АНУ-ын Ерөнхийлөгч Дональд Трампын засаг захиргаа өндөр ур чадвартай гадаадын ажилтнуудад олгодог H-1B визийн хөтөлбөртөө тавигдах санхүүгийн шаардлагыг чангатгах шинэ арга хэмжээг хэлэлцэж байна. H-1B виз нь АНУ-ын технологи, инженерчлэл, эрүүл мэнд зэрэг салбарт өндөр ур чадвартай гадаадын иргэдийг ажиллуулахад өргөн ашиглагддаг визийн төрөл юм.

Трампын засаг захиргаа өмнө нь H-1B визийн өргөдөлд 3 мянган ам.долларын төлбөр ногдлуулдаг байсан бол одоо үүнийг 100 мянган ам.долларт тулгасан нь шүүмжлэл дагуулж байна. Үүнийгээ гадаад ажиллах хүчнээс илүүтэй америк ажилчдыг ажиллуулахыг компаниудад түлхэц өгөх зорилготой хэмээн тайлбарлаж байгаа юм.

Гэвч уг бодлого технологийн салбарын компаниуд, жижиг бизнесүүдэд ихээхэн дарамт учруулж болзошгүй гэсэн шүүмжлэл гарсан. Ялангуяа жижиг компаниуд том технологийн корпорациудтай адил хэмжээний төлбөр төлөх боломжгүй учраас H-1B ажилтан авах боломж нь хумигдана гэсэн болгоомжлол бий.

CNN-ийн мэдээлснээр тэд үүгээр зогсохгүй хууль ёсны цагаачлалын бусад сувгуудад ч санхүүгийн өндөр босго тавих боломжийг судалж байна. Тухайлбал, АНУ-д суралцсан олон улсын оюутнууд төгссөнийхөө дараа тус улсад үлдэж ажиллах боломж олгодог OPT хөтөлбөрт өндөр төлбөр ногдуулах хувилбар ч яригдаж байна. Трампын засаг захиргаа эдгээр өөрчлөлтийг АНУ-ын хөдөлмөрийн зах зээлийг хамгаалах, гадаад ажиллах хүчний хэт хамаарлыг бууруулах арга хэмжээ гэж үзэж байгаа бол шүүмжлэгчид энэ нь дэлхийн шилдэг оюутан, инженер, мэргэжилтнүүдийг АНУ-аас холдуулах эрсдэлтэй гэж анхааруулж байна.

H-1B визийн хөтөлбөрт жил бүр хязгаарлагдмал тооны виз олгодог бөгөөд өмнөх жилүүдэд эдгээр визийн ихэнхийг Энэтхэгийн иргэд авч ирсэн байна. 

Л.Баяр