Алдарт дуучин Бруно Марс нарлаг Хавайд өссөн. Тэр олон цомгоо олон сая хувиар борлуулж, дэлхийн нөлөө бүхий хүн болсон. 27 настай ч жинхэнэ хайртайгаа учраагүй яваа авьяаслаг залуу дуучин биш давалгаагаар тэшигч болохыг хүсдэг байсан талаараа “People” сэтгүүлд ярьсан сонирхолтой ярилцлагыг хүргэж байна.

Алдарт дуучин Бруно Марс нарлаг Хавайд өссөн. Тэр олон цомгоо олон сая хувиар борлуулж, дэлхийн нөлөө бүхий хүн болсон. 27 настай ч жинхэнэ хайртайгаа учраагүй яваа авьяаслаг залуу дуучин биш давалгаагаар тэшигч болохыг хүсдэг байсан талаараа “People” сэтгүүлд ярьсан сонирхолтой ярилцлагыг хүргэж байна.

-Та бага насныхаа нэгээхэн хэсгийн Хавайд өнгөрүүлсэн. Хавай дахь амьдрал тань ямар байсан бэ?

-Хавай их сайхан газар. Бага насаа дурсахаар гэр бүлийнхэнтэйгээ далайн эрэг дээр тоглож байсан үе л хамгийн түрүүнд санаанд ордог.

-Ингэхэд та яагаад Хавайг орхиж Лос-Анжелест ирсэн бэ?

-Уран бүтээлч хүний хувьд би Хавайд олон зүйл хийж, олон дурсамж үлдээсэн. Үнэнээ хэлэхэд Хавайн хөгжмийн ертөнц жижигдсэн гэх үү дээ. Дээр нь миний Хавайд хийдэг байсан ажил таалагдахаа больсон. Дан ганц жуулчдыг зугаацуулна гэдэг хэн нэгний утсан хүүхэлдэй шиг санагдсан учраас Лос-Анжелест ирсэн.

-Таны амьдрал хөгжимтэй хэрхэн холбогдсон бэ?

-Манай гэр бүл тэр чигээрээ хөгжмийн хүмүүс. Аав латин бөмбөрчин, ээж дуучин. Тийм болохоор багаасаа л хөгжим эгшиглэж, дуу хуур хөгжөөсөн гэр бүлд өссөн. Миний сэтгэлийн гүнд нуугдсан өчүүхэн хэмнэлийг аавын бөмбөрийн хэмнэл, ээжийн цангинасан хоолой нээж өгсөн болов уу. Мөн манай авга ах гэж туйлын авьяастай хүн байсан.

-Анх тайзан дээр гарсан үеэ дурсаач? Хэдэн настай байсан бэ?

-Авга ах маань Элвис Преслиг тун адилхан дууриадаг байсан шүү. Би нэг өдөр авга ахаасаа “Дасгалжуулагчаа намайг эгнээндээ аваач” гэхэд зөвшөөрснөөр анх удаа тайзан дээр гарч байлаа. Жаахан хүүхэд байсан болохоор нэлийсэн гэрэлд нүд гялбаад яаж ч дуулснаа мэдэхгүй тайзнаас буусан юм. Дараа нь цугласан хүмүүс надад “Чамд чадалтай сайхан хоолой байна. Чи дуучин болох ёстой” гэж хэлсэн нь их урам өгсөн. Тухайн үед би таван настай байлаа.

-Та 18 насандаа Холливудад хөл тавьж, “Motown” рекордстой гэрээ байгуулснаар төдөлгүй нэр гарсан. Харамсалтай нь “Motown” удалгүй гэрээгээ цуцлахаар шийдсэн. Тэр үед таныг сэтгэлээр унасан гэж ярьдаг юм.

-Энэ бол нэг алхам ухарсан явдал болсон. Тэд бид чамтай ахин хамтран ажиллахыг хүсэхгүй байна гэх утгатай зүйл хэлсэн. Би дэндүү балчир байсан болохоор энэ гэрээ ямар чухал болохыг ойлгохгүй байж. Хэдийгээр би сайн дуулж чаддаг байсан ч, шоу бизнесийн ертөнцөд амжилт олохын тулд түүнээс их зүйлийн суралцах хэрэгтэй болдог. Хамтлагуудтай хамтран дуулж, ганц нэг тоглолтод оролцдог төдий л байсан болохоор үнэндээ би рекордсын дуучин ямар нөхцөлд ажилладгийг огт мэдэхгүй байлаа. Энэ шийдвэрийг сонсоход надад маш хэцүү байсан, би уйлсан байх аа.

-Тэгвэл одоо хэн таны хөгжмийн хэмнэл, урлагийн онгодыг хөглөж байна вэ?

-Эмэгтэй хүн гээд хэлчихвэл буруудахгүй болов уу / инээв/. Ер нь би сонгодог хөгжимд дэндүү дуртай. Бүр зүрх сэтгэлээ зориулж сонсдог болохоор сонгодог хөгжмийн “донтон” гэж зарим хүн надаар хошигнодог.

-Сайхан бүсгүйчүүд чамайг шүтэн биширч орилоход ямар сэтгэгдэл төрдөг вэ?

-Хорвоо дээрх хамгийн сайхан мэдрэмж. Та ч үүнийг үгүйсгэж чадахгүй байх. Гэхдээ тэр олон хүмүүс дунд эмэгтэйчүүд байгаа эсэхийг нь би нарийн мэдэх аргагүй шүү дээ.

-Шоу бизнесийн ертөнцийнхнөөс хэнийг нь илүү бахаддаг вэ?

-Аделийг. Тэр гайхалтай сайхан дуу зохиодог. Цахим хуудаснаас дуу авчихаж болдог болсон цагт цомог борлуулалт ашиггүй болсон гэж хүмүүс бодож байх үед түүний цомгууд хэдэн сая хувь борлогдсон.

-Таны дуртай хоол?

-Маргаангүй тахианы махан ороомог. Манай эмээ “испани будаа” гэж ёстой сай хан салахын аргагүй амттай хоол хийж өгдөг байсан. Энэ хоолонд шар будаа, чидун жимс, чинжүү ордог юм. Хааяа би өөрөө хийж идэхээр эмээгийн хийж өгснийг гүйцдэггүй муу талтай / инээв/.

-Хэрвээ танд хоёр дахь амьдрал гарч ирвэл дуулсаар л байх уу?

-Үгүй дээ. Энэ хэцүү ажлаас заримдаа би залхдаг юм. Би давалгаагаар тэшигч болох байсан. Энэ үнэхээр сайхан ажил шүү. Даан чиг би давалгаагаар тэшихийн оронд дуулсаар л байгаад л ийм болчихлоо. Гэхдээ үүнд харамсаад байх зүйл байхгүй л дээ.
.