ОХУ-ын сөрөг хүчний нэр нөлөө бүхий улс төрч, “Яблоко” намын дэд дарга Лев Шлосбергийг Украинд явуулж буй дайныг эсэргүүцэж, Оросын армийг шүүмжилсэн хэргээр 11 жил нэг сарын хорих ял оноолоо. Псков хотын шүүх түүнийг Оросын зэвсэгт хүчнийг “гутаан доромжилсон”, мөн цэргийн ажиллагааны талаар “худал мэдээлэл” тараасан гэм буруутайд тооцжээ. Шлосберг өөрт нь тавьсан бүх хэргийг үндэслэлгүй бөгөөд улс төрийн зорилготой гэж үзэж, гэм буруугаа хүлээгээгүй байна.
63 настай Шлосберг нь 2022 онд ОХУ Украинд бүрэн хэмжээний довтолгоо эхлүүлснээс хойш дайныг ил тод эсэргүүцсээр ирсэн цөөн улс төрчдийн нэг юм. Тэрбээр дайныг зогсоож, гал зогсоохыг удаа дараа уриалж байжээ.
Түүнийг яллах болсон нэг үндэслэл нь 2022 онд Telegram сувгаар “Түүний цус... түүний гарт” гэсэн гарчигтай, Украины шархадсан эмэгтэй болон Владимир Путины зургийг нийтэлсэн материалыг дахин хуваалцсан явдал байв. Мөн нэгэн хэлэлцүүлгийн үеэр Украины дайныг “цуст шатар” хэмээн тодорхойлж, зогсоохыг уриалсан байна.
Шлосберг шүүхийн эцсийн үгэндээ Орос улс сүүлийн 30 жилийн хугацаанд эрх чөлөөний найдвараас хүний болон иргэний эрх, эрх чөлөөг бараг бүрэн устгах зам руу орсон гэж мэдэгджээ. Тэрбээр дайны жинхэнэ хохирлын тоо хэзээ нэгэн цагт ил болно гэжээ.
Түүний харьяалагддаг “Яблоко” нам шүүхийн шийдвэрийг “зэрлэг балмад ял” хэмээн нэрлэж, давж заалдахаа мэдэгдсэн байна. Тус намын зүгээс Шлосбергийг эх орноо хайрлаж, гал зогсоохыг уриалсных нь төлөө шийтгүүлсэн гэж үзжээ. Шлосбергийн хэрэг нь Кремль дайныг шүүмжилсэн дуу хоолойг дарах бодлогоо улам эрчимжүүлж байгааг харуулсан үйл явдал болж байна. ОХУ-ын эрх баригчид 2022 онд Украинд халдсаны дараа армийг шүүмжлэх, дайны талаарх засгийн газрын байр суурьтай зөрсөн мэдээлэл түгээхийг эрүүгийн хариуцлагатай болгосон хууль баталсан юм.
Түүнчлэн ОХУ-ын Дээд шүүх “Яблоко” намыг ирэх есдүгээр сард болох парламентын сонгуульд оролцуулахгүй гэсэн өмнөх шийдвэрээ хэвээр үлдээжээ. Тус нам нь ОХУ-д дайныг ил тод эсэргүүцдэг цорын ганц бүртгэлтэй улс төрийн нам юм. Хүний эрхийн Amnesty International байгууллага Шлосбергийн ялыг буруушааж, түүнийг энх тайвны төлөө байр сууриа илэрхийлснийх нь төлөө хэлмэгдүүлсэн хэрэг гэж үзээд нэн даруй суллахыг Оросын эрх баригчдад уриалжээ.
Л.Баяр
