2011 оны аравдугаар сард Christina Aguilera таван жил амьдарсан хөгжмийн продюсер нөхөр Жордан Братменээс салж олныг цочирдуулсан. Бас дараахан нь тэрбээр “Burlesque” кинонд тоглоод амжсан. Үзэсгэлэн төгөлдөр, авьяаслаг бүсгүйн “People” сэтгүүлд өгсөн ярилцлагыг хүргэе.

    2011 оны аравдугаар сард Christina Aguilera таван жил амьдарсан хөгжмийн продюсер нөхөр Жордан Братменээс салж олныг цочирдуулсан. Бас дараахан нь тэрбээр “Burlesque” кинонд тоглоод амжсан. Үзэсгэлэн төгөлдөр, авьяаслаг бүсгүйн “People” сэтгүүлд өгсөн ярилцлагыг хүргэе.

Та нөхрөөсөө салаад удаж байна. Жилийн өмнө ямар байсан, бас одоо ямархуу байна даа?
Энэ бүхэн амаргүй байсан. Нэг шөнийн дотор өмнөх амьдралаа мартах боломжгүй шүү дээ. Гэхдээ би азтай хүн. Намайг ээж, дотны найзууд маань дэмжиж байгаа. Бүр орноосоо ч босмооргүй санагдах үед тэдний сэтгэлийн үг, дэмжлэг намайг эрч хүчтэй болгосон.

Асуудлаа шийдэхийн тулд нөхөртэйгээ сэтгэл зүйчид хандсан уу?
Би Жорданыг хүндэлдэг. Тиймээс зарим зүйл нууц хэвээр үлдсэн нь дээр болов уу. Амьдрал үргэлжилж байна. Аливаад эрүүл ухаанаар хандахад хүү минь надад их тусалдаг. Хүүгийн маань аз жаргал хамгаас чухал учир одоо миний хувьд түүнийгээ хамгаалах нь юу юунаас эрхэм.

Энэ их ажлын хажуугаар ээж хүний ажлаа яаж зохицуулж байна?
Миний амьдрал тодорхой үе мөчлөгтэй байдаг. Цомог гарна, дараа нь аялан тоглолт эхэлнэ. Би өдөр бүр өглөө 9-с оройн 17 цаг гэсэн ажлын цагтай, нэгэн хэв маягийн амьдралаар амьдарч чадахгүй юм шиг байгаа юм. Надад гэнэтийн зүйл, өөрчлөлт маш их хэрэгтэй байдаг. Тэгж байж би шинийг бүтээх эрч хүч, урам зоригтой болдог. Одооноос би хүүдээ энэ амьдралыг мэдрүүлж, ойлгуулахыг хүсэж байна. Maкс надтай адил аялагч хүн. Байнга л буудал дамжин амьдарч байгаа болохоор хүү маань бараг дасч байх шиг байна.

Хүүдээ бүүвэйн дуу дуулж өгдөг биз дээ?
Би хүүдээ Мэри Поппинс киноны дуунаас дуулж өгөх их дуртай. Бас бид хоёр дуу зохиогоод дуулдаг. Барын тухай ч юм уу сансрын нисгэгчийн тухай дуулж эхлэхэд хүү маань үргэлжлүүлээд дуулчихдаг. Намайг “Жаалхүүгийн тоглох дуртай тоглоом нь ...” гэхэд Maкс “Машин!” гэж хэлэх жишээтэй.

Ээж байхын хамгийн хэцүү нь юу вэ?
Би маш их тэвчээртэй болсон. Саяхан болтол хүү маань аймшигтай үймүүлдэг байсан. Ерөөс зүгээр суухгүй шүү. Харин одоо надад их сонирхолтой санагддаг болсон. Яагаад гэвэл хүү маань өөрийгөө илэрхийлж эхэлж байна. Maкс намайг их үнсдэг. Үнсэх дуртай л даа. Өнөөдөр жишээ нь түүний сонирхлыг миний уруул дээрх цоорхой (Dirrty үеийн пирсингээс үлдсэн дурсамж) ихэд татсан. “Ээжээ энэ нүх байна!” гэснээ “Зүгээр болох уу?” гэж асууж байх юм. Би “Үгүй” л гэж хариулсан. Одоохондоо үүнээс илүү юм мэдэх шаардлагагүй (инээв). Насанд нь тохирсон л хариу байгаа биз дээ.

Ээж болсон хойноо илэн далангуй секси имиджээ хадгалах хэцүү юу?
Миний хувьд үгүй. Би тэс өөр хоёр амьдралаар амьдарч байгаа хүн. Хүүгээ унтуулахдаа би “Сайхан зүүд зүүдлээрэй. Ээж нь хүүдээ хайртай шүү” гэж хэлдэг. Тэгээд би студи рүүгээ явж дуулдаг. Миний хөгжим таалагдахгүй байвал цаашаа тонил гэж хэлж чаддаг. Энэ бол би. Би өөрийгөө эмэгтэй хүн гэдгээ мэдэрч амьдрахыг хүсдэг. Би зөвхөн эх хүн биш. Зөвхөн дуучин хүн ч биш. Бас би эмзэг хүн. Байгаагаараа байх дуртай. Бусдад таалагдах гэж өөрийгөө эвдэх их дургүй. Миний хүү ээжийгээ зүрх сэтгэлээ дагаж амьдарч байгааг, зөв гэж бодсоноо хийж, өөрийгөө дуу хөгжмөөрөө илэрхийлж явааг харж өсөөсэй гэж хүсдэг. Хүчтэй эмэгтэй хүнийг хайрлаж, бас хүндэлдэг эр хүн болоосой гэж хүсэж байна.

Та НҮБ-ын Дэлхийн Хүнсний Байгууллагын элчээр ажиллаж байгаа. Гэтэл энэ үйл ажиллагааны тухай мэдэх хүн цөөн...
Ийм их хэмжээний мөнгө босгож чадсанд бид маш их бахархаж байгаа. Дэлхий дээр тэрбум гаруй хүн хоол хүнсээр гачигдаж байгаа гэсэн статистикийг мэдээд анх би их эмзэглэсэн. Тэдний ихэнх нь хүүхэд, эмэгтэйчүүд. Өлссөнөөс болж секунд тутамд нэг хүүхэд нас барж байна гэдэг аймшигтай. Би ч гэсэн эх хүн учир энэ ажлаас татгалзаж чадаагүй. Хэдэн хүнд ч гэсэн амьдрал хайрлаж байгаадаа би их аз жаргалтай байгаа.

Арван жилийн дараах өөрийгөө хэрхэн төсөөлдөг вэ?
Дахин нэг кинонд тоглоод, хэдэн шинэ цомог гаргаад, тэгээд хоёр дахь хүүхдээ гаргасан байх болов уу. Би 30 настай. Өөрийгөө шинжих үедээ ирээд байна. Би хэн бэ, юу туулж ирсэнээ, одоо хаашаа явж байгаагаа хөгжмөөр илэрхийлэх хүсэл оргилж байна. Надад хэлэх юм зөндөө байна.