Сирийн шүүх ерөнхийлөгч асан Башар аль-Асадынхаа эсрэг цаазаар авах ял оноосон байна. Шүүхийн шийдвэрийг Асад өөрөө байлцаагүй нөхцөлд буюу эзгүйд нь гаргажээ. Сирийг олон жил удирдсан Асад 2024 оны арванхоёрдугаар сард засгийн эрхээсээ түлхэгдэн унасныхаа дараа ОХУ руу дүрвэсэн юм. Түүний дэглэм олон арван жилийн турш улс төрийн сөрөг хүчнийг хүчээр дарах, хүний эрхийг ноцтой зөрчих, энгийн иргэдийн эсрэг хүчирхийлэл үйлдэх зэрэг олон хэрэгт буруутгагдаж ирсэн.

Шүүхийн шийдвэр нь Асадын засаглалын үед гарсан хүний эрхийн зөрчил, тэр дундаа хоригдлуудыг эрүүдэн шүүсэн, улс төрийн өрсөлдөгчдийг хэлмэгдүүлсэн гэх хэргүүдтэй холбоотой байна.

Асад Сирийн эрх мэдлийг 2000 онд эцэг Хафез аль-Асадаас өвлөн авч олон жил төр барьсан. 2011 онд засгийн газрын эсрэг өрнөсөн бослого иргэний дайн болон өргөжиж, олон улсын байгууллагуудын тооцоолсноор олон зуун мянган хүн амь үрэгдэж, сая сая сиричүүд орон гэрээ орхин дүрвэсэн юм.

Асадын дэглэмийг ОХУ болон Иран олон жилийн турш дэмжиж байсан. Харин сөрөг хүчний зэвсэгт бүлэглэлүүд 2024 оны сүүлээр Дамаскийг эзлэн авснаар Асадын 24 жилийн засаглал эцэслэсэн.

Асад ОХУ-д орогнол авсан бөгөөд Москва түүнийг Сирийн шинэ эрх баригчдад шилжүүлэн өгөх эсэх нь тодорхойгүй хэвээр байна. Тиймээс шүүхийн цаазаар авах ял нь одоогоор бодитоор хэрэгжих боломжгүй нөхцөлд байна. Сирийн шинэ эрх баригчдын хувьд Асад болон түүний дэглэмийн үед үйлдэгдсэн гэх гэмт хэргүүдэд хариуцлага тооцох нь улс төрийн болон хууль зүйн гол асуудлуудын нэг болоод байна.

Л.Баяр