Өнгөрсөн амралтын өдрөөр гарсан гэмт хэргийн гаралт хэр байсан талаар ЦЕГ-ын Хэвлэл мэдээллийн төвийн ажилтан Б.Саруултуяагаас тодрууллаа.
    Өнгөрсөн амралтын өдрөөр гарсан гэмт хэргийн гаралт хэр байсан талаар ЦЕГ-ын Хэвлэл мэдээллийн төвийн ажилтан Б.Саруултуяагаас тодрууллаа.

-Өнгөрсөн амралтын өдрөөр гэмт хэргийн гаралт хэр байв?

-Энэ сарын 8-11-нд шилжих өдрүүдэд хүний амь нас санаатайгаар хохироосон хэрэг нэг, бусдын биед гэмтэл учруулах хэрэг дөрөв, хүчингийн гурван хэрэг, хулгайн 29 хэрэг, дээрмийн таван хэрэг, танхайн 36 хэрэг, золгүй байдлаар амиа алдсан хэрэг 12 бүртгэгдсэн байна.

-Нэгэн дэлгүүрт хулгай орж их хэмжээний мөнгө алдагдсан хэрэг гарсан гэсэн. Үүнийг тодруулбал?

-Тийм. Баянзүрх дүүрэгт гарсан. Тус дүүргийн тавдугаар хороонд байрлах   “Best” дэлгүүрийн цонхыг эвдэлж ороод хоёр давхарт байрлах оффист орж сейфийг нь ухаад 85.400 ам доллар, гурван сая төгрөгийг нь хулгайлсан хэрэг гарсан. Уг дэлгүүр манаачтай хэдий ч камерийн хяналтгүй байсан. Мөн Сонгинохайрхан дүүргийн 14 дүгээр хороонд ломбарданд хулгай орж, нөөтбүүк долоон ширхэг, мөнгөн аяга 14 ширхэг, 34 ширхэг гар утсыг хулгайлсан байсан. Уг ломбард камерийн хяналтгүй, харуул хамгаалалтгүй байсан.

-Золгүй байдлаар амиа алдсан хэрэг их гарсан байна?

-Тийм. Золгүй байдлаар амиа алдсан 12 хэргийн хоёр нь архи уугаад унтаад амиа алдсан хэрэг. Тав нь осгож нас барсан байсан.

-Тодруулбал?

-24 настай эрэгтэй Б архи уугаад гэртээ ирээд унтаад нас барсан. Мөн 39 настай эмэгтэй З гурван өдөр дарааллан архи уугаад унтаад нас барсан байсан. Түүнчлэн Хөвсгөл аймагт 52 настай Г морьноос унаж амиа алдсан. Бага насны хүүхэд ч амиа алдсан хэрэг бүртгэгдсэн.

-Тухайлбал?

-Эцэг эхийн хайхрамжгүй байдлаас болж, бага насны хүүхэд амиа алдах хэрэг цөөнгүй гарч байгааг цагдаагийн байгууллагаас анхааруулсаар байна. Гэвч энэ төрлийн гэмт хэрэг буурахгүй байна. Өнгөрсөн амралтын өдрөөр Баянгол дүүргийн тавдугаар хороонд 11 сартай хүүхэд цэлцэгнүүрэнд гахаж амиа алдсан. Мөн Сүхбаатар дүүргийн Эрүүл мэндийн нэгдлийн үүдэнд 3 сартай хүүхдээ орхиж явсан хэрэг гарсан.

-Ээжийг нь баривчилсан уу?

-Хүүхдийг аав нь буюу 28 настай Ц үлдээснийг цагдаагийн алба хаагчид шалгаж байгаа.

-Одоо хүүхэд хаана байгаа вэ?

-Эх нялхасын төвд хүлээлгэн өгсөн. Эмчилгээ хийлгэж байгаа.

-Амиа хорлосон хэрэг гарсан уу?

-Гарсан. Өмнөговь аймагт 41 настай эрэгтэй Ү өндөр хүчдэлийн шонгоос өөрийгөө боомилж амиа хорлосон байсан. Мөн Сүхбаатар дүүргийн 11 хороонд Япон улсын иргэн 73 настай эмэгтэй М өөрийгөө боомилсон хэрэг гарсан.