Баяр