МАХН-ын Хяналт ёс зүйн хорооны дарга Г.Даваанямаас цаг үеийн асуудлаар цөөн зүйл тодрууллаа.
    МАХН-ын Хяналт ёс зүйн хорооны дарга Г.Даваанямаас цаг үеийн асуудлаар цөөн зүйл тодрууллаа.

-Өлсгөлөн зарлаж байгаа ээжүүдийн биеийн байдал хүндхэн байгаа гэсэн?
 
-МАХН-ын дарга Н.Энхбаярыг болон шоронд хоригдож байгаа хүнд өвчтэй хүмүүс эмнэлгийн тусламж авч чадахгүй байгааг эсэргүүцэн ээжүүд өлсгөлөн зарласан. Нийтдээ долоон хүний биеийн байдал хүнд байна. Өнгөрсөн баасан гаригийн өглөө гэхэд хоёр хүний бие муудаж эмнэлэгт хүргэгдсэн. Эмнэлэгт хүргэгдсэн эхчүүд эмчилгээ хийлгэхгүй байна.

-Яагаад эмчилгээ хийлгэхгүй байгаа юм бол?

-Учир нь зорьсон зорилго нь биелэхгүй байгаа болохоор эмчилгээ хийлгэхгүй байгаа гэсэн. Энэ бүхнийг хөндлөнгөөс нь харж байхад Монгол хүний амь нас үнэ цэнэгүй болчихсон байна гэсэн дүгнэлт хийж байна. Өнөөдөр эдгээр хүмүүс үнэ цэнэгүй болчихоод байгаа хүний алтан амь насны төлөө тэмцэж байна.  Уг нь үзэгний үзүүр хөдөлгөх төдийд л шийдэгдэх асуудал дээр энэ олон эх хүнийг ингэж зовоож, хуурч мэхэлж болохгүй л юм шиг санагдах юм. Энэ бүхэн дунд шатны албан хаагчдийн хүнд сурталтай холбоотой байна уу гэж харж байна. Ерөнхийлөгч Ц.Элбэгдорж сайд, Ерөнхийлөгч болж байхдаа хэлж байсан. Хүнд суртал, авилга зэргийг үгүй хийнэ гэж ярьж байсан хүн өнөөдөр нийгэм юу болоод байгааг харах ч үгүй байна. Тэр битгий хэл “Энэ бидний хүсч байсан ардчилал биш байна” гэж нөгөө Ардчилалын алтан хараацай гэгддэг Э.Бат-Үүл өчигдөр сонинд өгсөн ярицлагадаа хэлж дуу алдсан байна лээ шүү дээ. Тэгэхээр энэ төр гэдэг чинь булхай наймааны төр л болчихоод байна.

-Ер нь Ерөнхий сайд Н.Алтанхуяг Н.Энхбаяр болон өлсгөлөн зарлаж байгаа ээжүүдэд хатуурхахгүй байгаа гэсэн мэдээлэл гарч байна?

-Тийм байж магадгүй ээ. Гэхдээ л ээжүүдийн биеийн байдал ийм хүнд байгаа үед өөрийнхөө дуу хоолойг хүргэх л хэрэгтэй гэж бодож байна.

-Н.Энхбаярыг хоёрдугаар эмнэлэг рүү шилжүүлэх гээд өрөө, орыг нь бэлдэж байгаа гэсэн үнэн үү?

-Миний мэдэж байгаагаар шилжүүлнэ гэж 3-4 хоног хуурч байна. Мөн хоёрдугаар эмнэлгийн эмч нар Н.Энхбаяр даргыг хүлээж авах хүсэлгүй байгаа гэсэн. Учир нь тэд нарыг Н.Энхбаярыг яагаад байлгаад эмчилгээ хийлгээд байна гэж шалгаж эхэлсэн гэсэн мэдээлэл байгаа. Гэхдээ энэ мэдээлэл үнэн худлыг мэдэхгүй байна.