МАХН-ын дарга Н.Энхбаярыг эмчилгээ хийлгэхгүй байгаа, мөн Улсын эмнэлэгт шилжүүлэх эмч нарын дүгнэлт гарсан хэдий ч яагаад шилжүүлэхгүй байгаа эсэх талаар Нийслэлийн прокурорын газрын Ял эдлүүлэх ажиллагаанд хяналт тавих хэлтсийн дарга Ц.Мөнхбаттай ярилцлаа.
МАХН-ын дарга Н.Энхбаярыг эмчилгээ хийлгэхгүй байгаа, мөн Улсын эмнэлэгт шилжүүлэх эмч нарын дүгнэлт гарсан хэдий ч яагаад шилжүүлэхгүй байгаа эсэх талаар Нийслэлийн прокурорын газрын Ял эдлүүлэх ажиллагаанд хяналт тавих хэлтсийн дарга Ц.Мөнхбаттай ярилцлаа. -МАХН-ын дарга хорих эмнэлэгт ямар нөхцөлд хоригдож байна вэ?
-Намбарын Энхбаяр гэдэг хүн Зайсан дахь хорих 401 дүгээр ангийн нэгдсэн эмнэлэгт хэвтэж байна. Энэ газар нь хорих ял эдэлж байгаа хүмүүс эмчлүүлдэг улсдаа байдаг гол эмнэлэг. Нөхцөл байдлын хувьд бусад ялтнуудтай яг ижил нөхцөлд байгаа. Хүн бүр хуулийн өмнө эрх тэгш байх Үндсэн хуулийн зарчим бий. Эмнэлгийн өрөөнд ганцаараа байрлаж байна. Хажуугийн өрөөнд нь Төрийн тусгай хамгаалалтын ажилтан харж хамгаалж байгаа.
-Гэвч хорихын эмнэлэгт эмчилгээ хийлгэхгүй байгаа гэсэн үү?
-Н.Энхбаяр өнгөрсөн арванхоёрдугаар сарын 27-ны өдөр хорихын нэгдсэн эмнэлгээр үйлчлүүлэхгүй гэсэн хүсэлтийг бичгээр гаргасан. Уг хүсэлтдээ “401 дүгээр ангийн нэгдсэн эмнэлэгт эмчлүүлэх, тариа тариулах, эм уухаас татгалзаж байгааг албан ёсоор илэрхийлж байна” гэж гараараа бичиж өгсөн. Гэхдээ хорих ангийн эмнэлгийн эмчийн зүгээс даралт үзэх, ойр зуурын л үзлэг хийгдэж байна. Уул нь хорихын нэгдсэн эмнэлгээс эмнэлгийн үйлчилгээ үзүүлэхэд бэлэн байгаа. Гэтэл өөрөө бичиг хийж өгөөд үзүүлэхээс татгалзаад байгааг тэр хүний хувийн хэрэг гэж ойлгож байна.
-Эрүүл мэндийн яамнаас эмч нарын баг томилогдсон. Мөн тэд үзээд, яаралтай Клиникийн хоёрдугаар эмнэлэгт шилжүүлэх хэрэгтэй гэсэн дүгнэлт гаргасан гэсэн?
-Өнгөрсөн арванхоёрдугаар сарын 28-ны өдөр Эрүүл мэндийн сайдын тушаалаар зөвлөх эмч нарын баг гэж томилогдож, Н.Энхбаярыг Улсын хоёрдугаар эмнэлэгт шилжүүлэх шаардлагатай гэсэн дүгнэлт зөвлөмжийг гаргаж, хорих ангид өгсөн байна. Энэ нь бол үнэн.
-Дүгнэлт гарсан байхад шилжүүлэхгүй байгаа нь ямар учиртай вэ?
