Нөөцийн мах борлуулж байгаа цэгүүдэд цээж мах борлуулагдаад, гуя нь зарагдахгүй байна гэж хэрэглэгчид гомдол мэдүүлэх болсон. Тэгвэл уржигдар Ерөнхий сайдын уулзалт “нөөцийн мах борлуулалтад хяналт тавьж чадаж байна уу” гэх асуултыг сэтгүүлч Ерөнхий сайдад тавив. Сайд Н.Алтанхуяг  “Өмнөх Засгийн газрын үед нөөцийн мах бэлтгэл “луйврын сүлжээ” болтлоо хөгжжээ. Сонгон шалгаруулалтад шалгарсан компаниуд нөөцийн мах бэлтгээгүй байж “бэлтгэсэн” хэмээн худал хэлээд мөнгө завшдаг байж.  Ийм луйврын сүлжээг таслан зогсоохын тулд шинэчлэлийн Засгийн газар мах бэлтгэх тогтолцоог өөрчлөх зорилгоор өнгөрсөн жил зөвхөн “Жаст агро” компанийг шалгаруулж мах бэлтгүүлсэн” утгатай хариулт өгсөн юм. “Жаст агро” компанийн хувьд нийслэлийн хэмжээнд 9200, Дарханд 1000, Эрдэнэтэд 1016 тонн мах нийлүүлэхээр болж бэлтгэжээ. Харин мах бэлтгэхэд нь зориулж Монголбанкнаас 80 гаруй тэрбум төгрөгийн хөнгөлөлттэй зээлийг олгосон юм байна. Одоо тус компанийн бэлтгэсэн нөөцийн мах Улаанбаатар хотод 350 орчим цэгээр борлуулагдаж байгаа аж.

Ямартаа ч энэ асуудлыг Засгийн газар, Хотын захиргаа ахалж ажиллаж байгаа хэмээн эх сурвалж мэдээллээ.