МАХН-ын дарга Н.Энхбаярыг Клиникийн хоёрдугаар эмнэлэгт хэвтүүлэх шаардлага тавин, 11 ээж өлсгөлөн зарласан. Тэднээс хоёрынх нь биеийн байдал муудан, эмнэлгийн тусламж үйлчилгээ авсан юм. Харин ээжүүдийн өлсгөлөнг хараад аавууд ч өлсгөлөн зарлахад бэлэн байна гэлээ. Ингээд өлсгөлөн зарлахаар бэлдэж буй аавуудын төлөөлөл Дорноговь аймгийн иргэн Т.Мөнхтэй ярилцлаа. -Аавууд өлсгөлөн зарлахаар бэлдэж байгаа гэсэн үү?
-Би өнгөрсөн хавар Улаанбаатар хотод ирж Н.Энхбаяр даргаар дамжуулж ард түмнийг дарамталж, айлган сүрдүүлсэн үйлдлийн эсрэг тэмцэж өөрийн үгээ хэлж байсан хүн. Тухайн үеийн Ерөнхий сайд, УИХ-ын дарга, АТГ-ын дарга нартай үнэн мөн, шударга ёс гэж монголд байдаг бол хэнийх нь зөв юм гэдгийг ард түмэн мэдэг гээд бүгдийг нь халж мэтгэлцээнд дуудаж байсан. Харамсалтай нь хэн ч над руу хандаагүй. Эгэл жирийн иргэнээсээ айгаад хариу ч өгөлгүй халз ч мэтгэлзээгүйд нь гайхсан. Би худлаа үнэн ярьж, амьтны толгой эргүүлдэг хүн биш. Хаашаа ч гарах гарцгүй бодит баримт дээр тулгуурлаж ярьдаг учраас тэдгээр эрхмүүд үнэнээс айж бас зугатаад тус халз мэтгэлзээнд ирээгүй юм байна гэж ойлгосон. Тэр цагаас хойш олон сар Н.Энхбаяр даргыг баривчилсан баривчилгаа болоод болж өнгөрсөн үйл явдлуудыг ажиглаж суулаа. Дээрдэж байгаа зүйл нэг ч алга. Өөрөөр хэлбэл Н.Энхбаяр гэдэг хүн монгол улсын газар нутаг, эд баялагийн бүрэн бүтэн байдлыг хамгаалахын төлөө тэмцсэн нь одоогийн эрх баригчдад огтхон ч таалагдаагүй нь экс ерөнхийлөгчийг хилс хэргээр хэлмэгдүүлэх шалтгаан болчихсон байна. Ард түмэн бид тэнэг биш учраас ийм бусармаг явдын эсрэг мэдээж хэлэх үгээ хэлж, хийх тэмцлээ хийж таарна. Тиймээс шударга ёс, монгол улсынхаа тусгаар тогтнолын төлөө өлсөхөд бэлэн байгаа юм.
-Таниас өөр өлсгөлөн зарлах аав байгаа юм уу?
-Ерөөсөө монгол эрчүүд өнөөдөр шударга ёсны төлөө бол хэн нь ч тэмцэхэд, өлсөхөд бэлэн байгаа гэж бодож байна. Миний ард манай Дорноговь аймгийн Сулинхээрийнхэн тэмцэхэд бэлэн байгаа.
-Та өөрийнхөө өмнөөс л яриад шиг байна?
-Манай нутгийн ард түмэн надтай яг ижилхэн дүгнэлтийг хийж байгаа. Ерөөсөө монголд газар шорооны наймааны эсрэг тэмцэл хийсэн хүн шууд ялтан болдог юм байна. Н.Энхбаярыг зайлуулсанаар Оюутолгойн асуудал шуударсан. Одоо болтол тэр гэрээг засч сайжруулаагүй. Сонгууль угтсан айдас бол Н.Энхбаяр даргын баривчилгаа. Өнөөдөр үнэхээр энэ айдсын арга нь амжилттай хэрэгжиж монгол эрчүүд Н.Энхбаяртай зууралдаж байснаас архиа уугаад явья гэж бодож байна. Гэхдээ энэ тэмцэл бол Энхбаярыг хамгаалах биш эх оронд маань алдагдсан шударга ёсыг хамгаалах гэсэн тэмцэл гэдгийг зориуд хэлье.
-Хүмүүс энэ өлсгөлөнг Н.Энхбаярыг ээлжит шоу л гэж харж байна?
-Ерөөсөө Н.Энхбаяр гэдэг хүнээр дамжиж монголын нийгэмд ардчилал нэрийн доор анархизм, шударга бус байдал, луйварын засаглал тогтжээ гэдэг нь ил болсон байхгүй юу. Тиймээс бидний хийж байгаа тэмцэл бол газар нутгийнхаа бүрэн бүтэн байдал, улс орныхоо тусгаар тогтнол, нийгмийн шударга ёсны төлөөх тэмцэл. Харин бид үүнийгээ бид бүхний үнэ цэнэ болсон тэр эрх ашгийн төлөө тэмцсээр ирсэн Н.Энхбаярыг хамгаалах туган доор нэгдэн хийж байгаа юм. Мэдээж Н.Энхбаярыг сулласнаар өмнө нь ярьсан язгуур эрх ашгийн, цаашдын хөгжлийн томоохон асуудлууд шууд шийдэгдэхгүй нь мэдээж. Харин энэ мундаг, шударга лидерийг улс төрийн хэлмэгдүүлэлтээс аварч чадвал бид цаашдаа эх орныхоо төлөө цэгцтэй, зөв дуугарч, эрүүл нийгмийг цогцлоож чадна гэж итгэж байгаа. Тиймээс монгол аавуудыг би Н.Энхбаярыг суллуулахын төлөө өлсгөлөнд нэгдэхийг уриалж байна. Монгол эхчүүд өнөөдөр үр хүүхэд, хань ижлээ орхиод шударга ёсны төлөө өлсөөд нилээд хэд хонолоо. Ерөөсөө монголын түүхэнд эрчүүд нь хойш суугаад эмэгтэйчүүд нь тэмцэлд мордож байсан нь тун цөөн. Тиймээс эрчүүд маань өнөөдөр алсын хараа амьдралын ухаантай байж эхчүүдийнхээ тэмцэлд хүч нэмнэ гэдэгт эргэлзэхгүй байна.
Т.Чимэг
Сэтгэгдэл (88)