Өнөөдөр ""Нарантуул" олон улсын худалдааны төвийн захиргааны дарамт" гэсэн сэдвээр Нарантуул зах дахь түрээслэгчдийн үйлдвэрчний эвлэлийн хорооны дарга Б.Байгалмаа, МӨХ-ны өмгөөлөгч Б.Эрдэнэцэцэг, түрээслэгчдийн төлөөлөгч нар хэвлэлийн хурал хийсэн юм. Тэд тус зах дээрх бусармаг үйлдлүүдийг илчлэхээр ийнхүү сэтгүүлчдэд ханджээ. Энэ үеэр Монголын өмгөөлөгчдийн холбооны өмгөөлөгч Б.Эрдэнэцэцэгээс дараах зүйлийг тодрууллаа.-"Нарантуул" захын түрээслэгчид тус захын үйл ажиллагаатай холбоотой бугшсан олон асуудлыг хөндлөө. Өмгөөлөгчийн хувьд таны байр суурийг сонсоё. Тэдний ярьж буй асуудал хэр үндэслэлтэй вэ?
-Үндэслэлгүйгээр төлбөр авч байна гэж түрээслэгчид олон байгууллагад хандсан байдаг юм. Тэдгээрээс шалгах нэгэн нь шалгасан. Тухайлбал, Хүний эрхийн үндэсний комисс шалгаж эл асуудлыг үндэслэлтэй гэдгийг баталсан. Тэгээд ХЭҮК түрээсийн гэрээгээ байгуулахыг шаардсан. Иргэний хуульд нэг нь түрээсэлж, нөгөөх нь түрээсэлж л байгаа бол заавал гэрээ байгуулах ёстой. Төлбөрөө гэрээнийхээ дагуу ав гэсэн шаардлагыг "Нарантуул трейд" ХХК-ийн Ерөнхий захирал Ш.Сайхансамбууд тавьсан.
-ХЭҮК-ийн шаардлагыг Ш.Сайхансамбуу хүлээж авахгүй тохиолдолд ямар арга хэмжээ авах вэ?
-ХЭҮК шаардлагаа тавьсан. Үүнийг Ш.Сайхансамбуу шаардлагыг биелүүлэхгүй бол эрүүгийн хэрэг үүсгэх хүртлээ яригдана. Ямар ч хүн хөрөнгөтэй, мөнгөтэй гээд хууль зөрчиж, бусдын эрхэнд халдаж болохгүй. Ардчилсан нийгэмд бүгд чөлөөтэй байдаг учир хуулийн хүрээнд л амьдрах ёстой. Тэгэхгүй бол хэн нэгнийхээ эрхийг зөрчих гээд байдаг. Гэтэл Ш.Сайхансамбуу хуулийг умартан түрээслэгчдийн эрхийг зөрчиж байна. Ш.Сайхансамбуу бол УИХ-ын гишүүн байсан хүн. Тиймээс Үндсэн хууль, Хүний эрхийн хуулийн талаар мэдлэгтэй байх ёстой. Үндсэн хуульд Монгол Улсын иргэний үндсэн үүрэг гэж заасан байдаг.