-Хэвлэл мэдээллийн хэрэгслээр үндэслэлгүй мэдээлэл цацагдаад байна. Тухайлбал, хорих анги Н.Энхбаярыг улсын хоёрдугаар эмнэлэгт шилжүүлнэ гэсэн чинь прокурор зөвшөөрөхгүй байна гэж. Тийм зүйл байхгүй. Прокуророос зөвшөөрөл шаардах ёсгүй. 2002 онд батлагдсан Хууль зүй дотоод хэргийн сайд, Эрүүл мэндийн сайдын 313/316 тушаалаар баталсан журам байна. Уг журамд “Хүнд гэмт хэрэгт шийтгүүлсэн ялтныг клиникийн эмнэлэг төрөлжсөн үйлчилгээний төв, орон нутгийн нэгдсэн эмнэлэгт шилжүүлж эмчлүүлэхийг хориглоно” гээд заасан байдаг. Энэ заалтын дагуу хорих анги Н.Энхбаярыг шилжүүлэх боломжгүй. Гэтэл прокурор зөвшөөрөл өгвөл болно гэж байгаа нь хууль бус. Хорих байгууллагаас гаргасан шийдвэр хууль журамд нийцэж байгаа эсэхэд прокурор хяналт тавьж илэрсэн зөрчлийг арилгуулах үүрэгтэй. Энд нэг зүйлийг онцолж хэлэхэд прокурор хууль, журам зөрчсөн зөвшилцөөнийг бусадтай хийх боломжгүй.
-Нэгэнт шилжүүлэх боломжгүй гэсэн заалт байдаг юм байна. Тэгвэл яагаад өнгөрсөн наймдугаар сарын 17-ноос арванхоёрдугаар сарын 21-н хүртэл хоёрдугаар эмнэлэгт эмчилгээ хийлгэхийг зөвшөөрч байв?
-Яагаад гэдгийг хорих байгууллагаас асуух хэрэгтэй. Цаг хугацааны асуудал байсныг үгүйсгэхгүй. Прокуророос холбогдох шаардлагыг тавьж ирсэн.
-Энэ бүхнээс харахад прокурорын байгууллага, ШШГЕГ хоёр хоорондоо ойлголцоогүй гэж үзэж болох уу?
-Үгүй. Прокурорын байгууллага, ШШГЕГ хоёр хоорондоо нягт уялдаа холбоотой ажиллаж байна. Ямар нэгэн үл ойлголцол байхгүй. Харин гаднаас хорих газарт хөндлөнгийн хүчин зүйл нөлөөлж байгаагаас үйл ажиллагаагаа хэвийн явуулж чадахгүй байна.
-Тэгэхээр ШШГЕГ-т дарамт шахалт ирж байгаа гэх гээд байна уу?
-Тийм. Ирж байгаа. Н.Энхбаяр гэдэг хүнийг хамгаалж, өмгөөлж байгаа УИХ-ын гишүүд, сайдууд байна шүү дээ. Энэ хүмүүс Н.Энхбаяр гэдэг хүнийг яаж өмгөөлж, хамгаалж гүтгэлэг тарааж байгаа нь ойлгомжтой байна. О.Баасанхүү гэх гишүүнийг хар. Хууль тогтоох ажлаа хийхгүй, хувь хүний араас гүйж харайгаад. Ингэж намба алдаж болохгүй.
-Ер нь тэгэхээр хүнд гэмт хэрэг үйлдсэн ялтны хувьд энгийн эмнэлэг рүү шилжүүлэх боломжгүй юм байна. Харин тус хорихын эмнэлэгт эмчилгээ хийж чадахгүй бол яах вэ?
-Журмандаа шилжүүлж болохгүй гэж заасан ч улсын эмнэлгийн эмч нар хорих ангид ирж эмчилгээ хийж болно гэж заасан байгаа. Харамсалтай нь, Клиникийн хоёрдугаар эмнэлгийн эмч нар хорихын эмнэлэгт очиж, эмчилгээ хийхгүй гэж байгаа ёс суртахуунгүй асуудал.
-Яагаад?
-Н.Энхбаяр гэдэг хүнийг буцааж улсын хоёрдугаар эмнэлэгт авчир гэж шаардаж байна. Тэд хорихын нэгдсэн эмнэлэгт очиж эмчилгээ хийхгүй гэж байгаа нь сайдынхаа 2002 онд баталсан журмаа зөрчиж байна. Тиймээс хуульд заасан үүргээ биелүүлээгүй эмч нарын асуудлыг холбогдох газар нь шалгаж тодруулах ёстой гэж үзэж байна. Тухайлбал: Эрүүл мэндийн яам
-Н.Энхбаярын амь нас эрсэдвэл хэн хариуцах вэ?
-Эмнэлгийн тусламж санаатай үзүүлээгүй учир прокурор хариуцлага хүлээнэ гэж намынх нь нөхөд ярьж, хэвлэл мэдээллийн хэрэгслээр мэдээлэл цацаж байна. Хорих байгууллага дээрх ялтны ял эдлүүлэх бүх нөхцөл бололцоог хангаж өгсөн. Ийм байхад тухайн хүн хоол унд хэрэглэхээс татгалзаж эрүүл мэндээ хохироовол прокурор хариуцлага хүлээх хууль зүйн үндэслэл байхгүй.
