Украин ОХУ-ын баллистик пуужингийн довтолгооноос хамгаалах хамгийн чухал зэвсгийн нэг болох АНУ-ын "Patriot" агаарын довтолгооноос хамгаалах системийн сөнөөгч пуужингийн ноцтой хомсдолд оржээ. Украины зарим "Patriot" харвагч пуужингүй болсон бөгөөд Киевийн ойролцоох нэгэн байрлалд байсан системийг хамгийн сүүлд ойролцоогоор 10 долоо хоногийн өмнө ашигласан байна. "Patriot" систем нь Украины агаарын хамгаалалтын гол тулгуурын нэг. Ялангуяа ОХУ-ын баллистик пуужингуудаас Киев болон бусад томоохон хот, эрчим хүчний байгууламжийг хамгаалахад чухал үүрэг гүйцэтгэдэг. Гэвч системийг ажиллуулах сөнөөгч пуужин хүрэлцэхгүй бол харвагч төхөөрөмжүүд байгаа ч бодит хамгаалалтын хүчин чадал нь эрс буурдаг.

Украины Ерөнхийлөгч Владимир Зеленский CNN-д өгсөн ярилцлагадаа, АНУ-ын одоогийн "Patriot" пуужингийн нөөцийн ердөө 5 хувийг Украинд нийлүүлэхэд тус улс өвлийг давах боломжтой гэж мэдэгдсэн тухай бид өмнө нь мэдээлсэн. Харин Украины өөрийн нөөц үүнээс ч бага, ойролцоогоор 1 хувьтай тэнцэх хэмжээнд хүрсэн байна. Энэ нөхцөл байдал ОХУ баллистик болон хэт авиан пуужингийн хэрэглээгээ нэмэгдүүлж буй үетэй давхцаж байна. Украины тагнуулын мэдээллээр, ОХУ 2026 оны долдугаар сард 198 баллистик болон хэт авиан пуужин харвасан бөгөөд Москва сард ойролцоогоор 60 баллистик пуужин үйлдвэрлэх боломжтой гэж Украины тал үзэж байна.

Ийнхүү Оросын пуужингийн довтолгоо нэмэгдэж, Украины хамгаалалтын пуужингийн нөөц буурч байгаа нь Киевийн хувьд өвөл эхлэхээс өмнө шийдвэрлэх шаардлагатай томоохон асуудал болоод байна. Өвлийн улиралд Орос Украины эрчим хүчний дэд бүтцэд дахин хүчтэй цохилт өгөх магадлалтай гэж Киев үзэж байгаа юм. 

Украин энэ нөхцөл байдлыг шийдвэрлэхийн тулд АНУ болон Европын холбоотнуудаасаа "Patriot"-ийн "PAC-3" төрлийн пуужин нийлүүлэхийг хүсэж байна. Мөн Испани, Грек зэрэг "Patriot" системтэй орнуудаас пуужингийн нөөцөө хуваалцах хүсэлт тавьжээ.

Гэвч асуудал зөвхөн Украины нөөцөөр хязгаарлагдахгүй. АНУ болон Европын холбоотнуудын өөрсдийн "Patriot" пуужингийн нөөц ч хязгаарлагдмал байгаа. АНУ-ын Ойрх Дорнод дахь цэргийн ажиллагаа болон Ирантай холбоотой мөргөлдөөнүүдийн үеэр пуужингийн хэрэглээ нэмэгдсэн нь нийлүүлэлтийн асуудлыг улам хүндрүүлсэн байна.

Украины тооцоолсноор өвлийн шинэ довтолгоонуудыг үр дүнтэй сөрөхийн тулд дор хаяж 300 PAC-3 пуужин шаардлагатай. Энэ нь Украинд агаарын хамгаалалтаа хадгалахад гадаадын цэргийн тусламж ямар чухал болохыг харуулж байна.

Л.Баяр