МАХН-ын Нарийн бичгийн дарга Ч.Чимэдсүрэнтэй цаг үеийн асуудлаар ярилцлаа.
    МАХН-ын Нарийн бичгийн дарга Ч.Чимэдсүрэнтэй цаг үеийн асуудлаар ярилцлаа.

    -Өнгөрсөн амралтын өдрөөр танай намын Гүйцэтгэх товчооны хурал нэлээн ширүүхэн болж өнгөрсөн бололтой. Хуралд намын Ерөнхий нарийн бичгийн дарга Г.Шийлэгдамба Засгийн газарт ажиллаж байгаа сайд нарыг загнасан зэмлэсэн гэх мэдээлэл байгаа. Үүнээс болоод Хууль зүйн дэд сайд Э.Эрдэнэжамьяан сайдын суудлаас огцрох өргөдлөө өгсөн байсан?

    -Гүйцэтгэх товчооны хурал МАХН-ын байранд болж өнгөрсөн. Энэ хуралд Засгийн газарт ажиллаж байгаа сайд нараас хүн байгаагүй. Учир нь сайд нар тухайн үед хөдөө орон нутагт томилолтоор ажиллаж байсан. Сайд нараас ганцхан дэд сайд Э.Эрдэнэжамьяан л оролцсон. Манай нам сонгуульд үр дүнтэй оролцож, ялалт байгуулж, Засгийн эрхийг хамтраад бариад явж байна. Нэгэнт нам дотроосоо итгэл хүлээгээд тухайн албан тушаалд очсон бол үүнийгээ хийх ёстой болов уу гэж ойлгож байгаа. Мэдээж чадна гэж сайдын суудалд суусан. Тэгэхээр ажлаа хийх ёстой гэж үзэж байна. Түүнээс биш дураараа би өгчихье, би больчихье гэж болохгүй. Төрийн ажил бол тоглоом биш. Мэдээж Э.Эрдэнэжамьяан сайд асуудлыг энэ талаас нь харж байгаа байх.

    -Хуралд Н.Энхбаярын эхнэр О.Цолмон оролцсон гэх мэдээлэл цацагдаад байна?

    -Гүйцэтгэх товчооны хурлын гишүүдийг намын бага чуулганаас сонгож томилдог. Энэ хуралд Н.Энхбаяр даргын гэр бүл суух эрхгүй. Тэгэхээр хэвлэлээр гараад байгаа шиг О.Цолмон гуай хуралд суугаад сайд нарыг загнаад, зэмлээд байсан зүйл байхгүй. Ер нь аливаа улстөрийн хүчин, намд үзэл бодлын зөрүү, шүүмжлэл, саналын зөрүүтэй асуудал байна. Үүнийг л хэвлэлээр айхтар том болгоод, улстөржүүлээд байх шаардлагагүй болов уу?

    -Гүйцэтгэх товчооны хурал хаалттай болсон. Гэтэл хурлаар яригдсан бүх зүйл ил болчихлоо. Э.Эрдэнэжамьяан сайд өргөдөл өгсөн, О.Цолмон захиа бичсэн гээд л?

    -Э.Эрдэнэжамьяан сайдын өргөдлөө өгсөн асуудал нийгэмд маш хурдан ил болсон. Уг нь хурал хаалттай болсон. Тэгэхээр Э.Эрдэнэжамьяан сайдын асуудлыг ил болгосон хүн л тухайн өдөр болсон хурлын професс, Н.Энхбаяр даргын гэр бүлээс Гүйцэтгэх товчооны гишүүдэд хандсан захиаг бусдад хүргэсэн юм болов уу гэж ойлгож байгаа. Мэдээж энэ мэдээллийг хурлаас гаргасан хүнийг бид олж тогтооно. Шаардлагатай бол хариуцлага тооцно.

    -МАХН-ын дарга Н.Энхбаярын эрүүл мэндийн байдлын талаарх ЭМЯ-наас томилогдсон эмч нарын үзлэгийн дүгнэлт гарсан байна. Цаашид танай намын зүгээс ямар арга хэмжээ авах гэж байна?

    -МАХН-ын дарга Н.Энхбаяр бол МУ-ын Ерөнхийлөгч, Ерөнхий сайд, УИХ-ын дарга зэрэг төрийн өндөр албан тушаал хашиж байсан хүн. Мэдээж энэ хүнд амьд явах, биеэ зайлшгүй эмчлүүлэх эрхтэй. Үүнийг Үндсэн хуулинд ч заагаад өгсөн байгаа. Тэгэхээр зайлшгүй эрчимт эмчилгээнд орох шаардлагатай байна. Өөрт нь тулгасан хилс хэргийг эсэргүүцэж, арав гаруй хоног өлсгөлөн зарласан. Үүнээсээ шалтгаалаад биеийн дотоод эрхтнүүдийн бодисын солилцоо алдагдаж, улмаар эд эсийн задрал гэдэг онош гарсан. Үүнийг эмчлэх боломж манай улсад байхгүй. Мөн манай улс эрүүл мэндийн чиглэлээр технологи нь хоцрогдолтой. Мэргэжилтэн боловсон хүчин байгаа ч техник, тоног төхөөрөмж нь дутагдалтай. Тиймээс Н.Энхбаяр даргыг зайлшгүй гадаад улсад эмчлүүлэх шаардлагатай гэдгийг эмчлэгч эмч нарын зүгээс гаргасан гэж бид ойлгож байна. Мөн манай намын зүгээс ч Н.Энхбаяр даргыг өндөр хөгжилтэй, технологи сайн хөгжсөн, эрүүл мэндийн чиглэлээр дэлхийд тэргүүлдэг улс орнуудад явуулж, эмчлүүлэх энэ хүсэлтийг холбогдох байгууллагуудад албан ёсоор гаргаж тавина.

