Бүсгүйчүүд бидний хөлийг гоо сайхан харагдуулахаар бурхнаас заяагдсан суут зохион бүтээгч Кристиан Лубутены “MarieClaire” сэтгүүлд өгсөн ярилцлагыг хүргэж байна.

Кристиан Лубутен гутлынхаа ул руу улаан хумсны будаг санамсаргүй асгаж, өөрийнхөө бэлэг тэмдгийг бий болгосноос хойш 20 жил өнгөрчээ. Өндөр өсгийтийн ертөнцийн эзэн хаан тэрээр энэ сард болсон Лондонгийн Загварын музейн нээлтээр, болон Парисын “Галзуу Морь” кабаре тоглолтыг үзэх үеэрээ бидэнтэй хэсэгхэн зуур хөөрөлдсөн юм.

Кристиан Лубутен бол өндөр өсгийтөнд донтогчдын эрин үеийг бий болгосон нэгэн. Зохиолч Саймон Донаны хэлсэнчлэн, “Лубутены гутлууд хар тамхи л гэсэн үг. Гэхдээ үүний донтолтыг эмчлэх арга байхгүй”. Нэг л удаа, ердөө ганцхан удаа л түүний бүтээсэн өсгийтэй гутланд хөлөө шургуулж үзсэн бол, тэндээ үүрд “хадагдсан”-аас өөрцгүй. Гуталчин гэхээсээ илүү алхимич тэрээр бүсгүйчүүдийг сээтэгнүүр нимгэн хоншоор, уран гилбирт өсгийгөөр бүрэн өөрчилж чаддаг. Энэ л Лубутены бүтик рүү эмэгтэйчүүд байрныхаа мөнгийг, хадгаламжийнхаа дэвтэртэй барьж ирэхэд хүргэдэг гол нууц нь аж. Яагаад бүсгүйчүүд түүний загваруудад ингэтлээ улайрдаг вэ? Учир нь CL-ийн туфлийг өмсөхөөр жирийн нэг гутал өмсөх мэдрэмжийг бус, харин юугаар ч үнэлж барамгүй эмэгтэйлэг хүч чадлыг мэдэрдэгт оршино.

-Таны амжилтын түүхийг эхнээс нь ярьвал ямар вэ?
-Хүн болгонд л “сэргэн мандах” үе гэж байдаг. Миний хувьд энэ үе бол 1991 он. Би амьдралынхаа бүх дурсамжийг энэ оноос өмнө, энэ оноос дараа гэсэн хоёр л утгаар зааглаж чадна. 1991 онд би жинхэнээсээ насанд хүрсэн эр болсон юм. Тэгэхэд миний ээж тэнгэрт хальж, би тун удалгүй өөрийн компаниа байгуулсан. Хэрэв ээж минь миний дэргэдээс яваагүй байсан бол, би хэзээ ч ийм амжилтанд хүрч чадахгүй байх байлаа. Учир нь би төрөлхийн залхуудуу хүн байсан юм. Бүх зүйл надад даван туулж боломгүй санагддаг байсан. Гэвч миний ээж нас барснаар, намайг амьдрал албан хүчээр “том хүмүүс”-ийн ертөнц рүү түлхсэн. Харин тэр ертөнцөд хүн бүр ажиллах ёстой байсан. Ээж минь миний хийсэн гуталнуудыг цаг үргэлж магтдаг байсан, түүний хайрласан урам зориг байгаагүй бол надад энэ бизнест хөл тавих зориг хүрэхгүй байх байлаа.

-Таны нэр хүмүүсийн дунд яг л шархны лент, эсвэл Kleenex гэдэг шиг түгээмэл, оноосон нэр болж хувирсан. Ийм нэртэй байх ямар вэ?
-Эхлээд би гайхдаг байсан ч, сүүлдээ дассан. Би нэрнийхээ сүүлийн хэсэгт тийм ч дуртай байгаагүй юм. Гэхдээ яахав, Frigidaire гэдэг шиг муухай бишээс хойш зүгээр л дээ.

-Загварын тоглоомоор 20 жил наадлаа. Юу нь таныг энэ бизнесээс уйдаадаггүй байв?
- “Уйдах” гэдэг үгийг би ойлгодоггүй юм. Миний гутал зохион бүтээх хүсэл анхныхаасаа огт өөрчлөгдөөгүй. Би өөртөө ядрах, эсвэл унтрахыг зөвшөөрч чадахгүй. Хэрвээ миний л хүсэл эрмэлзэл унаад эхэлвэл, хүмүүс миний загваруудаас үүнийг шууд харах болно. Урам зориггүй ухаанаас гарсан загвар сонирхолгүй байдаг. Яг л voodoo хүүхэлдэй шиг, бид цус, хөлс, нулимсан дундаас бий болсон бүтээлийг хүсдэггүй. Би амьдралд хайртай, бас бүхнийг хөнгөнөөр хүлээж авдаг. Энэ нь ч миний загваруудаас харагддаг.

