Балбын Гималайн нуруунд орших Химлунг Химал уулын суурь хуаранд цасан нуранги буусны улмаас дөрвөн хүн амиа алдаж, 12 хүн сураггүй болоод байна. Ослын үеэр уулын оргилд авирахаар бэлтгэж байсан багийн гишүүдийн байрлаж байсан майхнууд цасанд дарагджээ. Нуранги есдүгээр сарын 27-ны өглөө Мананг дүүргийн Нар-Фу бүсэд орших 7126 метр өндөр Химлунг Химал уулын суурь хуаранд буусан байна.

Сураггүй болсон хүмүүсийн дийлэнх нь гадаадын уулчдыг оргилд гарахад бэлтгэл хангах, замд олс татах зэрэг ажилд урьдчилан очсон Балбын иргэд байжээ. Тэдний дунд тогооч, туслах ажилтан болон уулын хөтөч нар багтсан байна.

Балбын Үндэсний уулын хөтөчдийн холбооны мэдээлснээр аврах баг есдүгээр сарын 28-нд хоёр хүний цогцсыг нэмж илрүүлснээр нийт дөрвөн хүний цогцсыг гаргаж авсан байна. Амиа алдсан хүмүүсийг Бирендра Гурунг, Ган Шям Рай, Чхэби Бхоте, Пасанг Бхоте нар болохыг тогтоожээ.

Одоогоор 12 хүн сураггүй байгаа бөгөөд аврах ажиллагаа үргэлжилж байна. Катмандугаас мэргэжлийн уулчид, аврах багийг нисдэг тэргээр ослын бүс рүү хүргэсэн ч цаг агаарын тааламжгүй нөхцөл ажиллагаанд хүндрэл учруулжээ. Аврагчид уулын нөхцөл боломжтой үед эрэн хайх ажиллагааг үргэлжлүүлж байгаа аж.

Ослын өмнөх өдрүүдэд Химлунг Химал орчимд их хэмжээний цас орсон талаар цаг уурын урьдчилсан мэдээнд анхааруулж байжээ. Тус уул нь Балбын Гималайн нуруунд гадаадын уулчдын дунд түгээмэл сонголт бөгөөд оргилд гарахын өмнө суурь хуаранд олон арван уулчин, хөтөч, туслах ажилтан байрладаг байна. Балбын уулын бүс нутагт цаг агаар огцом өөрчлөгдөх, их хэмжээний цас орох нь цасан нуранги үүсэх эрсдэлийг нэмэгдүүлдэг. Энэ удаагийн ослын дараа аврах багийнхан сураггүй байгаа 12 хүнийг олохын тулд эрэн хайх ажиллагааг үргэлжлүүлж байна.

Л.Баяр