Зуун мянган айлын орон сууц захиалагчид өчигдрөөс Сүхбаатарын талбай жагсаал хийж эхэлсэн билээ. Жагсаал хийж буй эдгээр иргэд Засгийн газрын тогтоолоор батлагдсан “100 мянган айлын орон сууц” хөтөлбөрт хамрагдахаар материалаа өгсөн ч зээлийн санхүүжилт нь шийдвэрлэгдээгүй байна. Уг хөтөлбөрийн шаардлагыг бүрэн хангаж, материалаа өгсөн иргэдийн захиалга өгсөн байр нь өнгөрсөн оны 10-12 сарын хооронд ашиглалтанд орсон байна. Гэсэн ч зээлийн санхүүжилт нь шийдэгдээгүйн улмаас барилгын компаниуд энэ оны хоёрдугаар сараас эхлэн алданги тооцож, энэ сарын 15 гэхэд гэрээг нь цуцлахаа албан ёсоор мэдэгджээ.

Гэрээг нь цуцалсан тохиолдолд дээрх иргэд урьдчилгаа төлбөрөө 10-20 хувийн алдагдалтайгаар буцаан авах аж. Тиймээс эдгээр хүмүүс Засгийн газар, Төрийн банк гээд холбогдох байгууллагуудад нь хүсэлт, шаардах бичиг хүргүүлсэн боловч өнөөдрийг хүртэл асуудлыг нь шийдэж өгөөгүйн улмаас эмчийн хяналтанд орж, өлсгөлөн зарлахад шаардагдах бүхий л арга хэмжээг авсаны дараа энэ лхагва гарагт өлсгөлөнгөө албан ёсоор эхлэхээр болоод байгаа юм. Зургаан хувийн хүүтэй байрны зээлд хамрагдаж чадаагүй иргэд Засгийн газарт өөрсдийнх нь хүссэн зээлийн санхүүжилтийг нэн даруй шийдэж өгөх, Засгийн газар, барилгын компани болон иргэдийн төлөөллийг байлцуулан зээл шийдвэрлэх явцад алданги тооцолгүйгээр байранд нь оруулж өгөхийг шаардаж байгаа юм байна. Тэдний суулт цуглааныг дэмжиж ирэгсдийн тоо нэмэгдсээр байгаа бөгөөд урьдчилсан байдлаар найман хүн өлсгөлөн зарлахаар гарын үсгээ зурж эрүүл мэндийн шинжилгээ хийлгэсэн байна.

Орон сууцтай болохын тулд хашаа байшин, машин тэргээ зарж чемодантай хувцсаа бариад ах дүү нарынхаараа толгой хорогдож сүүлдээ арга мухардаж ийнхүү өлсгөлөн зарлахад хүрлээ гэдгээ тэд ярьж байсан юм.  Жагсаалд биечлэн оролцож байгаа Г.Сувдтай ярилцлаа. 

- Та бүхэн шаардлагаа хэнд хүргүүлсэн бэ? Холбогдох газраас ямар нэгэн хариу өгсөн үү?

-  Бид холбогдох бүхий л албан байгууллагад гомдол, хүсэлтээ өгсөн боловч албан хариу өгөлгүй өдий хүрлээ. Өөр сонголтгүй болсон учраас жагсаал зохион байгууллаа. Өнөөдөр бид Н.Алтанхуяг сайдын туслахад шаардлагаа өгсөн. Хариу нь иртэл тодорхой хугацаа шаардагдах юм шиг байна. Өлсгөлөнгөө гурав хоногийн дараа эхэлнэ гэж төлөвлөж байна. Н.Алтанхуяг сайдаас ирэх хариуг хүлээж байна.

- Ойрын хугацаанд хэзээ хариу өгнө гэсэн бэ?

- Яг тодорхой хугацаа хэлээгүй. Би төрийн ордон руу ороод хүсэлтээ өгсөн. Тэгэхэд өлсөж цангах нь та нарын эрх гэсэн утгатай зүйл ярьж байна лээ.

- Хэн тэгэж хэлсэн юм бэ?

