ЦЕГ-ын Хэвлэл мэдээллийн төвийн ажилтан, цагдаагийн ахлах дэслэгч Б.Саруултуяагаас  гэмт хэргийн гаралтын талаар тодрууллаа.

-Сар шинийн баярын өдрүүдэд гэмт хэргийн гаралт өмнөх өдрүүдээсээ хэр байв?

-Битүүн, шинийн нэгэнд эрүүгийн болон хэв журмын байдал харьцангуй тайван амгалан байсан. Гэвч хулгайн гэмт хэрэг бүртгэгдсэн. Энэ сарын 10-13-ныг хүртэлх хугацаанд хулгайн 10 гаруй дуудлага бүртгэгдсэнээс битүүн, шинийн нэгэнд 8, дараагийн өдөр нь 9 хулгайн гэмт хэрэг бүртгэгдсэн. Орон байрны хулгайн гэмт хэрэг харьцангуй бага байсан. Аж ахуй, нэгж, байгууллагуудын  эд зүйл хулгайд алдагдсан. Мөн автомашины эд анги их алдагдсан. Бусад гэмт хэргүүд харьцангуй бага байлаа. Сар шинийн гурван хоногт зам тээврийн осол гэмтлүүдийн дуудлага 100 гаруй бүртгэгдсэн. Үүнээс ослын шинжтэй дуудлага дийлэнх хувийг эзэлж байна.   

-Согтуугаар үйлдэгдсэн хэрэг их гарав уу?

-Энэ сарын 8-13-ныг хүртэлх хугацаанд эрүүл мэндээрээ хохирсон согтуугийн дуудлага 233 бүртгэгдсэн. Мөн гудамжинд согтуу хүн ухаангүй байна гэсэн дуудлага 102 байна. Согтуугаар гудамжинд явж байгаад гар, хөлөө гэмтээх, гэр орондоо согтуурч бие биенээ гэмтээх зэрэг хэргүүд их гарсан. Архи уугаад гадны ямар нэг нөлөөгүйгээр нас барсан тохиолдол ч бүртгэгдсэн.

-Золгүй тохиолдлоор амь насаа алдсан дуудлага бүртгэгдэв үү?

-10-13-ны хооронд золгүйгээр амь насаа алдсан 10 гаруй тохиолдол бүртгэгдсэн.  Үүнээс дийлэнх хувийг архи ууж унтаад биедээ ямар нэг ил гарах шархи соривгүй нас барсан дуудлага эзэлж байна. Мөн осгосон тохиолдол хөдөө орон нутагт хоёр, гурав бүртгэгдсэн. Сар шинээр айлд золгох гэж яваад хальтирч унаж амь насаа алдсан нэг хэрэг гарсан. Түүнчлэн өөрийгөө боомилж, амь насаа хохироох 4-5 тохиолдол бүртгэгдсэн. Золгүй тохиолдол өдөрт 2-3 бүртгэгдэж байна.

-Сүүлийн өдрүүдийн гэмт хэргийн гаралт?

-Энэ сарын 13-наас хойш гэмт хэрэг өссөн. Гэхдээ 14-ний өдөр хосуудын баяр байсан учир харьцангуй тайван амгалан байсан. Хэд хэдэн согтуугаар танхайрсан дуудлага ирсэн. Өнгөрсөн амралтын өдрүүд буюу 15-18-ныг хүртэлх өдрүүдэд хулгай, авто осол, танхайн гэмт хэрэг зонхилон бүртгэгдсэн байгаа. Үүнээс золгүй тохиолдлоор амь насаа хохироох явдал 17 бүртгэгдсэн. Тухайлбал, золгож явж байгаад хальтирч унаад амь нас нь хохирсон хэрэг гарсан. Ер нь гол төлөв архи хэтрүүлэн хэрэглэснээс амь нас нь хохирсон тохиолдол их гарсан.

-16-17-нд шилжих шөнө булаалтын 4 гэмт хэрэг 21.00 цагаас хойш үйлдэгдсэн байгаа. Энэхүү булаалтын халдлагад согтуу нэг иргэн өртсөн. Тухайлбал, Баянзүрх дүүргийн 16 хорооны нутаг дэвсгэрт 24 настай  У гэх эмэгтэй байрныхаа урд 100 мянган төгрөг, гар утасны хамт булаалгасан. Мөн БЗД-ийн 5-р хорооны нутаг дэвсгэрт Жуковын ойр орчимд эд зүйлээ булаалгасан гэх дуудлага ирсэн. Нэг дээрмийн хэрэг гарсан. МУИС-ын орчимд согтуу иргэн дээрэмдүүлсэн байгаа.

-Цагдаагийн байгууллагад  бүртгэгдэж байгаа нийт  хэргүүдийн хэдэн хувийг  эмэгтэйчүүд, охид бүсгүйчүүд маань үйлдэж байна?

-Өнгөрсөн 2012 онд гэмт хэрэгт 19732 хүн сэжигтнээр тооцогдон шалгагдсанаас 13,5 хувийг эмэгтэй хүн эзэлж байгаа нь 2011 оноос 0,7 хувиар өссөн үзүүлэлт юм.

Тэгвэл энэ оны эхний нэгдүгээр сард эмэгтэй хүн оролцсон хэрэг тодорхой хувиар өссөн үзүүлэлттэй байгаа хэдий ч сэжигтнээр шалгагдсан эмэгтэйчүүд 1.1 хувиар буурсан байна.

-Ер нь эмэгтэйчүүд ямар төрлийн гэмт хэрэгт холбогдох нь их байдаг вэ?

-Хулгай, танхайн гэмт  хэрэгт холбогдох нь их. Он гарсаар хүний амь насыг санаатайгаар хохироосон нэг эмэгтэй сэжигтнээр шалгагдаж байгаа. Мөн эмэгтэйчүүд согтуугаар танхайрч бусдын амгалан тайван байдлыг алдагдуулсан хэрэг цөөнгүй гарч байна.

-Галт зэвсгээр үйлдэгдсэн хэрэг хэр гарч байна?

-Галт зэвсгээр үйлдэгдсэн хэрэг 6,1 хувиар өссөн байна.  Энэ оны нэгдүгээр сарын байдлаар галт зэвсгээр үйлдэгдсэн хэрэг 6,0 хувиар өссөн үзүүлэлттэй байгаа. Дийлэнх хувь нь өөрийн эзэмшлийн галт зэвсгээр амь насаа хохироосон тохиолдол  байна. Өнгөрсөн амралтын өдрөөр хөдөө орон нутагт галт зэвсгээр цээжин тус газраа гэмтээсэн хэрэг гарсан. Энэ хэрэг шалгагдаж байгаа.