Нийслэлийн Хүүхэд, гэр бүлийн хөгжлийн газраас энэ онд хэрэгжүүлэх үйл ажиллагааны чиглэлээ сэтгүүлчдэд танилцууллаа.
     Тэд ажлын төлөвлөгөөндөө олон шинэлэг зүйлийг тусгажээ. Үүнд, зуслан, хүүхдийн халамж, асрамжийн газруудын журмыг өөрчлөх тухай багтжээ. "Эрүүл аюулгүй хот" хөтөлбөрийн хүрээнд хүүхдэд ээлтэй хот гэсэн төлөвлөгөө боловсруулж байгаа аж. Энэ ажлын хүрээнд хүүхэд, нийгэм рүү чиглэсэн бидний анзаардаггүй олон асуудлыг хөндөж, тусгажээ. Тухайлбал, шинээр баригдаж буй барилга байшингийн төлөвлөлтөд хөгжлийн бэрхшээлтэй хүүхдэд зориулсан гарц хийлгэх саналыг тусгуулах,  асрамжийн хүүхдүүдийн тоог нэмэхгүй байх талаар ямар арга хэмжээ авах гэдэгт анхаарч ажиллах юм байна.

Хүүхэд, гэр бүлийн хөгжлийн газрын бүтэц, удирдлага хоёр сарын өмнө өөрчлөгдөн  Я.Байгалмаа даргаар нь ажиллах болжээ. Тэрээр ажлаа аваад хамгийн түрүүнд гудамжны хүүхдүүдийн асуудлыг хөндсөн байна. Нийслэлд гудамжинд амьдардаг, ПС тоглоомоор хоноглодог 70 орчим хүүхдүүд байгаа илрүүлж, тэднийг нийгэмшүүлэх ажил зохион байгуулжээ. Эдгээр хүүхдүүдээс 20 хүүхдийг гэрт нь буцааж, үлдсэн хүүхдүүдийг асрамжийн газруудад хүргэсэн байна. Тэнэмэл хүүхдүүдийн 80-90 хувь нь ПС тоглоомын газруудаар хоноглодог нь тогтоогдсон байна.
Уулзалтын төгсгөлд Хүүхэд, гэр бүлийн хөгжлийн газрын дарга Я.Байгалмаа хэвлэл мэдээллийнхэнд хандан ирээдүй хойч болсон хүүхдүүдэд зориулсан булан, нэвтрүүлэгтэй болохыг санал болголоо.