Монгол эх орныхоо өнцөг булан бүрт ажиллаж, сурч боловсорч буй болон өөрийнхөө мэдлэг, туршлагаа хүн ардынхаа эрүүл энхийн манаанд зориулж явсан үе үеийн эмч нартаа Олон улсын эмч нарын баярын өдрийн халуун мэндчилгээ дэвшүүлж эрүүл энх, аз жаргал, сайн сайхныг хүсэн ерөөе.

  Монгол улсын хүн амын тоо 1921 оноос хойш даруй 4 дахин нэмэгдэж, хүн амын дундаж наслалт 2 дахин уртассан нь мориор дуудлагад явж, модон чагнуураар хүн үздэг байсан анхны эмч нараас эхлээд орчин үеийн оношилгооны өндөр технологи эзэмшсэн өнөөдрийн эмч нарын маань ч нөр их хөдөлмөрийн үр дүн гэдгийг бахдан хэлэхэд таатай байна.

  Хүний эрүүл мэнд, амь насыг аврахын төлөө нойр хоолоо умартан, өдөр шөнийг ялгалгүй, ар гэр, амин хувийн эрх ашгаа хойш тавин байж зүтгэж байдаг Та бүхний нөр их хөдөлмөрийг Монголын ард түмэн өндөр үнэлж байдаг бөгөөд Та бүхнийхээ ямар ч бэрхшээлээс шантралгүй, мэргэжилдээ үнэнч байж, эх орон, ард түмнийхээ өмнө өргөсөн эмчийнхээ тангарагт ямагт үнэнч байдагт гүн талархал илэрхийлж байна.

  Эрүүл мэндийн яамнаас энэ өдрийг “Эмч нартаа талархах нэгэн өдөр” болгон тэмдэглэдэг уламжлал тогтсон бөгөөд энэ өдөр нийт эмч нартаа Эрүүл мэндийн яамны нэрийн өмнөөс болон хувиасаа гүн талархал илэрхийлж байна.

  Өнөөдөр Монгол Улсын эрүүл мэндийн байгууллагаар жилдээ 17 сая гаруй хүн амбулаторийн үзлэг хийлгэж, 700 мянга орчим хүн эмнэлэгт хэвтэн эмчлүүлдэг. Нийгмийн нийт үйлчилгээний бараг тал хувийг эрүүл мэндийн салбар дангаараа үзүүлж байна. Энэ бүх үйлчилгээг Та бүхэн үзүүлдэг бөгөөд олон мянган хүмүүст амьдрал, нас бэлэглэж, өвчин эмгэгээс нь ангижруулж эрдэнэт хүмүүний эрүүл энхийн манаанд зогсох эмч таны хөдөлмөр үлэмж энэрэнгүй, үнэхээрийн агуу, хамгийн буянтай, үнэлж баршгүй гавьяатай билээ.

  Эмч та нарыгаа ажлын байр нь стрессгүй, авдаг цалин нь амьдралд нь хүрэлцдэг, ард түмэндээ нэртэй хүндтэй, алтан гартай байлгахын тулд та бид их зүйлийг хамтран хийж чадна.

  Эмч нарынхаа хөдөлмөрийг зах зээлийнх нь зарчмаар жинхэнэ ёсоор үнэлж, ажлын ачааллыг нь багасгаж, авдаг цалинг нь бусад орны жишигт хүртэл нэмэгдүүлж, мэргэжил мэдлэгийг нь тогтмол дээшлүүлж, хариуцлагын даатгалаар дамжуулан мэргэжлийнх нь үйл ажиллагаатай холбоотой гарах эрсдэлийг нь хуваалцах арга замыг бий болгохын төлөө Эрүүл мэндийн яам ажиллаж байна.

  Мэргэжлийн үйл ажиллагаагаа хэвийн явуулахад эмч нарт хэрэгтэй ажлын нөхцлийг бүрдүүлж оношилгоо, эмчилгээний технологийн дутагдлаас болж эмч хүн өвчтөнийхөө өмнө буруудаж байдаг гаж үзэгдлийг таслан зогсоож, та нарыгаа өөртөө итгэлтэй, өвчтөндөө ээлтэй байлгах асуудлыг шат дараатай бодлогоор дэмжиж ажиллахаа Олон улсын эмч нарын өдөр-Эмч нартаа талархах энэ өдрийг тохиолдуулан амлаж байна.

  Та бүхэндээ болон та нараар дамжуулан таны гэр бүл, үр хүүхдэд эрүүл энх, аз жаргалыг хүсэн ерөөе. Та бүхний маань юу санасан есөн хүсэл тань сэтгэчилэн биелж үзсэн өвчтөн бүр чинь эдгэрч, үйлчилсэн иргэн бүр нь баярлаж байхын өлзийтэй сайхан ерөөлийг дэвшүүлье.