Канадын Виктория хотоос Монреаль руу нисэхээр төлөвлөж байсан нислэг нэгэн хүүхэд суудлын хамгаалалтын бүсээ зүүхээс татгалзсаны улмаас цуцлагджээ. Нислэгийн үеэр хүүхэд хамгаалалтын бүсээ зүүхгүй байсан тул нисэх багийнхан болон эцэг эх нь түүнээр шаардлагыг биелүүлэхийг оролдсон ч үр дүнд хүрээгүй байна. Агаарын тээврийн дүрэм журмын дагуу зорчигчид, тэр дундаа хүүхэд хөөрөх болон буух үед хамгаалалтын бүсээ заавал зүүх ёстой байдаг. 

Улмаар нисгэгч онгоцыг нислэгээ үргэлжлүүлэх боломжгүй гэж үзэн тухай хүүхэд болон эцэг эхийг нь онгоцноос буулгах шийдвэр гаргажээ.  Гэвч энэ үед нөхцөл байдал бүр ч хүндрэв.

Учир нь тухайн нислэг оройн сүүлчийн нислэг байсан бөгөөд онгоц буцаж ирэх үед Викториягийн нисэх буудлын шөнийн нислэгийн хязгаарлалт эхэлсэн байх байжээ. Тиймээс зорчигчдыг буулгасны дараа нислэгийг дахин хөөргөх боломжгүй болж, улмаар бүх нислэгийг цуцлахаас өөр аргагүй болсон байна.

Ингэснээр ганц хүүхэд хамгаалалтын бүсээ зүүхээс татгалзсан үйл явдал хэдэн зуун зорчигчийн аяллыг тасалдуулсан байна. Зорчигчид нислэг цуцлагдсаны улмаас өөр нислэгт шилжих, аяллын төлөвлөгөөгөө өөрчлөх шаардлагатай болжээ.

Энэ явдал цахим орчинд багагүй шүүмжлэл дагуулж, “нэг хүүхдийн зөрүүдлэлээс болж бүхэл бүтэн нислэг цуцлагдах ёстой байсан уу?” гэсэн асуултыг хүмүүс тавьж байна. Харин нисэхийн аюулгүй байдлын үүднээс хүүхэд хамгаалалтын бүс зүүхээс татгалзсан нөхцөлд нислэгийг хөөргөх боломжгүй байдаг бөгөөд нисэх багийнхан дүрмийг зөрчих эрхгүй юм.

Л.Баяр