-Өлсгөлөн зарлана гэсэн мэдээлэл байсан. Юу болов?
-Тэр бол тэр хүний эрхийн асуудал. Хорих байгууллага эмчилгээ хийе гэсэн. Гэвч өөрөө хоол унднаасаа татгалзаад, эрүүл мэндээ хохироож байгаад өөрөө л хариуцлага хүлээх ёстой. Энэ хүнийг ийм байдалд хүргэсэн тойрон хүрээлэгчид нь хариуцлага хүлээх ёстой.
-Ер нь Н.Энхбаяр ямар хоол унд идэж байгаа вэ?
-Бүх хоол ундыг нь гаднаас, төрийн тусгай хамгаалалтын газраас оруулж байгаа.
-Н.Энхбаяр Улсын дээд шүүхийн нийт шүүгчдийн хуралдаанд хандсан байгаа. Хуралдааны дараагийн шийдвэрээс хамаарч, Н.Энхбаярыг хорих ангид хуваарилах уу?
-Н.Энхбаяр дээд шүүхэд хандах хандахгүй нь ял эдлүүлэх ажиллагаатай ямар ч холбоогүй. Эрүүгийн байцаан шийтгэх ажиллагаа болон ял эдлүүлэх ажиллагаа нь хоорондоо тэс өөр процесс. Тэдгээрт тавих прокурорын хяналт ч ялгаатай. Эдгээрийг хольж хутган хүмүүсийн толгойг эргүүлж болохгүй. Улсын Дээд Шүүхийн ерөнхий шүүгч ямар шийдвэр гаргах нь өөр асуудал. Анхан шатын шүүхийн шийдвэр хүчин төгөлдөр болсон тул хуульд зааснаар Н.Энхбаярыг хорих ангид хуваарилна.
-Хэзээ хуваарилах вэ?
Н.Энхбаяр одоо хорихын нэгдсэн эмнэлэгт байгаа шүү дээ. Тогтоол гүйцэтгэх газар ялтныг хуваарилах асуудлыг шийдвэрлэдэг.
-Прокурорын хувьд ар гэрийнхэнтэй нь уулзаж байна уу? Танд ямар нэг хүсэлт тавьж хандсан уу?
- Ар гэрийнхнийх нь зүгээс уулзъя гээд ирвэл прокурорын байгууллагын хаалга нээлттэй. Одоогийн байдлаар ямар нэгэн хүсэлт ирээгүй байна.
-Ер нь яагаад заавал арванхоёрдугаар сарын 21-нд хорих болов. Дэлхий сөнөх энэ өдөр бүх хүмүүсийн анхаарал өөр тийш сарнисан үед хорилоо хэмээн иргэд ярьж байсан?
-Дэлхий сөнөх, сөнөхгүйтэй ямар ч холбоогүй. Хуулийн ажилд тэр хамаагүй. Бид шаардлагатай тохиолдолд ямар ч үед хуульд заасан үйл ажиллагаагаа явуулж болно. Хорих ангид хүргэх өдөр нь л тэгэж таарсан байна.
-Мөн арванхоёрдугаар сарын 21-нд Н.Энхбаярыг ачиж явсан нь хууль бус гээд байгаа?
-Яагаад хууль бус гэж. Аль наймдугаар сард л давж заалдах шатны шүүхийн магадлал гарсаны дараа хорих анги руу авч явах ёстой байсан гэж би үздэг. Харин яагаад дөрвөн сар гаруй хугацаанд эмнэлэгт байв гэдэг нь асуудал.
-МАХН-ынхан Н.Энхбаярыг Ерөнхийлөгчийн сонгуульд нэр дэвшүүлнэ гэсэн асуудал ярьж байгаа?
-Хуульд зааснаар хорих ял эдэлж байгаа хүн сонгуульд нэр дэвших боломжгүй.
-Н.Энхбаяртай хамт ял сонссон До.Чулуунбаатар, Ж.Мягмаржаргал нар хаана ял эдэлж байгаа вэ?
-До.Чулуунбаатар Дарь-Эх дахь хорих 441 дүгээр ангид, Ж.Мягмаржаргал Амгалан дахь хорих 421 дүгээр ангид ял эдэлж байгаа.
Б.Чимэг
Сэтгэгдэл (41)