Жиоржио Армани одоо 77 настай. Алдарт дизайнер жилд 10 удаа загварын коллекциэ танилцуулж, Милан хотод Армани зочид буудлаа нээжээ. Түүний бага балчир үеийнх нь хоч нэрээс авахуулаад, содон биений өнгө, мөн түүний амьдралын талаар кино хийгдэхээр бол ямар жүжигчин тоглох хэрэгтэй вэ гэх мэт сэдвүүдийг хөндсөн ярилцлагыг хүргэж байна.

    Жиоржио Армани одоо 77 настай. Алдарт дизайнер жилд 10 удаа загварын коллекциэ танилцуулж, Милан хотод Армани зочид буудлаа нээжээ. Түүний бага балчир үеийнх нь хоч нэрээс авахуулаад, содон биений өнгө, мөн түүний амьдралын талаар кино хийгдэхээр бол ямар жүжигчин тоглох хэрэгтэй вэ гэх мэт сэдвүүдийг хөндсөн ярилцлагыг хүргэж байна.

-Загварынхнаас та хэнийг биширдэг вэ?

-Өөрийнхөө замналаар, өөрийн дуртай зүйлээ хийгээд явж байгаа, мода гэдэг зүйлийг тас мартаад, өөрийнхөө талбар дээрээ явж байгаа хэн бүхнийг. Маргиела [Мартин], Алаиа [Аззедин] гэх мэт хүмүүс. Би зорьсондоо үнэнч, ёс суртахуунтай хүмүүст дуртай.

-Одоо үеийн загварын ертөнцийн байдлыг хараад хамгийн их шүүмжилмээр зүйл гэвэл?

-Загварын ертөнцөд байдаг 2 зүйлд би дургүй. Эхнийх нь хүчээр гаж загвар бий болгох гэсэн байдал. Хувцаслах хэв маягтаа этгээд сонин байдлыг оруулах гэж хичээсэн дэмий хэрэгцээнд би дургүй. Миний ертөнцөд байдаггүй, миний дургүй нөгөө нэг зүйл нь хүмүүс өнгөрсөнийг ухан гаргаж өнгөрсөн загваруудыг сэргээдэг байдал юм.

-Хэн нэгэн таны амьдралын талаар кино хийхийг хүсвэл Жиоржио Арманигийн дүрийг хэн бүтээгээсэй гэж хүсэх вэ?

-Бие бялдрын талаасаа гэвэл Етан Хоук над шиг харагддаг юм шиг санагддаг. Дээрээс нь тэр олны өмнө бүх амьдрал нь ил болсон од биш, мөн сонин сэтгүүл дүүргээд байдаггүй болохоор. Тэр жүжигчин, од хоёрын хоорондох заагийг зөв барьдаг. Харни сэтгэл зүйн талаасаа Шон Пенн таалагддаг шүү.

-Та далайн эрэг дээр очоогүй үедээ ч үргэлжийн наранд шарсан юм шиг бор биетэй байдаг. Яаж иймээрээ байдаг вэ?

-Яаж иймээрээ байдгаа мэдэхгүй юм. Гэвч би үргэлж өнгөө хэвээр нь байлгаж чаддаг, өвлийн улиралд ч мөн адил. Би маш эрүүл хооллодог.

-Та хэнтэй оройн хоол идэхийг хүсэх байсан бэ? Амьд эсвэл нас барсан нэгэн байж болно.

-Коко Шанел байх байсан. Яагаад гэвэл түүнгүйгээр орчин цагийн эмэгтэйчүүдийн хувцасны шүүгээ гэх зүйл байхгүй байх байсан.

-Таны хувьд хамгийн том амжилт байсан гэж боддог зүйл тань юу вэ?

-Миний хувьд олон салбарт амжилт гаргасан гэж болно. Санхүүгийн тал дээр ч, загварын тал дээр ч, мөн хувь хүний хувьд ч амжилтанд хүрч байсан үеүд байгаа. Би маш олон зүйлээр бахархаж явдаг.

-Гэрт тань байдаг таны дуртай зүйл юу вэ?

-1995 онд найз Эрик Клэптоны минь дурсгасан Матиссын зурганд би их хайртай. Зөвхөн агуу мэдрэмж төрүүлдэг гэсэн утгаараа биш энэ зурагны бүх юм нь төгс зохицсон нь надад их таалагддаг. Гүн ухааны энгийн байдлыг жинхэнэ утгаар нь харуулсан урлагийн бүтээл юм.

-Та хочтой юу?

-Ээж намайг Жиоржино гэж дууддаг байсан.

-Одоо ч таныг Жиоржино гэж дууддаг хүмүүс байдаг уу?

-Үгүй ээ. Би энэ нэрийг үзэн яддаг.

-Таны дуртай кино?

-Тухайн киноны утга учраас шалтгаалдаг учраас надад маш олон дуртай кино байдаг. Гэвч яг одоо бол санаанд орж ирж байгаа нь Blade Runner байна. Энэ кино 80-аад оны үеийн гоо зүйг тусгаж харуулсан учраас надад таалагддаг. Энэ нь яг үнэндээ 40-өөд оны үеийн гоо зүй болон үүнд тавьж байсан хориг зэргийг харуулсан байдаг юм.

-Танд хамгийн их сэтгэл ханамжийг өгдөг зүйлс юу вэ?

-Амьдралд минь байдаг олон хүмүүстэй миний бий болгосон илэн далангүй, үнэнч харилцаа юм даа.

-Та хуучин дизайнуудаасаа өмсдөг үү, эсвэл дандаа хамгийн сүүлийн загварын Армани өмсөж байна уу?

-Би ихэвчлэн хольж өмсдөг. Өнөөдөр гэхэд Yohji Yamamoto өмссөн байна.

-Танд нийт хэдэн футболка байдаг вэ?

-Хэдэн зуун. Тэгээд бүгд цэнхэр өнгийн.

-Oдоо эргээд харахад таны коллекцид байхгүй байсан ч болоосой гэмээр загвар байдаг уу?

-Хувцас загвар өөрчлөгдсөн, би ч мөн адил. Загвар байнгын хөгжил дэвшилтэнд байна. Зарим зүйлс тухайн үедээ сайхан харагддаг байсан бол одоо тийм ч сайхан биш юм шиг харагддаг. Тэгэхээр тийм гэж болно. Би одоог хүртэл хуучраагүй бүх загвараа үлдээгээд бусдыг нь загварын коллекцоосоо арчиж хаяхыг хүсэх л байсан. Би өнөөдөртөө л амьдрахыг хүсдэг.

-Загварыг тань өмссөн нь танд тун ч сайхан харагдаж байсан хүн хэн бэ?

-Жоди Фостер. Анх Армани өмсөж эхэлж байх үедээ.

-Танд хамгийн их нөлөөлсөн хүн хэн бэ?

-Би.