Өнөөдөр “Дэлхийн усны өдөр” тохиож байгаа билээ.   Энэ жил “Дэлхийн усны өдөр”- ийг угтан Хот, суурины ус хангамж, ариутгах татуургын ашиглалт, үйлчилгээг зохицуулах зөвлөл, Ус сувгийн удирдах газар, Орон сууц нийтийн аж ахуйн удирдах газар хамтран иргэдэд усны үнэ цэнийг ойлгуулж, усны зүй зохистой хэрэглээг сурталчилахаар “Усгүй ирээдүйгээр 2 цаг аялъя” арга хэмжээг зохион байгуулах гэж байгаа талаараа мэдээлэл хийлээ.

Энэхүү арга хэмжээ нь энэ сарын 24-ны өдөр 15.00-17.00 цагт  болох юм.

- Ус сувгийн удирдах газрын Үйл ажиллагааны хяналтын дарга Г.Батхишиг: Хоёр цаг крантаа  нээхгүй байснаар 10000 m3 ус нөөцөлнө.

-Гэртээ байгаа хоёр цаг крантаа  нээхгүй байснаар 10000 m3 усаа усны нөөц хомсдож байгаа ирээдүй үедээ үлдээх юм. Магадгүй бидний зарим нэг огт анзааралгүй явсан ус гэдэг үнэт эрдэнийн үнэ цэнийг ухаарахад энэхүү арга хэмжээ тус болно гэдэгт итгэж байна гэлээ.

-Хот, суурины ус хангамж, ариутгах татуургын ашиглалт, үйлчилгээг зохицуулах зөвлөлийн албаны дарга Ж.Гэрэлчулуун: Ус хямдхан учраас усны үнийг тэр бүр хэрэглэгчид мэдэрдэггүй

-Хүн бүр л ус чандмань эрдэнэ гэдэг боловч үнэндээ усны үнэ цэнийг мэддэггүй. Нэг ширхэг талхыг 800 төгрөгөөр авдаг байтал нэг литр усыг орон сууцны хэрэглэгч 30 мөнгөөр, гэр хорооллын хэрэглэгч 1 төгрөгөөр худалдан авдаг. Ус хямдхан учраас усны үнийг тэр бүр хэрэглэгчид мэдэрдэггүй гэсэн юм.

Дашрамд дуулгахад, Орон сууц нийтийн аж ахуйн удирдах газрын харьяа 21 конторын хүрээнд сар бүр усны хэрэглээг хянадаг аж. Энэ оны нэгдүгээр сарын байдлаар тоолуургүй өрхийн нэг хүний хоногийн усны хэрэглээ 255 литр/хоног, тоолууртай өрхийн хувьд 119 литр/хоног байгаа аж.

Тиймээс амьдралыг тэтгэгч усаа хайрлаж, хэрэглээ бүрээсээ дуслыг ч болов хэмнэцгээе гэж манай сайтын зүгээс уриалж байна.