    -Хууль зүйн сайд Х.Тэмүүжин үүнийг боломжгүй гэж мэдэгдсэн?

    -Хууль зүйн сайдын нээлттэй хэлэлцүүлгийн үеэр боломжгүй гэж хэлж байхыг сонссон. Гэхдээ хуулиар бүх асуудал шийднэ. Хууль яах гэж байдаг юм. Хууль бол тухайн иргэнийхээ төлөө үйлчилдэг. Тухайн иргэнээ ямар нэг байдлаар хамгаалдаг, өмгөөлдөг энэ чиглэлээр үйлчилдэг нийтээрээ тогтоосон дэг журмын асуудал шүү дээ. Би яг онолын хувьд тайлбарлах мэргэжлийн хүн биш учраас хэлж мэдэхгүй. Хамгийн гол нь хүнийг л энд дээдэлж үзэх ёстой. Эрхээ хасуулсан байгаа тэр хүмүүс ч гэсэн биеэ эмчлүүлэх эрхтэй.

    -Эрх гэхээр гадаадад эмчлүүлэхээс арай өөр асуудал байх л даа. Эрхээ эдлээд хоёрдугаар эмнэлэгт эмчлүүлж байгаа гэж ойлгож байна?

    -Гадаад эмчлүүлэх ямар боломж байна. Үүнийг Хууль зүйн сайд судалж үзэх ёстой. Мөн Олон улсын гэрээ конвенцэд юу гэж заасан байна. Үүнийг ч мөн харах хэрэгтэй. Н.Энхбаяр даргын хувьд эгэл жирийн хүн гэхээсээ илүү, төрийн тэргүүнээр олон жил ажилласан гэдэг талаас нь хараасай. Мөн өмнөх Засгийн газруудын тогтоол байдаг. Тухайлбал, МУ-ын Төрийн тэргүүнээр ажиллаж байсан хүн эмчлүүлэх эрхтэй, эмчилгээ сувилгаанд хамрагдах эрхтэй гээд. Энэ эрх зүйн бичиг баримтыг аваад хараад зөв талаас нь харвал бүх бололцоо нээлттэй. Гэтэл Хууль зүйн сайд Х.Тэмүүжин заавал Ц.Нямдорж гэдэг хүний хар хуультай адилаар асуудлыг олж харах гээд байна.
 
    -Монгол банкны дэд ерөнхийлөгч Э.Батшугар намаас гарсан нь зөвхөн ажлын шаардлагаар гэж үү?

    -Төрийн өндөр албан тушаал хашиж байгаа хүн өөрөө аль нэг улс төрийн намын харьяалалд байх ёсгүй. Энэ дагуу л намын гишүүнчлэлээс бүрэн татгалзсан. Өөр зүйл байхгүй.

    -Дуучин С.Жавхлан ч танай намаас гарчихлаа. Үүнийгээ танай намынхан их зан гаргаж, өөрийг нь тоогоогүйгээс болсон гэж мэдэгдсэн?

    -Намаас гарах эсэх нь тэр хүний асуудал л даа. С.Жавхлан гарлаа гээд намын үйл ажиллагаа зогсохгүй. Гэхдээ үзэл бодлын хувьд нэг учраас байж байсан бол. Гэхдээ албан ёсоор өргөдөл, захиа алга. Ер нь Засгийн газарт цөөхөн төлөөлөл ажиллаж байгаа. Нам бүхлээрээ ажиллаагүй. Тэгэхээр үүнийг хэт туйлширч ойлгож болохгүй. Юуны түрүүнд хэвлэл мэдээллийн хэрэгслээр мэдээлэхээсээ өмнө нам дээр өөрөө ирж, уулзаад учир зүйгээ олоод тэгээд өргөдлөө өгөөд явбал бид ойлгоно. Түүнээс биш уулзаач үгүй, учраач үгүй, яах гээд байгаа нь, хаана байгаа нь мэдэгдэхгүй байж байгаад гэнэт өнөөдөр нэг юм ярьж байгаа нь улстөрийн шоу юм болов уу гэж харж байна.

    -Ерөнхийлөгчийн сонгуульд хэрхэн оролцох гэж байна. Сонгуулийн сургаар танай намыг хоорондоо зөрчилдөж байна гэх мэдээлэл цацагдаж эхэлсэн?