Бодсон санаснаа дуугаараа илэрхийлчихдэг реппер Gee аль хэдийнээ олны танил болж чадсан нэгэн. Элдэв янзын хараалын үгтэй дуу дуулж урлагийн тогоонд ширүүхэн орж ирсэн реппер Gee-г энэ удаад ярилцлагынхаа зочноор урилаа.

-Бага насаа хаана өнгөрөөв. Өвөрхангай аймагт өссөн гэсэн үү?

-Манай аав цэргийн хүн байсан. Тухайн үед цэрэг хүн хаашаа явна гэр бүл нь дагаад явдаг байв. Ямар ч байсан багадаа  Шархаданд үртсэн зуухтай, таван ханатай гэрт амьдардаг байсан санагддаг.  Тэнд байж байгаад аав Өвөрхангайн 256 дугаар цэргийн ангид штабын даргаар томилогдсон. Ингээд аавыгаа дагаж Өвөрхангайн цэргийн ангид хоёрдугаар анги хүртлээ байсан. Намайг өсвөр насанд байхад реп бүжиг дэлгэрч байсан. 90-иэд оны дунд үед  “Одод болохын хүслэн” гэх тэмцээн болдог. Түүнд найзуудтайгаа хамтлаг болоод оролцдог байлаа.

-Багаасаа ном их уншдаг хүүхэд байсан гэж сонссон. Харин одоо ном уншдаг уу?

-Тухайн үед ном уншихаас өөр сонголт байгаагүй.  Одоогийнх шиг компьютер тоглоом, видео кино хөгжөөгүй. Телевизээр ч гоё зүйл бага гардаг байсан.  Номноос л мэдлэг, мэдээлэл бүх зүйлээ олж мэддэг байлаа. Одоо ч ном уншдаг.
 
-Хамгийн сүүлд ямар ном уншсан бэ?

-“Монголчууд Шаолинь сүмийнхэнтэй тулалдсан нь” гэдэг ном уншиж дуусаад,  "Манан" гэдэг Стивин Кингийн номыг уншиж байгаа.

-Арван жилийн аль сургуулийг төгссөн. Миний сонссоноор хамгийн олон сургууль дамжсан хүн юм шиг санагдсан?

-Нэг,  хоёрдугаар ангидаа Өвөрхангай аймгийн цэргийн сургуульд суралцсан. Гуравдугаар ангид Баянзүрх дүүргийн 53 дугаар сургуульд суралцаж, дөрөвдүгээр ангидаа нийслэлийн тэргүүний 44 дүгээр сургуульд суралцсан.  Харин тавдугаар “Монгол гурав”, зургаадугаар ангиа 80 дугаар сургуульд сурсан, долоо, наймдугаар ангиа 36 дугаар сургуульд,  ес, аравдугаар ангиа 81 дүгээр сургуульд тус тус төгссөн.

-Сэтгүүлч мэргэжил эзэмшсэн гэсэн үү?

-Хип хоп бол мэргэжил биш. Сэтгүүлч, зураглаач мэргэжилтэй. Хип хоп дуулж байгаагаа сэтгүүлчийн ажлаа хийж байна гэж боддог. Нийгмээс олж авсан мэдээллээ сэтгүүлч цаасан дээр буулгаж сонин, сэтгүүлээр хүмүүст хүргэдэг бол би дуугаараа илэрхийлдэг.

-Урлагт яг хэзээнээс хөл тавив. Багаасаа найз нартайгаа хамтлаг байгуулж байсан тэр үеэс үү?

-Би өөрийгөө урлагт орсон гэж боддоггүй.  Урлагт орох гэж мэрийж, хичээгээгүй.  Хүүхэд байхаасаа л хип хоп буюу гудамжны хэв маяг, гудамжны урлагийг сонирхож, дурласан. Өөрөөр хэлбэл, намайг хип хоп хөгжимд донтогч гэж хэлж болно.

-B.A.T буюу Батболдын хийдэг “ Free style battle”-д  орж байсан тэ?

