Увс аймгийн хэмжээнд 750 хүн 406.2 сая төгрөгийн орон сууцны, 850 хүн 120.4 сая төгрөгийн сургалтын, нийт 1600 гаруй иргэн 526.6 сая төгрөгийн хөнгөлөлт эдлэхээр баримт материалаа бүрдүүлж аймгийн Татварын хэлтэст хүлээлгэн өгөөд байна.

       Аймгийн Санхүү, төрийн сангийн хэлтэс эдгээр бичиг баримтыг хянаж үзээд Хүн амын орлогын албан татварын хөнгөлөлт эдлэх иргэдийн мөнгийг Төрийн сан банкаар дамжуулан дансанд нь байршуулж эхэлжээ. Өмнө нь иргэдийн татварын хөнгөлөлтийн мөнгийг 4 дүгээр сард багтаан бүгдийг нь дансанд нь байршуулдаг байсан бол энэ жилийн хувьд Сангийн яамнаас ирүүлсэн журмын дагуу Татварын хэлтэст бүрдүүлж өгсөн баримтын дарааллаар нь сар сард өгч дуусгахаар болжээ. Ингэснээр энэ сардаа багтаан 20 байгууллагын ажилчдад 45 сая төгрөгийн, ирэх сард 15 байгууллагын ажилчдад 89 сая төгрөгийн татварын хөнгөлөлтийг буцаан олгох аж.
       Увс аймгийн хэмжээнд Хүн амын орлогын албан татварын хөнгөлөлтийг 450 сая төгрөгт багтаан төсөвлөсөн боловч 526.6 сая төгрөгийн хөнгөлөлт эдлэх баримт материал бүрдэж, 74.2 сая төгрөг дутагдаж байгаа тул үүнийг аймгийн ИТХ-ын хуралдаанаар оруулж төсвийн тодотголоор эх үүсвэрийг нь шийдэх юм байна.
     Хүн амын орлогын албан татварын тухай хуульд заасны дагуу орон сууц худалдан авсан, өөрийн хөрөнгөөрөө орон сууц барьсан, мөн оюутны сургалтын төлбөр төлсөн зэрэгт тухайн жилд төлсөн Хүн амын орлогын албан татварыг нь буцаан олгодог журамтай юм.

Увс аймаг