МАХН-ын дарга Н.Энхбаярыг МИАТ-ын хэрэгт холбогдсон хэмээн хэвлэлээр цацагдаад буй. Мөн Улсын клиникийн хоёрдугаар эмнэлэгт шилжүүлэх асуудал яригдсан ч нам жим болсон. Ингээд энэ талаар МАХН-ын Ерөнхий нарийн бичгийн дарга Г.Шийлэгдамбаас тодрууллаа. -МАХН-ын дарга Н.Энхбаярыг МИАТ-ын хэрэгт холбоотой гэх мэдээлэл цацагдаад байна. Энэ талаар?
-Олон нийтийн анхаарлыг татсан томоохон хэрэг буюу МИАТ-ын хэрэгт МАХН-ын дарга Н.Энхбаярыг холбогдуулах болсон байна. Энэ бол олон нийтэд Н.Энхбаяр даргын эсрэг буруу ташаа мэдээлэл өгөхийг агуулсан нь ойлгомжтой. Энэ бол үндэсгүй. “Номхон тэмээг ноолоход амар” гэдэг шиг хэрэг болгон дээр л Н.Энхбаяр даргыг хавчуулж байдаг. Ойр дотныхон хүмүүс хамаатай мэтээр ойлгуулж байдаг. Энэ нь цаанаа Н.Энхбаяр гэдэг хүнийг хэлмэгдүүлж байгааг нотолж байна гэсэн үг. Тиймээс энэ бүх явуулгаа зогсоохыг МАХН-аас шаардаж байгаа.
-Н.Энхбаярыг эмнэлэг рүү шилжүүлэх асуудал юу болж байна?
-Оны өмнө эмч нар дүгнэлт гаргаж, Н.Энхбаяр даргыг Клиникийн хоёрдугаарт эмнэлэгт шилжүүлэх шаардлагатай гэсэн. Гэвч эмч нарын гаргасан дүгнэлтийн дагуу эмчлэх бололцоо нь хангагдахгүй байна. Одоо хорих 401 дүгээр ангийн эмнэлэгт хэвтэж байгаа.
-Эмчилгээ хийлгэж байгаа юу?
-Одоогоор эмчилгээ хийлгээгүй. Өмгөөлөгчдийн өгсөн мэдээллээр Н.Энхбаяр даргыг хоёрдугаар эмнэлэгт хэвтүүлэхэд прокурорын байгууллага саад болж байна гэсэн. Хүний эрүүл мэндтэй холбоотой асуудалд прокурорын байгууллага шууд оролцох нь хуулийн хүрээнд тавигдах асуудал мөн үү, биш үү гэдэг нь эргэлзээтэй.
-Мөн Эрүүл мэндийн сайд Н.Удвалыг огцруулах тухай мэдээлэл байна?
-МАХН-аас Шинэчлэлийн Засгийн газарт томилогдож ажиллаж байгаа сайд нарын эсрэг мэдээлэл байна. Нэг хэсэг Шадар сайд Д.Тэрбишдагвыг огцруулах тухай мэдээлэл цацагдаад байсан. Одоо Н.Удвал сайдын тухай мэдээлэл цацагдах болж. Бусад намынхаа эсрэг мэдээ мэдээлэл явуулахаа зогсоох хэрэгтэй гэдгийг МАХН-аас байр сууриа илэрхийлж байна.
-МҮАН-ын дарга М.Энхсайхан Засгаас гарч магадгүй гэж хэлж байсан. Хэрвээ гарвал МАХН хэрхэн хүлээж авах вэ?
-МАХН-ын Гүйцэтгэх товчооны хуралдааны шийдвэрийг та санаж байх. Энэ шийдвэрийн гол зорилго нь энэ Засгийн газрыг тогтвортой байлгах нь зүйтэй гэж үзсэн. Энэ байр суурь одоо ч хэвээрээ байгаа. М.Энхсайхан даргын хувьд нэг асуудлыг шийдэхийн төлөө Засгийн газрын хэмжээнд ярина хэмээн би бодохгүй байна. Хувь хүний байр суурь илэрхийлэгдэж байгаа тэр хүрээгээр эвслийн байр суурийг ойлгож болохгүй. Засгаас гарна гэсэн асуудал одоогоор яригдаагүй. М.Энсайхан дарга ч шууд утгаараа Засгийн газраас гарна гэж яриагүй гэж би бодож байна. Учир дутагдалтай байгаа зүйлийг л гаргаж ярьсан байх.
Б.Чимэг
Сэтгэгдэл (27)