Францын өмнөд хэсэгт байрлах музейгээс хулгайлагдсан импрессионист зураач Пьер-Огюст Ренуарын хоёр бүтээлийг олж, уг хэрэгт холбогдуулан зургаан хүнийг баривчилсан талаар орон нутгийн эрх баригчид мэдээллээ.

Хулгайлагдсан бүтээлүүдийг есдүгээр сарын 8-нд Францын өмнөд хэсгийн Кань-сюр-Мер хотод байрлах Ренуарын музейгээс авч явсан юм. Хулгайчид музейн хашааны төмөр торыг хөрөөдөж нүх гарган, цонхоор нэвтэрчээ. Тэд нийт дөрвөн зургийг авч зугтахыг завдсан боловч цагдаа нарын шуурхай ажиллагааны үеэр хоёр бүтээлийг музейн цэцэрлэгт орхисон байна.

Харин алга болсон хоёр зураг болох “Хатагтай Колонна Романогийн хөрөг” (Portrait of Madame Colonna Romano), “Худаг дээрх залуу эмэгтэй” (Young Woman at the Well) бүтээлүүдийг хожим олж илрүүлжээ. Эдгээр зураг нь Парисын Орсегийн музейн өмч бөгөөд түр хугацаагаар Ренуарын музейд байрлаж байсан аж.

Кань-сюр-Мер хотын дарга Брайан Массоны мэдэгдсэнээр, бүтээлүүдийг олж, сэжигтнүүдийг баривчилсан нь хотын оршин суугчдын хувьд ихээхэн баяр, тайвшрал авчирсан байна. Гэхдээ цагдаа нар зургуудыг хаанаас, хэрхэн олсон талаар мөрдөн шалгах ажиллагаанд саад учруулахгүйн тулд дэлгэрэнгүй мэдээлэл өгөөгүй байна.

Хулгайчид музейн дохиолол ажилласны дараа цагдаа нар ирэхээс өмнө зугтахыг оролдсон бөгөөд бүх ажиллагаа гурван минут хүрэхгүй хугацаанд болсон гэж прокурорын байгууллага мэдээлжээ.

Пьер-Огюст Ренуар нь XIX зууны импрессионист урсгалын томоохон төлөөлөгчдийн нэг бөгөөд түүний бүтээлүүд урлагийн зах зээлд өндөр үнээр үнэлэгддэг. Энэхүү хэрэг Францын музей, соёлын өвийн хамгаалалт хангалттай эсэх тухай маргааныг дахин хөндөөд байна. Сүүлийн үед тус улсад үнэт эдлэл, түүхэн олдвор, урлагийн бүтээл хулгайлах хэрэг хэд хэдэн удаа гарчээ. Мөрдөн шалгах ажиллагаа үргэлжилж байгаа бөгөөд зургаан сэжигтэнд холбогдох хэргийн талаар нэмэлт мэдээлэл хараахан гараагүй байна.

Л.Баяр