-Та амьдралын талаар яаж ийм эерэг төсөөлөлтэй байдаг юм бэ?
-Өөдрөг бодол ээжээс минь үүдэлтэй. Би том эгчээсээ хойш 20 жилийн дараа төрсөн юм. Би айлын хэнз хүүхэд байсан. Тийм их хайр чамд хэзээ ч нугарашгүй бат бөх ноён нурууг бий болгодог. Миний ээж надаас өмнө 3 хүүхэд төрүүлчихсэн байсан. Тиймээс тэр намайг дураар нь тавьдаг байлаа. Надтай тэмцэлдэж, намайг ялдаг юм нэг ч байгаагүй.

-Та эмэгтэй хүний юуг хамгийн эхэлж хардаг вэ?
-Миний хувьд үүний хариулт маш энгийн. Би хэн нэгнийг харахаараа эхэлж гутлыг нь хардаггүй. Харин үүний оронд эхэлж царайг нь, дараа нь хувцсыг нь харж сонжоод, түүнийг ямар гутал өмссөн байгааг таах гэж оролддог. Таасныхаа дараа гутал руу нь хараад би үргэлж гайхширдаг шүү!

-Эмэгтэйчүүд яагаад гутланд ингэтлээ донтдог юм бэ?
-Эмэгтэй хүн гутал худалдаж авахаараа эхэлж хайрцагнаас нь гаргаж өмсөөд, өөрийгөө толинд хардаг. Ингэхдээ тэр үнэндээ гутлаа биш, өөрийгөө л харж байдаг. Хэрэв түүнд өөрийнх нь харагдах байдал таалагдвал тэр гутал ч бас таалагдана. Эрэгтэй хүн бол фетишист. Тэд гутлаа тосолж, үр дүнг нь талархалтайгаар хүлээж аваад, түүнийгээ аль болох удаан өмсөхийг хүсдэг. Эмэгтэй хүнд энэ бүхэн хамаагүй. Тэд нэг гутлыг 10 жил өмссөн гэдгээрээ хэзээ ч бахархахгүй. Өөрийгөө гоёж чимэх нь эмэгтэй хүнд байгалиас заяасан зөн. Өндөр өсгийтэй гутал өмссөн нүцгэн эмэгтэйг төсөөл дөө. Тун гоо үзэсгэлэнтэй. Харин гуталнаас өөр юм өмсөөгүй эрэгтэй хүн маш тэнэг харагдана.

-Таны гуталнууд J.Lo-г хит дуу бичихэд нь нөлөөлж чадсан. Харин танд хэн урам зориг, үлгэр дууриал болж байсан бэ?
-Би үргэлж л өсгийтэй гутал өмссөн эмэгтэйчүүдэд дуртай байсан. Жаахан хүү байхдаа би бүжгийн тэнхим, охид, бүжигчид, өд сөдөнд тагагддаг байлаа. Би бас Тина Тюрнерийг биширдэг байсан. Би Блондигийн анх гарч ирж байсан үеийг сайн санадаг. Тэр үед Дэбби Хэрри цагаан шаргал үстэй, өсгийтэй гутал өмсдөг, бас маш гайхалтай хөгжимддөг байсан. Аллилуйя!

-Та өндөр өсгий, намхан гутал хоёрын алийг илүүд үздэг вэ?
-Яг одоогоор өсгийтэй гутлыг. Би төрөлхийн, натураль зүйлсэд тийм ч дуртай биш. Жишээ нь би засч янзалсан цэцэрлэгт хүрээлэнг зэрлэг байгалиас илүүд үздэг гэсэн үг. Өсгийтэй гутал бол тэр чигтээ хүний санаанаас гарсан бүтээл, хэтрүүлэг. Өсгийтэй гутал бол байгалиас заяасан хэв маягийг эвдэж гарсан хувцас, түүний өмсөхөд “тохиромжгүй”, эвтэйхэн бус байдал нь л намайг ингэж их татдаг хэрэг.

-Яагаад өсгийтэй гутал тачаангуй шинжтэй байдаг юм бэ?
-Бүсгүй хүн өсгийтэй гутал өмсөхөөрөө арай удаан хөдөлдөг. Хурдан хурдан алхах нь секси ч биш, аятайхан ч биш харагддаг. Үргэлж л яарч, түргэлж байдаг нэгнийг хүмүүс анзаарч, анхаардаггүй. Хэрэв өсгийтэй гутал өмсвөл, чи алгуурхан алхах болно. Энэ л жинхэнэ дур булаам байдал.

-Эмэгтэй хүн “Louboutin”-ы гуталны төлөө хамгийн ихдээ юуг золиослох бол?
-Эрх чөлөөгөө. Миний Далласт танилцаж байсан нэг эмэгтэй надад өөрийгөө олон хүнтэй газар үл ялиг хоцорч очоод, урд талын эгнээ хүртэл өсгийтэй гутлаа тов тов хийлгэн бүхнийг эргэж хартал нь алхах дуртай тухайгаа ярьж байсан юм. 2 жилийн дараа би гарын үсэг зурахаар өнөө газраа дахиж очоод тэр эмэгтэйг сургалтал, түүнийг шоронд орсон тухай олж мэдсэн. Тэр ажиллаж байсан компанийнхаа мөнгөнөөс шамшигдуулж, түүгээрээ Neiman Marcus-аас манай гутлыг захиалах гэж байгаад баригдсан юм билээ.