АНУ-ын Ерөнхийлөгч Дональд Трампын хэвлэлийн нарийн бичгийн дарга Каролайн Левитт энэ сарын эцсээр албан тушаалаасаа буухаар болжээ. Тэрбээр гэр бүл, бага насны хүүхдүүддээ илүү их цаг зарцуулахын тулд ийм шийдвэр гаргасан байна. Трамп наймдугаар сарын 12-нд олон нийтийн сүлжээндээ Левиттийг Цагаан ордны өөрийнх нь “хамгийн итгэлтэй туслахуудын нэг” хэмээн тодорхойлж, ажлаа орхих шийдвэрийг нь бүрэн ойлгож, хүндэтгэж байгаагаа илэрхийлжээ.
Тэрбээр мөн Левитт цаашид өөрийнх нь гадаад зөвлөхүүдийн нэгээр ажиллаж, Бүгд найрамдах намын хүрээнд нөлөө бүхий дуу хоолой хэвээр үлдэнэ гэж мэдэгдсэн байна. Тухайлбал, 2026 оны завсрын сонгуулийн кампанит ажилд Трампын хөдөлгөөнийг дэмжихэд оролцох төлөвтэй байна. 28 настай Левитт Цагаан ордны түүхэн дэх хамгийн залуу хэвлэлийн нарийн бичгийн дарга юм. Тэрээр Трампын хоёр дахь бүрэн эрхийн хугацаа эхэлсэн 2025 оны нэгдүгээр сараас энэ албыг хашиж ирсэн. Мөн тэрээр тус албан тушаалыг хашиж байхдаа жирэмсэн болсон анхны хэвлэлийн нарийн бичгийн дарга болсон юм.
Левитт саяхан хоёр дахь хүүхдээ төрүүлсний дараа жирэмсний амралтаасаа ажилдаа эргэн ирээд байсан. Түүний охин Вивиана тавдугаар сарын 1-нд төрсөн бөгөөд Левитт долдугаар сарын дундуур Цагаан ордны хэвлэлийн танхимд эргэн ирж, анхны хэвлэлийн хурлаа хийсэн юм. Тэр үед нөхөр нь хоёр настай хүү болон нярай охиноо гэртээ харж байгаа талаар ярьж байжээ. Левитт огцрох шийдвэрээ “сэтгэл хөдлөм, амаргүй шийдвэр” хэмээн тодорхойлж, ажил болон эх хүний үүргээ зэрэг авч явах нь хүнд байсныг дурдсан байна. Тэрбээр Цагаан ордонд ажилласан хугацааг амьдралынхаа хамгийн том нэр төрийн хэрэг, адал явдал байсан хэмээн үнэлжээ.
Левитт Трампын улс төрийн карьерын ойрын хүрээлэлд удаан хугацаанд ажилласан нэгэн. Тэрээр Трампын анхны засаг захиргаанд ажиллаж, улмаар 2024 оны дахин сонгогдох кампанит ажилд хэвлэлийн төлөөлөгчөөр ажилласан. Мөн 2022 онд Нью-Хэмпшир мужийг төлөөлөн Конгресст нэр дэвшсэн ч сонгогдож чадаагүй байна.
Түүний хэвлэлийн нарийн бичгийн даргаар ажилласан хугацаанд Цагаан ордон хэвлэл мэдээллийн уламжлалт байгууллагуудаас гадна консерватив болон дижитал хэвлэлүүдэд илүү их анхаарал хандуулж байсан. Левитт мөн Трампын бодлого, байр суурийг хэвлэлийн хурлуудаар тууштай хамгаалдаг гэдгээрээ танигдсан. Энэ арга барил нь түүнийг Трампын үнэнч холбоотон болгосон ч хэвлэлийн эрх чөлөө болон сэтгүүлчидтэй харилцах харилцааны талаар шүүмжлэл дагуулж байв.
Л.Баяр
