Ромын католик шашны тэргүүн, Пап лам XIV Лео уушгинд нь илэрсэн жижиг зангилааг авахуулах мэс засалд ойрын өдрүүдэд орохоор болжээ. Түүний өвчнийг эмнэлгийн үзлэгээр эрт үед нь илрүүлсэн бөгөөд эмч нар мэс засал хийхийг зөвлөсөн талаар аравдугаар сарын 11-нд Ватиканы Гэгээн Петрийн талбайд цугласан сүсэгтнүүдэд мэдэгдсэн байна.
71 настай пап лам ням гаргийн уламжлалт мөргөлийн үеэр саяхан хийлгэсэн эмнэлгийн шинжилгээгээр уушгинд нь жижиг, тодорхой хэсэгт байрласан зангилаа илэрснийг хэлжээ. Түүний мэдээлснээр, уг зангилааг маш эрт үед нь илрүүлсэн бөгөөд эмч нар авахуулах нь зүйтэй гэж үзсэн байна.
“Эмч нар мэс засал хийх нь зүйтэй гэж үзсэн. Тиймээс тэдний зөвлөгөөг дагаж, уг зангилааг авахуулах мэс засалд орохоор шийдсэн” хэмээн XIV Лео хэлжээ. Ватиканы хэвлэлийн албаны мэдээлснээр, мэс заслыг ирэх долоо хоногийн эхээр Ром хотын Жемелли эмнэлэгт хийхээр төлөвлөсөн бөгөөд пап ламын бие сэргэхэд ойролцоогоор нэг долоо хоног шаардлагатай аж.
Уушгины зангилаа гэдэг нь уушгины эдэд үүссэн жижиг хэмжээний хэвийн бус нягтаршил юм. Ийм зангилааны олонх нь хоргүй байдаг ч зарим тохиолдолд хорт хавдрын шинжтэй байх боломжтой. Одоогоор XIV Леогийн уушгинд илэрсэн зангилаа хоргүй эсвэл хортой эсэх талаар Ватикан тодорхой мэдээлэл өгөөгүй байна. Иймээс түүний эрүүл мэндийн байдлын талаар урьдчилан дүгнэх боломжгүй юм.
XIV Лео нь 2025 оны тавдугаар сард пап ламаар сонгогдсон бөгөөд өмнө нь эрүүл мэндийн ноцтой асуудалтай байсан тухай мэдээлэл нийтэд гараагүй. Тэрбээр теннис тоглох зэрэг биеийн идэвхтэй хөдөлгөөн хийдэг ажээ.
Пап лам ирэх арваннэгдүгээр сарын 6-наас Латин Америкт хийх пасторын айлчлалаар Уругвай, Аргентин, Перу улсад очихоор төлөвлөжээ. Мэс засал болон эдгэрэлтийн хугацаа уг айлчлалд нөлөөлөх эсэх талаар одоогоор өөрчлөлт зарлаагүй байна.
Л.Баяр