- Барилга хот байгуулалтын яамны өндөр албан тушаалтай Эрдэнэцэцэг гэдэг эмэгтэй тэгэж хэлсэн. 

- Та бүхний хувьд хэдэн төгрөгний хохирол амсаад байна вэ?

- Урьдчилгаанд өгсөн мөнгөө алдангид суутгуулаад урьдчилгаа мөнгөгүй болчихоод байна. Мөн огт байргүй үлдэх гээд байна. Бид хашаа байшингаа зарчихсан орон гэргүй хүмүүс. Байрныхаа урьдчилгаа 10-30 хувийг өгсөн. Байрныхаа үнийн дүнгээс хамаараад 10-20 сая төгрөг өгсөн. Бидний орох байр ашиглалтанд эрт орсон байгаа. Бид нарын зээлийн асуудал шийдвэрлэгдтэл хүлээлт үүсээд байгаа учраас гэрээ цуцлах асуудал тулгараад байгаа юм. Н.Алтанхуяг сайдтай манай төлөөлөл утсаар холбогдоход “4 мянган 35 хүний нэрэнд та бүгдийн нэр байхгүй учраас асуудал үүсээд байгаа юм уу” гэсэн. Бид нарын нэр байгаа шүү дээ. Энд анхан шатны шаардлага хангасан хүмүүс яваад байгаа юм.

- Лхагва гаригт өлсгөлөн зарлана гэж байсан. Холбогдох байгууллагаас та нарыг өлсгөлөн зарлаж болно гэсэн зөвшөөрлийг өгсөн юм уу?

- Өлсгөлөн зарлах гээд бэлдээд явж байна. 200 гаруй хүнээс төлөөлөөд 8 хүн өлсгөлөн зарлана. Гэхдээ өлсгөлөн зарлах хэмжээнд арай ч хүргэхгүй байлгүй дээ гэж бодож байна.

-  Та бүхэн орон сууцанд орох бүрдүүлэх материалаа хэзээ бүрдүүлж өгсөн бэ?

- Бид нар зургаан сараас хойш материалаа бүрдүүлж өгсөн. Дөрвөн сар тууштай хөөцөлдөж байхад бидний асуудлыг шийдвэрлэж өгөхгүй байна. Бид нар маш их хохироод байна. Хаягжилт ч үгүй болчихоод байна. Миний хувьд өмнө нь Баянзүрх дүүрэгт амьдарч байсан. Одоо Баянгол дүүрэгт албан ёсоор ороогүй учраас тодорхой хаяггүй төрийн үйлчилгээ авах ч боломжгүй болчихоод байна. Баянзүрх дүүргээсБаянгол дүүргийн цэцэрлэг рүү хүүхдээ шилжүүлэх гэхээр тодорхой хаяггүй учраас болохгүй байна. Тэгээд л хүүхдээ хаа холын Баянзүрх дүүрэг рүү зөөж байна. Барилга хот байгуулалттын яам огт ажлаа хийхгүй байна.

- Чухам яагаад ажлаа хийхгүй байна гэдэг дүгнэлтэд хүрэв?

- Бид нар барилга хот байгуулалттын яаманд 11 сараас хойш таван удаа албан бичиг хүргүүлсэн. Тэгэхэд ямар ч хариу өгөөгүй. Уулзая гээд очиход өглөөнөөс орой болтол хүлээлгэдэг. Гэтэл ерөнхий сайд ярихдаа “Манай барилга хот байгуулалтын яам иргэдтэйгээ байнга уулздаг” гэсэн. Бид нар ажил төрлийнхөө цагийг алдаад ингээд явж байна. Биднийг халамж хүсээгүй зээл хүссэн хүмүүс гэдгийг ойлгоосой. Ажилтай, орлоготой эргэн төлөх чадвартай хүмүүс шүү дээ. Гэтэл биднийг халамж хүсч байгаа хүмүүс шиг өрөвдөлтэй байдалд оруулаад байх юм. Жинхэнэ нийгэмд үнэнч шудрага ажиллаж байгаа залуус биднийг яагаад дэмжихгүй байгаа юм.