- Тийм. Энэ тэмцээнд оролцоод тухайн сарынхаа ялагч болж байсан. 2005 онд дээд сургуулиа төгссөний дараа л эл тэмцээнд оролцсон санагдаж байна. Үүнээс өмнө ганц хоёр дуу, клип хийлгэдэг байсан ч FM, Радио авдаггүй байлаа. Гэхдээ энэхүү “battle”-д оролцсоноос хойш хүмүүст танигдаж эхэлсэн байх. 

-Үүнээс хойш B.A.T  дуунуудыг чинь продюсерлэж, хамтарч ажиллах болсон уу?

- B.A.T  миний эхний цомгийг продюсерлэж, аяны тал дээр ажилласан. Дуунуудынхаа үгийг би өөрөө зохиосон. Хоёр дахь, гурав дахь цомгоос өөр хүмүүстэй ажилласан байгаа.

-Өөр бас олон хүмүүстэй хамтарч уран бүтээлээ хийсэн байдаг байх аа?

-Хип хоп гэдэг янз бүрийн урсгал жанр руу хөрвөл хийж, янз бүрийн урсгал жанрыг өөртөө уусгавал илүү зохистой байдаг юм шиг байгаа. Тиймээс олон хүмүүстэй хамтарсан. Тухайлбал, “Жонон”хамтлагтай хамтарч цомог хийсэн. Мөн Тулгат, Rokit bay хоёртой хамтарч хийсэн дуу байна. Дуучин С.Нарантай мөн “Үг, аялгуу” гэх уран бүтээл хийсэн. Энэ дуундаа удахгүй клип хийлгэх болно.  Хамгийн гол нь авъяастай, чадвартай хүмүүстэй хамтардаг. Түүнээс биш нэртэй “од” байх нь хамаагүй.

-“Долдугаар сарын 1” кинонд тоглосон. Цаашид кинонд тоглох юмсан гэсэн бодол байна уу?

- Чамайг бүлэгтэй чинь иймэрхүү кинонд тоглуулая гэсэн санал тавьсан.  Ингээд хоороноо ярьж зохиолоо нийлж гаргасан. Одоо бодоход сайхан, сайхан дурсамжууд тэр кинотой бий. Одоогоор нэг киноны санал ирчихсэн байгаа. Тоглох үгүйгээ шийдээгүй л байна.

- “Click click boom” хамтлагаар ямар сонинтой вэ?

-“Click click boom” бүлэг анх 2006 оны арваннэгдүгээр сарын 18-нд байгуулагдсан. Үүнээс хойш “Үл хөдлөх хөрөнгө”  цомог, “Үл хөдлөх хөрөнгө” тоглолт,  “7 сарын 1” кино, АНУ-ын “Onux” хамтлагтай хамтарсан тоглолт, одоо хийгдэж байгаа цомгийн ажил гэх мэтчилэн хамтлаг маань хийсэн зүйл их бий. Монголын хип хопод тодорхой хэмжээгээр хувь нэмрээ оруулж байгаа залуус гэж бид өөрсдийгөө үнэлдэг. Хамгийн гол нь залуучуудад бид бүхэн эв нэгдлийн тод жишээ болж өгдөг болов уу. Байсан бүрэлдэхүүнүүрээ нэгдэж өдий болтол явж байгаа.

-“Үл хөдлөх хөрөнгө” цомог бас тоглолтын талаар?

-“Үл хөдлөх хөрөнгө” цомгийг бид сиди болгож хэвлэж чадаагүй. Бидэнд мөнгө байгаагүй. Интернетээр цомог болгож дуунуудаа өрөөд, цомгийнхоо ковер зургуудыг тавьсан. Файлаар нь цомог болгож, хүмүүст үнэгүйгээр тараасан байгаа. “Үл хөдлөх хөрөнгө” цомгийг гаргах боломж байсан ч тухайн үед нь дуунууд их алдагдсан. Бараг цомгийн бүх дуу алдагдсан. Удахгүй дараагийн цомог гарна. Энэ удаад сиди болгож хэвлүүлнэ. Цомог маань 15 дуутай байх болов уу даа.

-Уран бүтээлийнхээ ярианаас түр хазайгаад гэр бүлийнхээ тухай ярихгүй юу?
-Эхнэр, хоёр настай охины хамт амьдардаг.