-Миний дүү яаж зугтаж гарав. Энэ тухайгаа яриач?

-Намайг хулгай хийсэнгүй гэж зоддог ах нэг эгчтэй юм яриад зогсож байхаар нь хашаанаас хар хурдаараа гараад гүйсэн. Ардаас "Хүрээд ир, чи. Ирэхгүй бол зодно шүү" гээд орилсон ч би гүйгээд л байсан. Гүйж байгаад зам руу харсан чинь автобус зогсч байсан. Тэгээд автобусанд суугаад удалгүй цагдаагийн машин харагдахаар нь нэг буудлын дараа буучихсан юм. Гэтэл намайг манадаг байсан эгч араас бариад авсан. Яагаад тийм хурдан ирснийг мэдэхгүй. Тэр "Чи яагаад зугтааж байгаа юм. Баригдахгүй гэж бодоо юу?" гээд алгадаад бас бөөр рүү хүчтэй цохисон. Тэгснээ "За, ээжийгээ санаад байгаа бол яв" гэхээр нь баярлаад хар хурдаараа гүйчихсэн. Цагдаагийн машин хол байсан ч гүйсээр байгаад очиж хэлсэн.

-Чамайг хаана явж байхад тэр хүмүүс аваад явчихсан юм бэ?

-Би өнгөрсөн пүрэв гаригт хичээл орохгүй, амарчихсан гэдгээ мартаад сургууль дээр оччихсон юм. Манаач ах "Хичээл орохгүй" гэхээр нь гэртээ харихаар явж байтзл замд нэг эгч "Гэрэл ээ, ах чинь чамайг аваад ир гэсэн" гээд ахын нэрийг хэлээд саарал өнгийн машин руу дагуулж очсон. Гэтэл ах машинд байгаагүй, харин огт танихгүй хөгшин ах сууж байсан. Тэгэхээр нь би хүн хулгайлдаг хүмүүс байж магадгүй гэж бодоод "Үгүй, би харилаа" гэсэн чинь нөгөө ах намайг тэврээд машиндаа суулгачихсан. Замдаа уйлсан ч буулгаагүй. Бас намайг ямар ч хүн олж хараагүй. Тэр ах, эгч хоёр явсаар байгаад нэг хашаанд ирсэн. Тэгснээ байшинтай айлд ороод "За хүүхдийг чинь аваад ирлээ. Аваарай" гэж хэлснээ өөрсдөө урд байсан гэр рүү яваад орчихсон.

-Магадгүй чиний тань-даг хүн юм биш биз. Өмнө нь харж байсан хүмүүс үү?

-Харж байгаагүй.

-Тэд чамайг зоддог байсан уу. Тэнд хэдэн хүн байсан бэ?

-Эхний өдөр уйлаад байхад явуулахгүй байсан. Бас хоол өгөөгүй.Тэнд надаас гадна гурван охин, хоёр банди байсан. Тэдний хоёр ньтэр муухай ах, эгч нарын хүүхэд нь бололтой "Аав, ээж" гэж дуудаж байсан. Харин нөгөө гурав нь "Ах, эгч" гэдэг байсан. Тэгээд нөгөө муухай том ах биднийг дагуулаад 6 бас 1-ийн тоотой автобусанд суусан. Суугаад гурав билүү дөрвөн буудал яваад нэг зах дээр ирсэн. Тэр захын хажууд том шат байсан. /Ээж нь хажуугаас Хархорин захыг хэлж байгаа юм гэв./ Зах дээр ирээд надад юм хулгайл гэхээр нь дуугүй зогсоод байсан. Тэнд хажуугаар зөрсөн хүмүүст хэлээд зугтаачих юмсан гэж зөндөө бодсон. Даанч чадаагүй. Харин надтай хамт явсан хоёр хүүхэд ном хулгайлсан байсан. Гэрт ирээд намайг юм хулгайлсангүй гээд бөөр рүү өшиглөсөн. Зөндөө их өвдсөн. Уйлахаар огт тоохгүй. Бас "Есүсийг шүт" гэж загнаад байсан.

-Чамтай хамт байсан хүүхдүүд гэрээ санаж байна, зугатах юмсан гэж хэлж байсан уу?

-Тэр хүүхдүүд муухай ах, эгчээс айхгүй байна лээ. Дасчихсан юм шиг. Тэгээд ч тэр хүүхдүүдэд хоол, цай өгөөд надад болохоор талхнаас өөр юм өгөөгүй. Бас тэр хүүхдүүд орон дээр, намайг газар унтуулсан.

-Тэр хүмүүс хоорондоо юу гэж ярих юм?

-Тэнд гурван ах, гурван эгч байсан. Бас хөгшин эмээ байсан. Тэд юм ярихдаа надаас холдож ярьдаг. Надад өмнө нь зугтах боломж олдоогүй. Би ээж, ах, дүүтэйгээ эргээд уулзсандаа баярлаж байна. Дахиад тийм муухай ах битгий таараасай. Одоо хаашаа ч явсан ээжээсээ салахгүй. Гэхдээ л тэр муухай хүмүүсээс айж байна.

Охины ээж Загдрагчаа:

-Траншейн руу уначихсан юм болов уу гэж онгорхой нүхээр хүртэл шагайж явлаа. Одоо л нэг юм сэтгэл тайвширч байна. Харин охинтой маань таван хүүхэд байсан гэнэ. Тэр хүүхдүүд хэний хүүхэд нь тодорхойгүй. Хүүхэд нь гэрээсээ дайжсан айл байвал үр хүүхдээ сураглаасай. Тэнд хүүхдээр нь хулгай хийлгээд хооллож, ундалж байж мэднэ шүү дээ. Цагдаа нарын тогтоосноор тэнд байсан хоёр хүүхэд 1-2 сар болж байгаа гэсэн.

-Охин тань жижигхэн биендээ баймгүй зориг гаргасан байна шүү дээ?

-Аав нь хоёр настай байхад нь бурхан болсон. Их хэрсүү, ээжийгээ зовоохгүй өсч байгаа хүүхэд. Нялх ч гэсэн хулгайч нарын гараас зугтсан юм шүү дээ. Би ингэ, тэг гэж загнаад байдаггүй ч юманд их хүлээцтэй хандаж том хүн шиг зан гаргана. Тэр байтугай цагдаа нарт хулгайч нарын гэрийг шууд заагаад өгчихөж байсан.

-Гэмтэл шарх байна уу. Эмнэлэгт үзүүлсэн үү?

-Анх ирэхдээ уруул нь хавдаад шанаа нь хөхөрсөн байдалтай ирсэн. Тэр хүмүүс их зальтай. Охиныг маань битүү зодсон байна лээ, Зодохдоо дандаа элэг рүү нь цохисон байгаа юм. Бид шүүх эмнэлэгийнхэнд үзүүлсэн. Хариу нь хараахан гараагүй байгаа. Эмэгтэй хүүхэд учраас юмыг яаж мэдэх вэ гээд эмэгтэйчүүдийн эмнэлэгт үзүүллээ. Аз болоход хүчирхийлээгүй байна. Гэхдээ гаж байдлаар хүчирхийлсэй байж мэднэ. Надад зарим зүйлээ ярихгүй юм. Цагдаад хэлэх байх гэж найдаж байна. Эцэг, эхчүүд үр хүүхдэдээ анхаарал сайн тавиарай гэж хэлье. Үнэхээр аймшигтай юм билээ. Охингүй өнгөрөөсөн гурав хоног надад аймшигтай байлаа.