Пакистаны нийслэл Исламабад хотын төрийн өмчит томоохон эмнэлэгт лхагва гаргийн өглөө гал гарсны улмаас 14 нярай амиа алдсан байна. Тус улсын Ерөнхий сайд Шехбаз Шариф болсон явдлыг яаралтай шалгахыг холбогдох байгууллагуудад үүрэг болгожээ. Гал Пакистаны Анагаахын Шинжлэх Ухааны Хүрээлэнгийн эх, хүүхдийн эрүүл мэндийн тасгийн гуравдугаар давхарт байрлах нярайн хэсэгт орон нутгийн цагаар өглөөний 07:00 орчимд гарсан байна.

Тухайн үед тасагт 16 нярай байсан бөгөөд аврах багийнхан тэдний зөвхөн хоёрыг нь аварч чаджээ. Галын улмаас амиа алдсан хүүхдүүдийн ихэнх нь дөнгөж төрсөн нярай байсан байна. Орон нутгийн хэвлэлүүдийн мэдээлснээр, гал агааржуулагчийн системийн гэмтэл, тодруулбал агааржуулагчийн компрессор дэлбэрсэнтэй холбоотой байж болзошгүй байна. Гал сөнөөгчид шуурхай ажиллаж, галыг унтраасан бөгөөд ослын газарт хөргөх ажиллагаа явуулжээ.

Галын дараа тус эмнэлгийн нярайн тасгийг битүүмжилсэн байна. Амиа алдсан хүүхдүүдийн эцэг, эхчүүд эмнэлгийн галын аюулгүй байдлыг хангах арга хэмжээ хангалтгүй байсан хэмээн шүүмжилж, хариуцлага тооцохыг шаарджээ.

Пакистаны Ерөнхий сайд Шехбаз Шариф эмгэнэл илэрхийлж, ослын шалтгааныг нэн даруй тогтоох, буруутай этгээдүүдийг илрүүлж, хатуу арга хэмжээ авахыг үүрэг болгосон байна.

Энэхүү осол нь Пакистанд сүүлийн жилүүдэд гарсан хамгийн олон хүний амь нас хохирсон эмнэлгийн галын нэг болж байна. Тус улсын төрийн эмнэлгүүд санхүүжилт дутмаг, ачаалал ихтэй, барилга байгууламжийн аюулгүй байдал хангалтгүй байдаг талаар өмнө нь шүүмжлэл дагуулж байжээ.

Л.Баяр