Үйл явдлын гэрч бичиж байна. Монгол улсын иргэн зургаан настай С.Амарбаясгалан 2013 оны 03-р сарын 30-ны өдөр “Чингис хаан” олон улсын нисэх онгоцны буудлаас оройн 23 цаг 50 минутад Сөүл хот руу рүү транзит нислэг хийсэн байна. Миний бие Сөүлээр дамжин Вашингтон орох үедээ нисэх буудлын хүлээлгийн lounge-д С.Амарбаясгалантай анх таарч, монгол хүүхэд харж харгалзах хүнгүй явж байгааг нисэх буудлын ажилтнаас олж мэдсэн юм. Хэл нэвтрэлцэхгүй нисэх буудлын ажилтан  яахаа мэдэхгүй балмагдсан байсан бол харин хүү “Би гэртээ харимаар байна” гэхээс өөр юу ч хэлж чадахгүй уйлж байсан. С.Амарбаясгалан хэлэхдээ миний аавыг Э гэдэг гэж байсан ч паспорт дээрх овог нь С байсан нь гайхаж эргэлзэхэд хүргэсэн юм. Түүний бүх бичиг баримтийг нь уутанд хийгээд хүзүүнд нь зүүсэн байсан. Хүүгээс асууж байгаад бичиг баримтийг нь үзэхэд Фижид эмээ дээрээ очно гэсэн мэдээлэл байсан. Харин С.Амарбаясгалан нь эмээ, өвөөгөө Улаанбаатарт байдаг Фижид хэнийг ч танихгүй гэж хэлж байсан юм. Гараас гарт гэсэн үйлчилгээний талаар ямар ч мэдээлэл байгаагүй.  Хэрэв мэдээлэл байсан бол тийм үйлчилгээ авсан бол "Кореан эйр"-ийнхэн ямар ч асуудалгүй зохицуулах байсан байх. Дүгнэлт хийж болохоор чухал чухал асуултанд С.Амарбаясгалан хүү их л эргэлзээтэй хариулт өгч байсан нь эцэстээ энэ хүү харийн оронд ямар зорилгоор зорчиж байгаа вэ гэсэн асуултыг өөрийн эрхгүй төрүүлж байсан. Энэ бүхний дараа бусад сэтгүүлчиддээ мэдэгдэн бид холбоо харилцаагаа ашиглан хүүгийн төлөө идэвхтэй ажиллаж фейсбүүк хуудаснаа уг мэдээллийг тавьж, гадаад харилцааны яаманд мэдэгдэж чадсан юм. Мэдээж хүүгийн төрсөн аав нь энэ бүхнийг мэдээгүй байж байгаад уг мэдээллээс хүүгээ Сөүлд байгааг мэдэж гадаад харилцааны яаманд хандсан гэж ойлгож байгаа. С.Амарбаясгалангийн виз нь хүүг Фижи рүү эмчилгээнд явна гэсэн зорилгоор гарсан байсан. Өвчтэй, зургаахан настай хүүг эрүүл ухаантай хэн ч гэсэн ганцааранг нь онгоцонд суулгаад явуулахгүй. Тэгээд ч хүү “Миний бие огт өвдөөгүй” гэж хариулсан юм. Энэ бүхнээс харахад бид нялх балчир үрсийнхээ төлөө арай илүү хянамгай, арай л илүү сэтгэлтэй байх цаг болсны илэрхийлэл болж байна. Ямар ч байсан энэ аялал зургаахан настай хүүгийн хувьд хэтэрхий хатуудсан аялал байлаа. Мөн ямар ч хүүхдийг гадагш нь явуулахдаа өөрөө хүсч байгаа эсэхийг нь харгалзан үзэж аюулгүй байдлыг нь дээд зэргээр хангах хэрэгтэй байгааг үйл явдал гэрчилж байна. 

                                                                                                                                  Б.Цэвэгмид "MBS" телевизийн сэтгүүлч